Moussieu l'Rédacteu,
À ch't heu qu' nouos v'là dans l'Tchithême, les vielles crianches et couôteunmes mé veinnent dans l'idée. Comme mousses à l'Êcole du Dînmanche dé l'Églyise dé St. Georges, nou-sattendait fête à la fin d'chu Tchithême viyant qu' ou nouos apportait les fêtes dé Pâques. Dans l'Tchithême les gens n'lus privaient pon d'grand' chose, à mains qué ch'fûsse les Catholiques Romains, mais la vie d'campangne 'tait si sîmpl'ye dans chu temps-là qué nou n'vivait pon fort dans l'luxe.
J'm'èrsouveins qué l'Vendrédi Saint 'tait l'jour pour jeûner et qu' les gens obsèrvaient l'jour d'eune manniéthe un p'tit pus solonnelle qué d'habitude. Hardi d'monde allaient au rotchi ès baînis chu jour-là. Ayant fliêté et pêquoté autrément, y'en avait tchi tchuîsaient les baînis sus les lieux, en d'ssus du pliein, et les mangeaient auve d'la gâche à fouée.
Papa freunmait la forge lé Vendrédi Saint. I' m'ttait ses habits du Dînmanche et j'allions faithe eune pronm'nade (tch'était longue assez pour mé!) jusqu'à La Grève dé Lé. Arrivés là, j'halais mes cauches et mes souliers pour pativouother au pliein d'la mé dans la grève, quandi qu' Papa s'assiévait trantchil'yement à r' garder les cârrosses et les j'vaux tch'arrêtaient à l'aubèrge.
Lé tout temps pâssé nou mangeait du sînm'né dans l'Tchithême et à Pâques, et l'preunmié Dînmanche du Tchithême, aut'fais appelé Lé Dînmanche des Brandons, les jannes fill'yes et garçons avaient amors dé mett' lé feu à eune grand' fouée pour danser à l'entou. Ch'la s'faîsait d'tchique bord dans châque pâraisse, et, en finnissant, il' alleunmaient des boûtchets d'êtrain ou des brandons (un brandon 'tait eune torche dé glyi et d'rôsinne) pour jouarder atout et fliantchi ch'la en l'air. En lus en allant siez ieux en couothant l'travèrs des clios, i' chantaient "Taupes et mulots, sortez d'nouos clios ou j'vouos brûle les os!" Ch'tait eune ancienne couôteunme Nouormande tch'était obsèrvée étout dans l's Îles.
Lé lundi d'Pâques ch'tait eune vielle couôteunme du temps jadis d'aller au Vièr Châté à Gouôrray, car ch'tait-là l'seul jour qué l'publyi pouvait y'aller en visite. Les gens d'l'Est, sustout, y'allaient en mâsse. Ayant veu tout ch'-tch'i' y'avait à vaie dans l'châté, y'avait des jeux en d'houors pour les gens à s'rêjoui sus La Boul'lie. Un prédicateu bein connu, Maît' Pièrre Vautchi, prannait avantage dé l'occâsion pour prêchi un sèrmon là. I' fît ch'la pour bein d's années. Il' avaient du couothage, les vièrs prédicateurs!
À Pâques, nou mangeait d's oeufs (pas en chacolat comme à ch't heu, sans doute!), des fliottes (Lé Vendrédi Saint) et des mèrvelles.
Pour les gens d'églyise, lé Dîmanche dé Pâques 'tait ieune des fêtes oblyigatouaithes pour prendre la Sainte Communion. Nou-s-app'lait ch'la "Faithe ses Pâques."
En pâlant du Vendrédi Saint, v'là tchi m'ramémouaithe tch'i' y'avait un tas d'crianches entouôrre lé vendrédi ordinnaithe.
L's anciens criyaient qué ch'tait mauvaise chance d'entréprendre autchun grand travas chu jour là, à mains tch'i' n'ait 'té c'menchi d'vant. I' n'fallait pon c'menchi à touânner, ni à plianter, un vendrédi, ni à faithe un bétchet d'grain, ni abattre un annima. Nou n'laîssait pon les machons, ou autres, quémenchi autcheune oeuvre, et nou prannait bouân soin d'n'entanmer rein hors dé l'ordinnaithe lé vendrédi. Et ch'tait l'jour des chorchièrs. Si nou voulait prospéther i' n'fallait pon coper ses ongl'yes au vendrédi, ni au Dînmanche.
Par contre, nou pouvait fouângner et faithe lé beurre, car ch'la ch'tait d'tchi qu' nou faîsait toutes les s'maines.
Y'avait des crianches entouôrre la St. Jean étout. J'sis si liain d'Jèrri ichîn en Améthique qué j'mé d'mande tchiquefais si autcheune dé ches vielles crianches ont survêtchu l'pâssage du temps. Auve la populâtion d'airage vraie Jèrriaîthe dé l'Île réduite à eune minnorité, tout criabliément à rein qu'un tchièrs du total, ch'est probabl'ye qué ché s'sait difficile d'en trouver fort tchi lus en r'souveinnent.
Ch'tait eune vielle couôteunme dé la St. Jean d'aut'fais dé corner eune corne d'St. Jean (ch'tait eune corne d'boeu), ou meme eune v'lique ou coharne. Tout l'vaîsînné sé m'ttait à corner, et ch'tait un tîntamârre abominnabl'ye! Mais v'là tchi cachait les mauvais esprits. Nou disait, étout, qué ch'tait pour ramémouaither ès gens d'aller payi lus fèrmes et lus tèrres, comme nou dait l'faithe pour lé jour dé la St. Jean.
En pâlant d'ramémouaither, i' m'sembl'ye tch'i' fallait qué l's anciens eûssent dé bouannes mémouaithes pour lus r'souv'nîn dé toutes lus crianches!