A la "Chronique" i' veinnent de m'dithe
Qu'i y'a tréjous des gens
A lus d'mander des pièches jerriaises,
Du patoés des viers temps.
Ny'a pon grand'livres en pliat Jerriais,
Ni grand's histoéthes in'tou,
Et j'cré, ma fingre, qu'ch'est bein drôle
Quand l'Jerriais va partout!
Et n'ou m'a dit qu'sus la gazette
I' fallait faithe des vers
Pour ramêmoéther les Jerriais;
Instruithe les êtrangiers.
Je rim'thai don un p'tit annièt;
- Qu'un autr' le faiche demain
Car je n'peux pon tréjous ècrithe
Et l'changement fait du bein.
Elie
|
