Nou faîthait, et nou l'fait acouo d'nouos jours, des crêpes lé Mardi Gras. I' faut dithe, tout d'même, qué pouor bein des gens au jour d'aniet chu jour-là s'pâsse comme un autre et, don, sans crêpes. La faîth'thie d'crêpes est pouortant eune bein vielle tradition.
Les crêpes Jèrriaises
Mais y'avait eune couôteunme en Jèrri aut'fais tch'était bein cruelle - la Jouôte. Lé publyi s'attroupait à jouôter des pièrres, à taper à coups d'bâton ou à tîther, à tant par coup, sus des cotchets, des cannards, des lapîns, poules, et cétéra. Les cheins tchi l's abattaient en prannaient possession. Nou dîthait la jouôte des cos, la jouôte des lapîns, et cétéra, et nou gardait même la volaille maigre à l'exprès pouor ches bordées. V'là tchi s'faithaît étout lé Lundi d'Pâques, et aut' jours dé fête. Ch'la avait lieu l'pus souvent tout près l'Êglyise dé pâraisse, car ch'tait là étout où'est tch'était lé cabathet (ou aubèrge) lé temps pâssé et, don, lé centre d'affaithes sociales dé pâraisse. Ches jeux fûdrent finnalement întèrdits dans la deuxième maîntchi du drein siècl'ye, mais il' avaient lieu en cache acouo pouor tchîque temps auprès. Pis, jusqu'au c'menchement d'chu siècl'ye, nou continnuit la jouôte maîs souos eune aut' forme. Nou tîthait sus des boutelles, ou à l'ieau sus eune bouie, lé Lundi d'Pâques, pouor des pithots - pouor les gângnants. Ch'taît probabliément à La Grève dé Lé (La Grève de Lecq) qué ch'la eut lîeu pouor la dreine fais, dans les 1900.
Lé Tchithême
Lé tout temps pâssé nou mangeait du sînm'né dans l'Tchithême seulement. Et, lé preunmié dînmanche du Tchithême, aut'fais appelé lé Dînmanche des Brandons, les jannes gens (fil'yes et garçons) avaient amors dé mettre lé feu à eune grand' fouée pouor danser à l'entou. Ch'la s'faîthait tchique bord dans châque pâraisse et, en finnissant, il' alleunmaient des bûtchets d'êtrain ou des brandons (un brandon était eune torche dé glyi et d'rôsinne) pouor jouarder atout et fliantchi ch'la en l'air en lus en allant siez ieux, en couothant a travèrs pais (à travèrs les clios) et chantant :
"Taupes et mulots,
D'autres vèrsions étaient:
" ...j'vouos fou l'feu sus l'dos!"
ou
"...j'vouos brûle la barbe et l's os!"
Ch'tait eune ancienne couôteunme Nouormande tch'était obsèrvée étout dans l's Îles.