Malgré la tristesse dé Vendrédi Saint, j'avons bouonne raison dé célébrer car, sans chu jour-là, i' n'y éthait pon la glorieuse resurrection du Dînmanche dé Pâques.
La rentrée dé not' Sauveur à Jérusalem lé Dînmanche des Rameaux fut èrchue par la foule, et les salutâtions dé beinv'nue fûtent résèrvées pour lé Rouai des Rouais. Mais tchiques jours après, i' l'avaient tous abandonné; Judas l'avait trahi, St Pierre l'avait dênié et la crouaix du preunmyi Vendrédi Saint, ev'là pâssant deux mille ans à ch't heu, 'tait eune réalité.
Les ennemîns dé Jésû voulaient lus en dêbarrasser pour eune variêté dé raisons mais i' 'tait difficile dé l'condamner à mort. Il avait cliâmé qué li et Dgieu 'taient êgaux et i' n'pouvaient pon pardonner d'ité. Mais i' n'connaissaient autcheune aut'e pèrsonne tchi pouvait dgéthi les malades, donner veue ès aveugl'yes, souongni chîn mille gens auve chîn pains et deux p'tits paîssons, calmer la mé, attither un ênorme fliotchet d'hommes et femmes châque fais tch'i' pâlait. N'împorte les bouonnes choses tch'i' faisait, il' avaient décidé tch'i' fallait l'mettre à mort. Et ch'fut la mort sus eune crouaix tchi 'tait la piéthe disgrâce résèrvée pour les pus crînminnels des malfaiteurs. Ayant rêussi, ses advèrsaithes 'taient triomphants mais trais jours après………..
Et dé pus i' n'avaient pon réalisé qué sa mort avait payi les dettes dé nos péchés et nos avait gângni l'pardon.
Brian Vibert
2005
Viyiz étout: