Trenton, Michigan,
USA.
Lé 29 dé novembre, 1977.
Moussieu l'Rédacteu,
Y'avait un mais hièr dépis qué j'tchittis Jèrri pour èrvènîn en Améthique. I' m'sembl'ye qué ch'est un an à la pliaiche d'un mais, et j'attends dêjà fête dé m'en r'aller otchuper l'vièr Mènage à St. Ouën. J'mé d'mande tch'est tchi s'est pâssé dans l'Île natale duthant chu mais dé m'n absence. J'ai-t'i' acouo pèrdu tchique vièr anmîn? Touos l's ans, quand j'arrive dans l'Île, j'trouve tch'i' y'en a d'mains à m'attendre. Hêlas! Ch'est la vie. Nou sait bein que l'trèpas est cèrtain pour tous.
Duthant l'mais tchi veint dé s'pâsser, j'n'ai pon d'nouvelles dé Jèrri. Iun d'ches jours j'dév'thais r'chèver au mains deux, p't-êt' trais, gâzettes. Il' ont eune mauvaise habitude d'arriver à Dgi-l'adèrt, ieune ou deux à la fais et tréjous un mais ou pus en r'tard. Lé sèrvice des postes est supposé êt' amendé et en rapport auve la vitesse dé la vie modèrne, mais ch'est l'contraithe. Il empièthe à m'suthe qué l'temps va.
Ch'n'est pourtant pon manque dé sou. Lé couôtage des timbres renchiéthe deux ou trais fais par an. Eune lettre tchi couôtait deux cents à mett' à la poste quand j'vîns en Améthique en couôte treize à ch't heu, et ieune tchi couôtait chîn cents pour env'yer en Jèrri d'nouos jours en couôte trente-tch'ieune. Et ouaithe qu' un avion fait la travèrsée d'l'Atlantique aîsiement dans dgiex heuthes, la lettre prend eune sémaine à êt' délivrée à domicile. À m'n idée, ch'est l'comport des sŷndicats tch'en est la cause.
Combein longtemps qué l'gouvèrnément en Angliétèrre s'en va pèrmett' ès sŷndicats d'accâblier l'pays par des grèves dé toutes les sortes? J'viyais dans les gâzettes ichîn qué ch'est les brigades pour combattre lé feu tchi sont en grève à ch't heu. I' faut qu' un gouvèrnément sait fo dé pèrmett' des louais donnant l'drouait d'grève ès brigades et aut' sèrvices nécessaithes pour lé maintchein d'la vie d'sa populâtion. Ch'est încriyabl'ye qué telles conditions peuvent exister dans eune êpoque si êcliaithie comme la nouôtre!
Quand j'ai distchuté d's affaithes dè même auve divèrs pèrsonnages ichîn, i' m'dîsent qué ch'est la démocratie d'nouos jours tch'est responsabl'ye. Mais i' y'a tellement dé difféthentes opinnions au sujet d'la démocratie qué nou n'sait pon d'en par iou s'en t'nîn.
Quand j'tais en France dreinement, j'vis eune articl'ye d'fond dans eune gâzette tch'en donne eune mangnifique întèrprétâtion d'la démocratie, comme j'la connaîssons en Amèthique. La v'chîn: La démocratie pèrmet à des gens dé difféthentes opinnions dé vevre côte à côte en rélative harmonie - à condition qu' châtchun respecte un cèrtain montant d'accord dé s'laîssi gouvèrner par la mâjorité et les règl'yes adoptées d'accord dé partie. Mais pour les extrêmistes, prêssis d'faithe lus idées en gângni et, tch'ètant mînnoritaithes, n'ont autcheune chance dé rêussi par les mouoyens normals, la violence lus pathaît êt' lé seul mouoyen d'rêussi.
Quand j'liu ch'là, j'pensis qué ch'tait la miyeuthe întèrprétâtion d'la démocratie qué j'avais veu d'en par ichîn, mais quand j'dis qu' oulle est d'adoption officielle en Amèthique, v'la tchi n'veurt pon dithe qué j'n'avons pon d'extrêmistes étout. J'sommes assujettis ès violences étout quand i' n'peuvent pon rêussi à en gângni par les mouoyens normals.
Ch'n'est pon ravissant qu' les nécessités d'la vie continnuent à renchiéthi quand tout l'monde veurt travailli mains d'heuthes mais gângni pus en même temps. Il est grand temps qué l'ouvriyi apprange qué san bein-être dépend du bein-être dé san maître étout. En pâlant d'renchiéthe, quand j'tais en Jèrri, j'criyais qué ch'tait p't-êt' à cause dé s'n isolement dans La Manche et l'fait tch'i' faut transporter la grand' partie d'ses vivres en mé ou par air dé l'Angliétèrre qué tout 'tait si chi dans les boutiques, mais ch'est probabliément eune maladie tch'est partout l'monde. Tout renchiéthe ichîn et au Cannada étout. Est-ch' ravissant quand nou s'rend compte qu'ichîn en Amèthique l'ouvriyi est payi quâsi autant à rein n'faithe comme en travas quand il est mîns bas, et qué même les grévistes èrchèvent compensâtion ès frais du contribuabl'ye duthant lus grèves. Né v'là d'la démocratie d'nouos jours!
George d'La Forge
Viyiz étout: