'Tu m'disais y'a tchique temps' s'fit l'Ph'lip Desclios l'aut' jour, que quand tu 'tais à Singapour ty n't'accordais pas trop avec nos militaithes là-bas. Coumment qu'v'la tchi s'arrivit ?'
'En principe,' j'lis dis, 'j'n'ai rein countre les militaithes et d'habitude j'm'accorde bein avec ieux. Mais dans mon temps la Grande Brétagne 'tait membre du traité militaithe de l'Asie du Sud, et Singapour 'tait couôsu d'nos Amiraux, Généraux et Marêchaux d'l'Air, et ch'tait partie d'ma tâche de les garder dans lus pièche, pas qu'i's'coumportaient mal - bein au countraithe - i' 'taient tous hoummes des pus respectables, mais y'en avait tchiques euns tchi sembliaient penser que c'tait ieux qui gouvernaient Singapour, et j'eus à lus faithe à saver que y'avait là eun gouvernément civil et îndependent, qu' Singapour ne nos appartenait pus et qu'nos militaithes 'taient là seulement par l'accord du gouvernément civil là-bas.
Y'avait surtout eun Coummandant en Chef qui, quand i' veint m'payi sa visite officielle, me dit brusquément que j'prenais pus d'garde au souai-disant gouvernément d'Singapour qu'a li, qui 'tait vraiment l'Gouverneux. Tu pâles, mon Ph'lip, que j'l'engeulis!'
'J'sais bein' s'fit Ph'lip, 'que quand i' faut rabattre les gens tu sais coumment t'y prendre, mais quandmême ché n'd'vait pas être trop pliaisant d'aver à engeuler eun militaithe de son rang. Coumment qu'i'print ch'na?'
'Ah, mon garçoun' j'lis dis, 't'éthais deu vaie le pèvre lis mounter au nez! I'm'atchusît d'l'aver insulté. Mais j'lis dis de n'pas êt' si bête, que ch'tait me, coumme Haut Coummissaire, qui 'tait chef de touas les Britanniques à Singapour, civils ou militaithes, et qu'si i' countinuait a's'coumporter coumme eun idiot j'm'en allais faithe de sorte à Loundres qu'i' fûsse mînt à la porte et dêmissiounné.
I's'en fut en grand'colèthe, mais quand i'veint à y penser il ercounnaissit que je n'tais pas à m'vanter, et i'n me dounnit pus d'embarras.
Même quand les militaithes voulaient faithe tchique chose qu'éthait peu embêter les gens d'Singapour, par exemplye érmouer partie d'lus forches d'eun empièchement à eun autre, qu'éthait dêpliachi l'traffi' poui la pûspart d'eun jour, i' m' téléphonait me d'mander permissioun, et si je n'savais pas si v'là t'ch'était embarrassé les locaux chu jour là, j'allais vaie Lee Kuan Yew, le Preumi Ministre, li d'mander si ch'tait counv'nablye ou si ils avaient tchique chose de spécial chu jour-là, par exemplye l'arrivée ou l'dêpart d'eun visiteur important, et qu'i'm'disait qu'en effet ch'n'tait, pas counv'nablye pour ieux, j'disais au Coummandant en Chef de changi l'jour de son projet, et d'pis chu temps-là i'n'arrangeait rein sans me d'mander d'avanche.
Et le v'là, mon Ph'lip, chu grand chef militaire qu'avait c'menchi coumme men ennemin d'veint men amîn, et j'nos accordaimes coumme deux clioches'.
'J'sais bein,' s'fit l'Ph'lip, 'que t'as tréjous ieu la tête duthe, mais je m'doute si tchiqu'eun d'aut' dans ta positioun éthait peu traiter les grands militaithes coumme tu l'fis.'
'Bah, bah', j'lis dis, 'ch'tait ma tâche et j'la fis. Si nou'prend ses gages i' faut faithe son d'vé. Ch'tait pour faithe mon d'vé que j'tais payi'.
'Eh bein', dit Ph'lip en se l'vant, 'i' faut qu'j'aille faithe mon d'vé étout, mais heureusement j'n'ai pas à engeuler eun Coummandant en Chef.'
Y'a des gens qu'ount la vie en rose.
Viyiz étout: