J'avons trais manniéthes dé nommer l'Vendrédi d'la Saint Sémaine. J'pouvons dithe qué ch'est l'Vendrédi Saint ou l'Vendrédi B'nêt ou l'Vendrédi Bénit. S'lon un diton "Au Vendrédi Bénit nou mange du lait bouoilli".
Pouortchi du lait bouoilli? Eh bein ch'tait nécessaithe coumme d'amors dé traithe les vaques mais nou n'pouvait pon vendre lé lait l'Vendrédi B'nêt. Les fliottes ch'est un fricot tchi d'mande un tas d'lait et don ch'est conv'nabl'ye d'en mangi à grandes bollées chu jour-là. Nou fait eune farche épis nou bouort des tchul'lées d'farche dans du lait bouoillant. Ch'n'est pon tout l'monde tch'aiment les fliottes, tout coumme. Pouor les iuns, ch'est un goût d'l'êfanche quand Manman soulait graie des fliottes pouor la fanmil'ye et ch'est un goût assôcié auve Pâques. Mais pouor d's aut's ch'est d'tchi malaûc'theux, dé tchi qu'nou 'tait oblyigi d'mangi et d'tchi bein piéthe qué d's oeux d'Pâques en chocolat!
Eune aut' chose qué nou soulait mangi tout spécialement l'Vendrédi B'nêt, ch'tait du paîsson. Un fricot d'paîsson, ou ofûche des baînis, 'tait l'beinv'nu quand nou n'tait pon s'pôsé d'mangi d'la viande. Et nou mangeait des gâches à fouée sus la grève.
Les baînis, sans doute, n'sont pon des paîssons, mais i' sembl'ye qué tout chein tchi veindrait d'la mé 'tait mangi au run d'la viande. Don nou pouôrrait mangi des manchots, des vliques, des hîtres, des vanieaux et tout chein tch'est bouon d'la bâsse-ieau ou d'souos l'ieau. Et bein seux y'en a tch'aiment d'la crabe, êpinnotchi eune pihangne, ou mangi du honmard. Les chèrvettes, en salade ou à la broche, sont populaithes, et nou peut en acater des poutchies g'lées au supèrmarchi. La mouothue s'tchie éthait 'té mangie coumme du paîsson prêsèrvé au temps pâssé, mais au jour d'aniet j'avons des tinnées d'paîsson dans l'supèrmarchi: du saumon, du thon, du maqu'thé, des sardinnes et tout chenna.
Y'a eune aut' manniéthe dé prêsèrver l'paîsson et ch'est dé l'piclier. Un fricot qu'nou mange sustout en Ûrope est des rouôlots picliés d'héthan (des "rollmops"), N'en v'chîn eune èrchette:
Îngrédgeins:
Viyiz étout: