à Portînfé, Saint Ou.
Mardi au sé.
Moussieu l'Editeu,
Nos v'là arrivé à la Pentecôte, si je n'me trompe pas, car ch'est agniet Mardi Gras, et j'avons mangi des crêpes. Quand j'tais jeune notre mèthe prépathait des fiottes à Pâques, une couotume tchi n'a pas tout à fait dispathu, mais ch'est bein seux que bein des jeunes gens n'savent pas chein qu'le mot veut dithe. Une grande turinne v'nait sûs la table, et j'avions nos fiottes dans d's assiettes à soupe. Ch'tait prèsque tout du lait, et souvent les fiottes 'taient brûlées, mais i' fallait les mangi et prétendre que n'y avait rein d'ma, car nos pathens n'se pliaignaient pas, et quant à nous, Moussieu, j'n'ôsaimes pas l'faithe, car si je n'voulâimes pas les avaler j'n'éthions pas yeu d'crêpes que j'aimâimes hardi. Une autre bordée notre mèthe mînt par méprinse du chucre dans la soupe, et i' fallait faithe la mine que ch'tait du sé. Mais ch'n'tait pas souvent qu'ou s'trompait d'la sorte. Mé, dans chais temps-là, j'éthais mangi prèsque autchune chose, car j'avais tréjous faim, et i' fallait hardi de nouôrrituthe pour satisfaithe toute la fanmille, car j'avions tous un bouôn appétit, sinon yunne de mes souers, tchi s'mînt dans la tête un matîn de r'fûser d'mangi san dêjeuné, et par conséquence fut enfreunmée dans l'gal'tâs jusqu'au préchain matîn. S'ou 'tait têtoigne, et ou y'était, sa méthe 'tait detêrminée, et aussi bein, car autrement j'éthions fait comme j'voulâimes, et y'éthait yeu d'mauvais travas.
J'avons liut, ma bouonnefemme et mé, avec grand dêpié que y'a tchestchion à ch'teu' d'dêtruithe le p'tit gardîn auprès du "'Bridge" pour donner pûs d'run ès bus d'la J.M.T. Eh bein, Moussieu, chein que j'voudrâimes saver ch'est chein tchi s'en va dév'nin d'la statue d'la Reine Victoria tch'a 'té là pour pûs d'septante ans. Ouèsqu'i' s'en vont la mettre? Nou-s-espèthe ocquo que l's Etats n'voudront pas sanctionner pathelle action, mais, comme dit la Merrienne, aussi bein s'fier que, yun d'chais jours, le solé et la lune touônnont d'couleu. Sans doute, ou-s-avez r'mértchi pûs d'une fais, Moussieu, que la Merrienne n'a pas grand respect pour nos Etats.
J'n'ai pas ocquo pâslé du temps. Eh bein, pour l'mais d'févri, i' n'est pas tant pièthe, car les fermiers peuvent plianter lûs bétchets eusifs, chein tch'i' n'éthaient pas peut faithe à chutte saison l'année pâssée, et pour les siens tchi cultivent des flieurs, y'a tout prospect d'une saison eûsive. Il est grand temps que les pouôres balloques aient un mio d'bouonne chance.
Les elections? Eh bein, Moussieu, j'n'ai pas grand'chose à vos dithe de nouvé sûs chu sujet-là. Tout ch'que nou sait au moment ch'est que l'Connêtablye de Saint Sauveux n'a pas ocquo dit définitivement s'i' s'en va abandonner, ou s'il a idée de r'prendre pour un autre terme de trais ans. Comme j'vos l'avais dit la s'maine passée, nou pâsle de plusieurs autres mêssieux dans la pâraisse tchi voudraient la djobbe, et une fais qu'nou sétha pour seux tchèsque le Tom Mouothant s'en va faithe, y'éthait la pôssibilité d'une élection contestée. À la Trin'té ch'est seux que si l'Connêtablye Cabot abandonne, le Charles Cabot, que nou-s-entend est bein mûs, et l'Edgar Mouothant se trouv'thont en oppôsition. Ch'est tout pour agniet, Moussieu. Jusqu'à la s'maine tchi veint,
Ph'lip
Jersey Weekly Post 22/2/1964
Viyiz étout: