Les assises de chute semaine me font rassouvné d'la bordée que j'fut du juri. J'vo pâslé d'y'a eunne trentaine d'années au mains: ch'tait d'vant qu'j'eusse oquo fait la bêtise d'mé mathié; j'tais oquo pas sus man compte chu temps là, et ch'tait l'èstet après que j'fut r'venu d'passé djix-huit mais à la côte pour les Messieux Collas a la Pointe Saint Pierre, forgi des grappins d'berge et d'la fethaille pour lus navithe qu'etait sus les choutchets auprès du run a Ned Packwood - le Warrior, j'cré me r'souv'né, de tchi chu pamphèque de Hutchet fut Captaine, et fallyi nos couôrre au plien l'année en r'venant sus les Iles Madleines.
R'venu d'la Côte ov mes trente deux louis d'gages, j'mé d'menti d'm'èsprouvé a travâillyi la terre ov l'aide d'eunne grosse brétounne pour faithe le d'dans et coutchi, et un valet pour me montré coumment fermé.
J'apprînmes touos les très a fermé pour très ans; v'la tchi m'couôti pus d'chent louis, sans conté les vingt-chinq que l'Counnétabye me consilluit de dounné a la servante pour s'en r'allé en France soigni sa tumeur. S'ou n'tait pon allée dithe d'un bond et d'l'autre qu'ou comptait m'mathié! Oquo au jour d'anniét j'peux l'vé la main d'vant la Cour que je n'sis pon d'chutte sorte la.
Mais j'avais idée d'vos pâslé d'la bordée que j'fut d's'assises. Ch'tait l'année qu'Betté Pliapi èsmaglyi la tete a s'n'houmme, sam Ernon, ov eune tchullyi-a-pot - a bon d'vous s'en r'souvaindront?
A dithe vrai, ch'tait un triste èsmânus qu'Sam. V'la tchi 'té p'tit, et maigre, et èsbliavé; v'la qu'avait les gambes teurques, les hanques dèstchilbouétchies, et les pids chen d'vant-drièthe; v'la qui n'avait pon g'veux ni ouisqueurs, un nez couleu d'betterave, et des jaunes madelles de hèche dans la bouoche. Mais tout d'même, ch'tait a peine la eunne raison pour y'èstruêullé san p'tit chérvé ov eune tchullyi-a-pot. D'autant pus qu'oul touônait autou san p'tit dé, s'n'houmme. Ch'tait "Sam, va ichin: va là: apporte mé la chaudièthe: va estendre le linge: scrobbe la tchuisine:" et - "tu 'as l'air lassé! Va t'couochi" - quand v'nait huit heuthes et qué j'm'en tais v'nu pour joué a la djèrre-dès-rouées - eune gamme de cartes a deux si difficille qu'un trèzieme dans l'appartement vos disteurbe.
Mais d'jantre! Quand vint la gamme des tchulliers-a-pot, la police s'en mèle. Et ch'fut d'même que nou m'mint du juri pour jugi eune femme sièz tchi j'avais bu des cannées d'cidre caud (ov d'la canelle râpée et eunne fielle de louothi) l'hivé de d'vant.
Heutheusement oul en rèscappi! L'Avocat prouvi a la Cour qu'la tète a Sam 'tait si souppye que l'paids d'la tchullyi seulment pouait faithe eunne brèque dedans, et qu'en tout cas l'chérvé n'tait pon d'grand valeu. Et pis, coumme y lus dit: Ch'tait sa faute! Si Sam avait 'té d'hors, dans les terres, ou offuche a tchillyi du cresson pour le marchi, ou transplianté des fèves, y n'ethait pon 'té souôs la tchullyi justement quand Missis Ernon s'n'allait èsmaglyi eunne môque oveu! Et pis, qui dit, la perte n'est pon forte! et qu'y'avait mème un houmme dans l'juri qu'etait prèt a couôrre sa chance et mathié Betté dans l'couothant d'un mais, et y'aîdji a remboursé l's'obligations qu'Sam avait emprunté sus l'menage.
Quand il eut fini d'pâslé, et qu'le Protchuleux eut èsprouvé a faithe craithe qu'Sam etait r'gretté d'ses paraissiens, la Cour dit qu'oul en avait ouï assez; et l'Juri s'en fut dans l'appartement pour dèslibéthé. Y s'adounnait que j'tais, "foreman" du Juri, et j'prins la pathole pour dithe: Tchès qu'ous en cryis, bouonnes gens? Pour de mé, j'sis d'avis que - souôs les cirsonstances, et considéthant qu'Sam 'té un triste objet et qu'il est achteu ben a l'abri et hors de la vaie, autant "leeve ouelle élone" - J'sis pour "non-coupabye!" Et, qué j'dis, l'sien qu'est d'opinion contraithe étha affaithe a mé! que j'dis, en otant ma casaque et r'troussant mes manches.
Y s'fit un grand silence dans l'appartement; et y'en eut deux qui voulites qu'menchi a ardjumenté. Mais quand j'leus eu capuchi la tête, y'un après l'autre, contre le coin d'laie-du-foyi (j'tais fort coumme un capestre dans chès temps là) et mint man poing souos l'nés d's'autres; j'fumes touos d'accord et unanimes. J'tais un mio èssoufflié en rentrant en Cour, et y m'fallut dithe "non coupabye" deux fais d'vant que l'Baillyi ouïsse. Il eut l'ait un mio surprins, et hauchi l's'èspaules en disant a Betté d'avé a dèscampé d'la Cour au pus tôt.
Piteur Pain
Viyiz étout: