Y'a soisante ans, quand mousse j'étais,
Je creyais ben que le Jerriais
Essait bétôt une langue passée,
Hors de la mode, et oubliée,
Sinon dans tchique creux ou racoin,
Sait à St. Pierre ou à St. Ouen,
Ouès-que viers et vielles, en chuchottant,
Se ramémoithe du Bouan Vier Temps.
Mais, sâpresti! en chinquante-deux,
Y'a des Jerriais qui n'ont pas d'peux,
Et l's uns et l's autres, d'ichin et la,
Sé font en "Club" - et l'affaithe va!
Les membres s'en vont, une fais par mais,
A l'Assembliée des bouans Jerriais,
Et là êcoute pièches et chansons,
Tchiques viers versets, des vrais ditons,
Des longs discours, et des p'tits mots,
Qui les font rithe comme des vrais fo's.
I' sé dispute t'ches-que sont les noms,
Des herbes, des fieurs, et des paissons,
Dé t'chique rotchi, ou d'rue, ou d'poule -
I' cacqu'tt, i' paslent, i' baillent d'lus goulle;
Mingniet est près quand ch'est fini
A l'Assembliée des Gens d'Jerri.
J'savons l' Angliais, j'savons l'Français,
Mais faut t'nin boun au VIER JERRIAIS.
P. W. LUCE.
|
