Hon! hon! té v'la! - Dé où-est qu'tu vains
A l'heure qu'i l'est? jé veux l'savé.
Né m'oblige pon à faire lé trains,
N'sais pon tétouogne, mais dis, dis-le mé.
Réponds don, Phlipe; mais qu'est qu' tu as?
Viyons, comme un bouon homme dis-mé
Pour qu'est qué jé n'lé sairais pas?....
I faut qu'tu aies unne tête dé fé!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Là, Phlipe? né va pon r'commanchi;
J't'lai déjà répété chent fais,
Si ch'est qu'tu veux m'mettre en péchi,
Ch'est dé t'y prendr' comme tu l'fais.
N'v a rain au monde, qui m'faiche pière,
Que d'vais les gens s'mettre à chanter
Quand nou leux pàle; j'aim'rais meu, vère,
Qu'nou mu'baille deux paffes, - oui dia, - ma fé!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Porte r'pos don! Mais jé suppose
Qué ch'est pour mé faire enragi!
Si nou té d'mande la moindre chose,
Tu dis tout d'suite, ch'est t'picagni.
I faudrait, pour té contenter,
Né souffler mot et tréjous rire:
C'hest bain pour d'au'tres, - mais quant à mé,
J'nen sis pon d'même, - je peux té l'dire,

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Ch'nest pas d'annié qué tu l'sais bain!
J'n'aime pas à être èstiboquie!
Et où est la chenne qui n'dirait rain,
Si oull' 'tait traitée comme jé l'sis?
Ov' un tel homme devant ses yeux,
J'é l'défie bain à qui qu'ché sait.
Quand nou s'rait oui des anges des cieux!
Nou perdrait pâtienche avec tai.

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Tu voudrais bain qué j'lé serais
Un ange du ciel; - Ah, j'té comprens!
Tu m'voudrais morte, monstre qu'tu ès!
Jé m'en doutais i y a longtemps.
Ch'est seu qu'tu en prends bain lé qu'min!
Faibl' comm' jé l'sis i'im faut la paix,
Au yeu dé chla, j'nai qu' du chagrin;
Ch' s'rait miracle si j'y rèsistais!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Qu'est qui t'fait rire? N'as-tu pon honte?
Oh, qu'est qui l'airait jamais creu!
Qué j'meure ou vive, i n'en t'chient compte;
Et faut-i qu'i lait mauvais choeu!
I l'y tarde bain qué jé n'sais morte!
Et Seigneur, qu'est don qué j'l'y ai fait?
Penser d'ête traitée dé la sorte,
Après la femme qué jé l'y ai té!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

V'la chen qu' nou gagne d'être trop aisie.
Dépis lé matin jusqu'au sé.
Jé n' fais qué tracachi ma vie,
Pis v'la tout l'gré qué nou m'en sait!
Mais v'la ch'que ch'est - quand nou-z-est bouans,
Nou n'fait qu' dév'nin l'escliaves dé tous;
Nou vos laise faire bain tranquillement,
Et pis oprès nou s'moque dé vous! -

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Mais quand j'y pense, faut-i qué j'sais
Unne ignorante, - unn' imbécile!
Jamais jé n'mé pronmène, - jamais!
V'la bain très mais qu' j'nai 'té en ville.
Je m' tiens ichin comme dans unn' casse,
Tréjous cliouée dans chutt' maison!
Jé n'sais pas pu dé chain qui s'passe
Dans l'monde, qué si jé n'y étais pon

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

A si jé n'peux m'en prendre qu'à mé'
J'sis trop facile; - i faut qu' chla change!
Lé vier proverbe dit bain vrai,
"Qui s'fait brébis, le loup lé mange."
Ch'est bain! mais enfin nou s'ennyie
Dé s'sacrifier tréjous comme chla;
Quand nous s'laisse piler sus les pis,
Tout ch' qu'en r'vain, - che n'est qu' du ma!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Bon, v'la un creux à man d'vanté!
Mais après tout, est-che ètonnant?
Les choses daivent fini par s'user!
Jé l'porte v'la déjà si longtemps!
Ah! si ch'était bain d'autres qué mé,
l n'penseraient pas à l'rhabilli,
I fraient leux hommes en acater,
Et I fraient bain! Chest tout cotti!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Au reste ché qu'jai est tout d'une pièce;
J'n'ai veu dé rob' v'là bain trais ans
Si n'y en a quatre, il en apprèche,
Et man bonnette a d'viers ribans.
Quand j'vè comme est qu'les autr' sont grais.
J'ai presqué honte d'être à l'église,
Sinon qu'lé monde en déviserait,
J'crai bain que j'resterais assise.

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Quand j'vai quiqu'fais autour de mé
Chès femm' atout leux biaux habits.
J'pense en mé-même est-che bain vrai
Que j'sis arrangie comm' je l'sis!....
V'la seul'ment Jan'ton nott vaisine,
L' aut' Dimanch' oull' 'tait estallè,
Qu'oull' avait riélment la mine
D'unn' Damm'...qué nou s'y srait trompé!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Oull' avait unn' shall chu jour-là
Lé pus bé qu'j'aie veu dé ma vie;
La bordeur' enn' tait haut' comm' chla!
I d'vait couôter au moins daeux louis.
On sé r'dréchait, faut vais comment,
Dé sé senti chenna sus l'dos;
Ch'est s'n'homme qui ly en a fait présent
Nan v'la un homm' comme il en faut!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Sans menti jé n'srais pon marrie
Si j'en avais un té aitout.
Hé bain..... pour unn' fais dans ta vie,
Sais généreux, donn' mé des sous.
M'entends-tu, Phlip, - si chtait unn' dramme
Qué j'ly offrirais à cht'heu, j'parie
Qu'i m'comprendrais sans peine; ah damme!
Comme i r'trouv'rait bain vît' san ouie!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Bon v'la qu'i suffle à chteu, - de vrai,
J'crai bain qu't'as été fait exprès
Pour mé mé pliaigui et m'irritai
Tais-té, j't'en prie ou bain j'm'en vais.
Tu veur, à forche, don, qué j'm'emporte?
Les hommes, je pense ne songe' qu'à mà!
Mais l'mein dait êtr' lé seul d'sa sorte,
Préserve qu'y en ait fort comm' chla!

Picagn', picagne, picagn', ma femme!
Picagn', picagn', picagn', tréjous.
De toutes les femmes qui nous picagnent
Jé dis, lé ciel délivre nous!...

Ah! ches pouôr' fill', quand i s'marient,
I n'se dout' pas qu'i prenn' un maître!
S'i'z en etai' d'ou est-ce que j'en sis,
I n'auraient pas si hâte de l'être.
Suffle occo don! quand tu sais bain
Qu'chutt suffierie mé fait bisqui;
J'nen pâlrai pu car ch' est en vain,
Dépis qu'ch'est d'même' j'm'en vais m'couchi...

- Picagn', picagne, picagn', ma femme!
Picagn', picagne, picagn' tréjous!
Dé tout' les femm' qui nous picagnent
Jé dis: Ah! Ciel! délivre-nous!

LAELIUS.