La Science a fait tant d'progrès toutes ches années ilo que nou n'sait pas ouest qu'tout chenna s'en va nos m'ner.
L'aviation a atteint un dégrèt de perfection, j'avons touos les jours une démonstration des merveilles de la télégraphie sans fil, nou peut acheteu envier des photographies par télégraphe, et nous est sus l'point de perfectionner la télévision, ch'est-à-dithe qu'i' s'en va être pôssiblye de pâler à du monde à n'importe tchi distance et d'les vaie en même temps.
Mais je n'sais pas si chennechin aitha de si grands avantages comme nou craithait bain.
I'm'semblye mé, que nou peut quâsiment prédithe toutes sortes d'contretemps et d'complications.
Prenons comme exemplye, le cas d'un jeune homme qu'est pour bain en dithe, engagi à une jeune fille, mais qui n'a pas oquo obtenu le consentement du bouonhomme.
Jusqu'ichin s'il 'tait un mio êffrité, et qu'i' voulait prendre ses précautions et rester ouest que l'pèthe de la fille ne pouvait pas l'aveindre avec sa botte, i' communitchait avec le vyi par téléphone, mais à l'avenin chenna n'li servitha pas d'grand chose sustout si l'bouonhomme n'en est pas trop d'avis, car, avec sa fache si près d'la sienne, che s'sa bain difficile pour le pouore garçon de s'exprimer convenablyement.
Si jamais nou fait la bêtise d' amalgamer la télévision avec le téléphone, i' n'y aitha pas moyen de condithe autchunes affaithes commerciales par chu système-là devant deux ou trais heuthes de l'arlevée, sustout quand i' n'y aitha qu'des femmes à la maison qu'ous aithez appelé.
Ouest qu' est la femme ou fille qui s'en va ristchi de dêpendre le "receiver" devant qu'sa fache es'sait poudrée, et quand ou sait que ses "permanent waves" sont toutes apliaties sus l'haut d'sa tête?
Le rêsultat de tout chenna es'sa qu'une partie des téléphones de l'île es-sont à rain-n'faithe toute la matinée, et pis i' y aitha congestion duthant le restant du jour.
Les lignes es'sont engagies et i' faudra attendre une démieuthe pour san tour.
Et vous, jeunes "lady-clerks," avous pensé que, jusqu' à chein qu' ou séyiz accouôtumées ès possibilités de la télévision, v'chin ch'qu'i' pouorrait tchiquefais s'arriver?
Etant empliées dans une office tchelconque, ou' ouithez la clioche du téléphone sonner, et oubliant que la personne de l'autre but du wiyeur pouvait vaie le d'dans d'votre office, ou prendrethiez le "receiver" à votre main en disant "Hellô?"
Ou sethiez raîponnue par un cri d'surprinse et une vouaix scandalisée vos d'man'dant "Tch'est qu'ous êtes à faithe sus les g'noux de m'n homme?"
La vouaix d'la femme du patron, sapresti!
Ou verrez don que souos de patheilles circonstances nou pouôrrait tout-à-fait bain se passer d'la télévision.
Oquo un autre exemplye.
Madame Sidi-Coquelin, la femme du Député, attend des visiteurs.
Ou téléphone à san bouochi.
"Est-che vous Mess Breûtchèt?"
"Oui Madame."
"Eh bain, enviez-mé tout d'suite quatre livres d'sau-"
On s'en allait dithe "sauciches," mais au même instant, grâce à la télévision, oulle a aperchu le garçon du bouochi qu'à happé un malheutheux tchan qu'a entré dans la boutique, et qui l'à fliantchi dans la machine à sauciches!
"Oh! j'ai changi d'idée," Madame s'écrie, "Enviez-me des côtelettes de mouton!"
V'là don, mes chiers amins, tchiqu'unes des raisons pourtchi qu'i' n'est pas trêjous sage de pousser la science trop liain.
N'encouothageons pas la télévision.
G. W. de C.
1928
Viyiz étout: