Un aut' commèrce tch'a beintôt dispathu ichîn en Jèrri et tchi s'en va à grands pas ch'est la vente du bouon beurre dé fèrme. Véthe, bieau qué y'en a acouo tchitch'un qui font l'beurre dé nos jours ch'est un failli p'tit nombre à compather au bouon vièr temps passé.
Jé fit eune touônnée l'autre sémaine pour m'asseûther sus combein d'fèrmes en Jèrri qué nou préféthe acouo garder l'lait et en faithe du beurre. Eh bein, ch'est à St. Ou tchi s'en trouve lé pus. Mais ailleurs, comme, par exemplye, à St. Cliément, ayant parcouothu (ou pûtôt voltilli) d'un but à l'autre dé la pâraisse j'n'ai peu trouver corps d'âme tchi pouvait m'enseigni d'l'înformation au sujet. evidemment qu'à St. Cliément nou-s-a compliètement oublié la couleu et la qualité de ch't'articlye. Et pis, ou savez, y'a tant d'fichus angliais dans ches parages-là qué l'pouorre fèrmi s'trouve forchi d's'en aller par ailleurs, ou du mains s'dêfaithe dé san bestchias faute dé pâtuthe à nouorri ses bêtes. Chein tchi n'est pon otchupé par des patates ou des tomates est peuplié par des angliais comme des lâpins dans eune dgéthanne!
Né v'chîn comme tchi qu'nou s'prenait à faithe lé beurre y'a vîngt-chînq ans et pus, et, sans doute, les cheins tchi l'font acouo acheteu lus y prennent à bein près d'la même maniéthe.
Les traites dé lait du matîn et du sé 'taient mînses en pots (des pots à l'esprès) à prendre. L'jour en r'vénant nou-s-êcrémait, en fliantchant la crême auve eune pétite souôtasse dans un pus grand pot appelé un bro, mais fallais qu'lé lait fusse bein cailli. J'dév'thais p'têtre dithe qué l's uns faisaient l'beurre eune fais, d'autres deux fais la s'maine. Quand la crême avait meûsi (i' lî fallait à bein près deux jours) oulle 'tait prête. Nou la m'tait à la selle auve eune quantité d'ieau - fraide en êté et caude en hivé, ayant prîn bouon soin d'êcauder ou suer la selle auve dé l'ieau bouoillante et pîs la r'fraidgi atou d'l'ieau fraide. Auve lé but d'san daigt nou jugeait à bein près la tempéthatuthe nécessaire. Nou touonnait la selle jusqu'à qu'v'là tchi fusse en gros brîns et pîs pas longtemps après le beurre s'assembliait. La touon'nie d'habitude prenait vîngt minnutes ou démi-heuthe. Nou halai l'lait d'beurre dé d'dans la selle et nou lavait bein l'beurre auve dé l'ieau d'vant l'pêtri.
D'vant aller pus liain i' faut qué j'diche qué aut'fais ch'tait eune selle à tuther tch'était en usage et pîs étou la bathette tchi vînt longtemps d'vant la selle d'acheteu. Y'avait, bein seux, eune apartément spéciale ouêqu's'faisait tout l'tripot tch'était connue comme la lait'tie. Mais continnouons.
Nou pêtrissait dans la tèrrinne auve la tchulyi à beurre et nou l'salait. La préchaine chose 'tait dé d'livrer (à la livre jèrriaise) et l'mèrtchi ou êtamper atou un mèrtcheux en bouais à l'exprès auve lé nom et la pâraisse du fèrmi. Pis il 'tait enveloppé dans du papi à beurre - tout prêt pour porter au marchi dans l'grand pangni à beurre. I' s'vendait dans les dgiex-huit à vîngt sou la livre et dé ma connaissance trente siex sou 'tait l'tout haut prix.
Quand l'beurre 'tait à bouon marchi ch'tait là qu'nou lé m'tait en pot. L'ayant bein pêtri dans l'pot et bein salé nou faisait du piclye atou d'l'ieau et du sé en l'vèrsant sus l'haut du beurre bein apliati. Comme ch'la i' pouvait duther ofûche siex mais, et nou s'en trouvait bein quand il 'tait à prix fo ou êcart, les vaques étant à sé. I' s'èrrav'nait c'mode pour d'la fricachin'nie ou comme affêquement (amendement) pour d'la gâche dé pâte.
Tchiquefais quand l'beurre avait l'goût d'navets ou d'suidiches l'èrmiède (qué nou disait) 'tait d'y mettre un p'tit mio d'salpêtre ou du nitre pour ôter l'mauvais goût. En êté étou tchiquefais par la chaleu et p't-être manque d'y souongni assez lé beurre éthait ieu l'goût du meûque. Pour lé couleuther quand i' n'tait pas des pus riches nou-s-avait d'tchi d'siez l'apotitchi dans eune pétite boutelle tch'agissait à mervelle pour lé jauni. Tchiquefais lé lait éthait ieu l'goût d'pipots tchi n'tait pon ninnetou hardi pliaisant.
Les cannes à lait 'taient en pâlîn, auve eune êcale dé vanné dans l'couleux pour empêchi l'lait d'êcliatchi. Lé couleux 'tait fait en taile (d'la taile à couleurs rillie en rouoge) et 'tait gentiment souplye pour qué l'lait piêssisses couler l'travèrs. Dé temps en temps eune vaque avait des pêques, ch'est à dithe, lé lait 'tait gras et les couleurs graîsseux, par la vaque ayant du fraid dans l'piéchot, mais pus souvent ché n'tait pas rein d'sérieux.
Tch'est qu'nou faisait du lait cailli? Faut pas penser qu'nou l'env'yait hors - ah, mais nan! Nou l'donnait ès p'tits vieaux ou ès couochons et même nou-s-en faisait sèrvi pour d'la gâche. Lé lait êputhé - ch'tait l'lait cailli éputhé d's'n ieau - nous l'mangeait à la tchul'lée auve du jaune chucre poudré d'ssus. Lé lait d'beurre du tèrme allait pour les couochons et les p'tits vieaux, sans pâler d'aidgi étou à faithe dé la gâche.
Né v'là l'histouaithe d'eune autre pétite partie d'la vie du fèrmi jèrriais, tchi, dans l'couothant d'eune dgiexaine d'années étha p't-être compliètement dispathu. Comme témoin d'mes patholes i' n'est qu'faithe dé considéther les trais seules bouonne femmes venderêsses dé beurre tchi sont acouo au marchi aujourd'aniet - des bouonnes vielles èrliques du bouon vièr temps passé en Jèrri.
Acouo eune chose qué j'veurt dithe, et ch'est chennechîn. Lé beurre jèrriais bein fait et fait par eune pèrsonne propre est aussi bouon comme autchun et chent fais miyeu qué toutes ches saletés-là d'beurres qué les gens acatent ès difféthentes boutiques en ville! Y'en a qu'iun au monde tchi peut l'battre, et ch'est l'beurre sèrtchais!
FLM
Les Chroniques de Jersey 15/6/1935
Viyiz étout: