Lé Jèrriais pour mé m'eramene a mes jannes jours - ichin à l'èntou d'la fèrme à Iouville éyou qu'j'fut né. Où'est qu'j'ouï mes preunmièthes patholes dé Jèrriais - sans doute acouo'the couochi dans l'bèr dans la grand' chambre en d'vant.
Pus tard, lé preunmié mot d'Jèrriais - d'pâler auve l'encouothagement d'pathents et d'grands-pathents si seux. Tchi sait - mé né quâsi quat'ans d'vant l'otchupâtion, ch'tait p't'étre duthant ches temps là d'écarcité et d'isolâtion qué chutte belle et ancienne langue c'menchi à prendre réchinne dans lé janne esprit, eune langue tchi rest'tha auve mé Dgieu mercie, jusqu'à la fîn d'mes jours.
Nou 'la pâler dans la tchuîsinne au touos les jours dans bel dé fèrme, dans le gardin, au clios, n'importé iou - ch'tait la langue du campângnard, d'anmin et d'vaisîn lé longs des jours. Pour nous - mousses étout quand j't'ionmes à jouer, chaque cri, chaque s'hueûle 'tait en Jèrriais, en moment d'fanne - en moment d'tristesse ch'tait yi tchi v'nint sus l'but nouotre langue et souvent à nouotre s'cours.
Epis en 1942 j'c'menchi l'école quand 'oui et non' printent un difféthent son, neunmétho et d'vis étout, Quand les pliantes et flieurs et même l's'ouaîthieaux printent un 'deuxième nom', dans l'pré au Connétabl'ye lé Bro au Creux Baillot, souos l'înstruction d'nouot're neuve maitresse d'Angliais, Miss Norman à l'ecole élémentaithe ichin à St Ouën.
Mais pour mé n'pas soin, les vièrs et anciens mots d'pipot, mèrgot et potithon, mêil'ye, rouoge-gorge et grive et bein d'autres, restîtent prêsèrvée dans l'fond l'esprit pour bouon, près à s'èrfaithe èrservi.
Vieil'ye et ancienne langue tu'es partie d'mé, d'man caractéthe et d'man d'vis, eune vraie richesse dé mots et d'viers ditons, eune langue tchi'm'donne vraiment pliaisi! Ancienne langue dé nouos anchêtres, d'ma jannesse et acouo'the d'à cht heu, j'taime bein et j't'èrmercie.
T'chiens bouon ma vieil'ye et ancienne langue; tchiens bouon, Jèrri n'sait pon Jèrri, sans té.
Ted Syvret
Viyiz étout: