Moussieu l'Editeu,
Ne v'là Pâques ocquo une fais, et hier au sé la Merrienne et mé j'tiomes à en pâslé. J'avions ocquo un mio d'feu, car les séthées sont ocquo fraides et le ma qu'j'ai dans yunne de mes gambes est bein pièthe si n'est pas êcaûffé. La Merrienne est d'même étout avec ses rhoumatices. "Eh, après tout," comme ou dit, "ch'est bein du si je n'pouvons pas avé nos p'tits conforts à notre àge, et après avé travaillyi toute notre vie comme j'avons fait."
"Y faudra, bouonne femme, que tu t'prépathe pour Vendredi, comme de couôtume. Y'as-tu pensé?"
"Eh bein oui assez," ou raiponnit, "mais j'pense bein tchi faudra qu'j'aille en ville accaté d'la mouothue."
"Pourtchi s'dêrangi?" j'l'y d'mandit. "J'peux sâbré yunne de chais poules-là tchi n'ont pas ponnu pour des s'maines, et si tu la mêts à bouollyi d'bonne heuthe le matin nou pouorra s'graie. Y'a pièthe qu'une poule bouollie avec un gobin d'lard."
"Absolûment tu perds la tête, Ph'lip," ou s'fit. "Tu dait savé qu'nou n'mange autchune sorte de viande le Vendredi Saint. Ch'est du paisson qu'nou mange, épis des fiottes. Il éthait fallu pâslé à ma méthe d'avé sûs la tablye autchune autre chose chu jour-là. Man pèthe, l'y, n'tait pas si partitchulyi, et j'l'entendit une bordée dithe à yun d'ses vaisins qu'un bouon gigot d'mouton y'éthait fait pûs d'bein, mais y n'éthait pas ôsé l'dithe en d'vant d'mémée. Avec chonna, y faut admettre que les temps sont changis, et le brit couort qu'y'a un p'tit viaud pas lien d'ichin tch'est pour fini sa courte vie dans l'mitan d'la s'maine, sans qu'personne en sache rain."
"Ch'n'est pas notre affaithe," j'l'y dit, "mais si par chance y nos arrivait un mio, dithais-tu nânin?"
"Je n'voudrais pas être si impolie," ou raiponnit, "épis nous pouôrrait l'mangi Sam'dit, mais y n'faut pas s'fié d'sûs, car les gens d'agniet n'ont pas l'habitude d'être si généreux comme tout chonna. Ch'n'est pas comme aut'fais."
"Tu peux l'dithe," je r'mértchit, "mais êcoute, Merrienne, si tu fais des fiottes, y n'faut pas les brûlé comme tu fit l'année passée. J'eut bein d'la peine à l's'avalé."
"N'té gêne pas," ou dit; "le lait avait happé quand j'tais otchuppée à prépathé l'paisson, mais tu'en mangi deux bouonnes assiettées quand-même."
"J'aim'thais mûs un bouon podin d'riz ou des dumplings," j'l'y dit, "et y'a pièthe qu'un pâté d'pommes ou une piat'lée d'bourdelos."
"Sans doute," ou dit, " mais pas pour le Vendredi saint. Ch'n'est pas là un jour pour des fricots."
"Pourtant," j'l'y dit, "j'te gage que les bouochiers en ville n'éthont pas à freumé dans la s'maine. Et dans l'hotels crais-tu qu'les vîsiteurs s'saient satisfaits si nou lûs présentait d'la mouothue et des fiottes. Ils îthaient bein vite se pliaindre, et ls'hoteliers attrap'thaient tchiques rudes patholes du député Rumfitt."
"Les hotels ne nous concernent pas," ou dit, "ni les vîsiteurs ni n'tout. Man d'vé et tan d'vé ch'est d'observé l'jour comme j'l'avons tréjous fait, et j'n'éthons rain à nous r'prochi. Après tout ch'n'est qu'un jour par an, et nou n'enhanne pas."
"Nan, ch'est vrai," j'l'y dit, "et n'crais pas que j's'y à m'pliaindre. Une p'tite distchussion n'fait pas d'ma. Mais ach'teu, veur-tu qu'j'aille en ville accaté chutte mouothue Jeudi matin?"
"Nânin, man Ph'lip," ou dit: "J'ithai mé-même, car quand tu vais en ville tu'as la mauvaise habitude de trouvé trop d'amins. Mé, j'fais chein qu'j'ai à faithe, et j'm'en r'veins."
Et Moussieu, ch'est bein vrai!
Ph'lip
4/4/1953
Viyiz étout: