San Antonio,
Texas, U.S.
Lé 14 dé novembre, 1981
Moussieu l'Rédacteu,
Lé fait qué l'traîsième jeudi d'chu mais est un jour dé fête ichîn en Améthique, lé “Thanksgiving Day” d'châque année mîns d'côté pour èrmèrcier l'Bouân Dgieu pour touos Ses beinfaits, mé fait penser ès vielles couôteunmes tch'avaient lieu en Jèrri dans les difféthentes saîsons d'l'année dans l'temps jadis. Y'en avait tch'étaient acouo en allant quand j'tais mousse. Sans doute, i' n'y'avait pon fort dé divèrtissement dans chu temps-là - pas d'radio, ni d'télévîsion, ni d'motos, ni d'beusses pour vouos porter en ville ou hors pâraisse touos les jours. Y'en avait ieune lé sanm'di seulement pour aller en ville quand jé d'meuthais à La Forge siez Papa en 1900. I' fallait don aver tchique divèrtissement d'temps en temps pour rêvilyi un mio l'ennion d'la vie d'touos les jours, et les saîsons et jours dé fête 'taient bein à propos pour joui des couôteunmes tch'avaient sans doute existé dé touos vièrs temps.
Y'a un vièr diton tchi nouos dit “Mardi Gras, fait des crêpes et t'en éthas!” La faîth'thie d'crêpes est eune bein vielle tradition. Ou pouvez vaie eune èrchette pour ches crêpes dans l'Bulletîn d'Quart d'An d'L'Assembliée d'Jèrriais du r'nouvé d'1957, tch'est dans l'preunmié voleunme. La mémouaithe dé ches bouannes crêpes mé fait l'ieau v'nîn à la bouoche, car jé l's aimaient bein et j'tais tréjous content quand Manman en faîsait.
Lé tout temps pâssé nou mangeait du sînm'né dans l'Carême, et l'preunmié Dînmanche du Carême, aut'fais appelé "Le Dînmanche des Brandons," les jannes gens, filles et garcons, avaient amors dé mett' lé feu à eune grand fouée pour danser à l'entou. En finnissant, il' alleunmaient des bûtchets d'êtrain ou des brandons (un brandon était eune torche dé glyi et d'rôsinne) pour jouarder atout et les fliantchi en l'air en allant siez ieux. I' couothaient à travèrs des clios en chantant “Taupes et mulots, sortez d'nouos clios ou j'vouos brûle les os!”
Lé Vendrédi Saint 'tait aut'fais lé jour pour jeuner. Ch'est acouo en jour dé jeun d'nouos jours – comme l'Églyise nouos l'ordonne – sénon qu'la grand partie des gens n'obéissent pus les ordonnances dé La Litourgie. I' faut dithe qu'un tas d'nouos anchêtres né jeunnaient pon ni n'tout chu jour-là, à mains tch'i' pensaient qué l'paîsson tait pèrmîns, car il' allaient au rotchi ès baînis. Ayant baînitchi et pêquoté autrément, pus tard nou tchuithait les baînis sus les lieux (en d'ssus du pliein) et nou les mangeait auve d'la gâche à fouée. Ch'est assez întérêssant qué quand j'tais mousse j'allions tréjous à La Grève dé Lé lé Vendrédi Saint, Papa et mé, mais la couôteunme dé baînitchi en même temps avait appathemment dispathu d'vant 1900.
Pour Pâques, nou mangeait du sînm'né, des fliottes et des mèrvelles. Et nou mangeait d's oeufs étout, mais ch'tait d's oeufs d'poule, pon d'chocolat comme à ch't heu. Eune aut' vielle couôteunme lé lundi d'Pâques 'tait d'aller au Vièr Châté à Gouôrray, car ch'tait là l'seul jour qué l'publyi pouvait y'aller en visite. Les gens d''l'Êst, sustout, y'allaient en masse. Ayant visité l'châté même, les gens sé m'ttaient à jouer des jeux en d'houors sus La Boul'lie. Un prédicateu, Maît' Pierre Vautchi, bein connu dans san temps, y prêchait un sèrmon touos l's ans pour bein d's années.
Y'avait un grand chouaix d'couôteunmes à siéthe pour La Saint Jean. Ieune était d'faithe du milk-é-pan'tch. Les jannes gens, sustout, lus l'vaient d'bouân matîn auprès mînniet du 23 d'juîn et allaient traithe eune vaque ou deux, à la dêrobe, siez les vaîsîns. Et pis i' s'estchivaient ès poulaillèrs pour des oeufs. Et il' allaient lus couochi, et pus tard dans la journée il' ajouôtaient du rhonme et d'la muscade ou cannelle au lait, et v'là tchi faîsait l'milk-é-pan'tch et i' s'en régalaient lus tchoeu content.
Eune aut' couôteunme était la cheinne dé cachi les mauvais esprits d'vant solé couochant lé jour dé La St. Jean. Nou cônait, déhors, dans eune corne d'St Jean, tch'était eune corne d'boeu, ou meme dans eune v'lique (ou coharne). Tout un vaîsinné sé m'ttait à côner en meme temps, et ch'tait un tîntamârre dé dgiâtre tch'était suppose d'cachi les mauvais esprits.
Et pour La Saint Miché, ou mé d'mandez? Eh bein, j'fus né à La Saint Miché d'mil huit chent nénant'tch'ieune. Pour mé, ch'fus un êvènement pus important qu'autcheune couôteunme, et j'm'arrête-la!
George d'La Forge
Biblyiographie: Les Bulletîns d'Quart d'An d'L'Assembliée d'Jèrriais.
Viyiz étout: