Moussieu l'Editeu,
J'ai fini mes patates, avec l'aide de man fils, lé Bram, et j'ai fait si bein que j'n'ai autchune peux àch'teu dé vaie lé Sergent dé Justice entrer dans man bel. J'avais idée d'en garder une vingtaine dé pèrques pour s'menche mais, auprès tout, quand nou-s a un fils ch'est tréjous prêt à vos vendre chein tchi vos faut à crédit, en espéthance qué nou lé r'paietha tchique jour, pourtchi s'géner?
Etant pour la preunmié fais pour des années en pouchette après la saison, la Merrienne dit qué j'dév'thaimes prendre des vacances, et hier au sé ou suggéthit que j'ithaimes en Djernézi pour tchinze jours. 'J'ai tchiques pathens la' ou s'fit 'epis eune vielle couôsine, du bord dé ma mèthe, tchi d'meuthe au Tortéva. Y'a d's années qué j'n'l'ai pas veue et sans doute ou s'sait bein contente d'une visite.'
'J'ai tréjous ouï' j'li dis 'qué n'y'a ni homme ni femme dans l'district du Tortéva tchi n'a pas la tête cratchie. Mais j'n'm'en vais pas dischuter chenna. Lé fait est qué j'n'ithai pas en Djernézi et qu'si tu'y vais ché s'sa toute seul.'
'Ch'est drôle, Ph'lip' ou s'fit, 'qué tu n'as jamais aimé les Djernésiais.'
'Ch'n'est pas drôle du tout' j'li dis. 'Un bouon Jèrriais n'a jamais aimé les Djernésiais.'
'Mais pourtchi?' ou d'mandit. 'Ch'n'est pas raisonablye. Auprès tout jé v'nons tout d'la même raichine.'
'J'n'ai jamais creu chenna' j'li dis 'et jamais j'n'lé craithai. Les gens des deux iles sont tout-à-fait difféthents. Lûs vaques, les laies bêtes, sont difféthentes, et en Djernézi ch'est partout des sérres et des fichus tomates. La Royale est Jèrriaise et n'peut pas craitre en Djernézi, et tchiquefais nou peut marchi des milles sans trouver une seule auberge. Au dinmanche i'sont toutes freunmées et un Jèrriais tch'a l'malheur de s'trouver là peut crever d'sé. Epis tu voudrais m'dithe qué ch't'ile-là est civilisée!'
La Merrienne vit bein qu'ou n'gâgnait rein d'continuer et ou changi d'sujet, voulant saver si j'liut dans la 'Post' des têrriblyes conditions à la Prison.
'Si nou peut craithe lé Sieur Baal' ou dit 'n'y'a pas d'run pour touos ches malfaiteurs tchi sont là et i'faudra bétôt bâti une neuve prison. Chenna m'êtonne grandement, car lé Sénateur J.J. avait dit qué les membres de la Police Salariée n'taient qué d's amateurs, et n'savaient pas comment faithe lûs djobbe.'
J'li dis qué l'Senateur dév'thait saver que la grande mâjorité des prisonniers sont arrétés, en preunmié lieu, par la police Salariée.
'I faut admettre qué ch'est un drôle dé moussieu' ou dit. 'Par exemplye, as-tu ouï tch'i n'est pas trop seux de sé r'porter candidat au mais d'novembre? Ch'est la Liza tchi m'disait chenna ch't'arlevée. Accordant à lyi i's'en va abandonner la politique et s'mettre à étudier raide pour pâsser pour Avocat.'
'Nous a ouï chenna pûs d'une fais' j'li dis 'mais chutte fais ch'est p't'êt'e vrai. Ch'n'est pas un mousse, tu sais Merrienne et s'il a réellement idée d'êt'e Avocat, il est grand temps tchi s'mette en travas. Dans m'n idée i'f'thait un raide bouon Avocat et s'il avait c'menchi y'a même une djaizaine d'années, il éthait, sans autchune doute, une bouonne pratique anniet. Mais quand l'temps vint i'print l'mauvais détou.'
'Ch'n'est pas l'preunmié tch'a fait chenna,' ou dit 'mais êcoute, Ph'lip, tchèsqu'i's'en va s'arriver à la Prison?' Absolûment, ch'n'est pas vrai tch'i's'en vont mêler les hommes avec les femmes?'
'Ch'n'est pas hardi probablye' j'li dis 'car si ch'tait d'même y'éthait pûs d'malfacteurs qué jamais. Touos ches reintchivâles qu'nou trouve dans la Colom'thie au sé s'm'tt'raient à capuchi des policemans et i'trouv'thaient d'la compagnie à lûs goût dans la prison et pûs tard i'faudrait pûs d'bers et pûs d'noces au Crèche. Ch'est une chose bein sérieuse, Merrienne, et j'm'êtonne pas qué l'Sieur Baal né peut pas dormi d'nièt. J'n'ai qu'une suggestion à faithe, et ch'est d'envier tout chu peltas-là en Djernézi.'
'Tu'en fais une riselée, Ph'lip' ou dit 'et à t'n âge tu dév'thais aver pûs d'avis. Mets-té dans la position de chu pouôrre Président, car il est hardi à pliandre.'
'P't-êt'e bein, ma vielle,' j'li dis 'mais n'oublie pas tch'i' n'fut pas forchi de s'mettre candidat pour l's Etats, et, étant là, i'faut tch'i faiche autchunne djobbe tchi s'présente. Quant à mé, autchun homme tchi veur êt'e membre dé l'Assembliée au jour d'anniet dév'thait aver sa tête examinée par un vétêrinaithe. Auvec chenna, nou n'voudrait pas dithe que n'y a pas d'bouonnes gens dans la chambre au moment , mais y'en a trop d'l'autre sorte. Chein qué j'voudrais saver, mé, ch'est chèsque nos Indépendants sont en faisant ches jours. Nou n'en entend pas grand'chose et j'n'crais pas qu'ch'est un bouon signe, mais nou n'voudrait pas craithe tch'i c'menchement déjà à lûs découothagi.'
'J'n'en s'sais pas êtonnée sûs un sens' ou dit 'mais i'sont p't'êt'e comme les taupes, tchi travaillent souos têrre. La Liza, tchi sait tout et pûs qu'tout, et tch'invente quand ou n'sait rein, est ocquo seuze que j'vêrrons un mio d'rémuage dans la praisse, et que l'Mâjeur, pour iun, est seux d'êt'e oppôsé.'
'Et tchèsqu'i' s'en va l'oppôser?'
'Ou n'sait pas ocquo, mais ou pâsle ocquo dé Percy L'Mâsuthi, ou, s'i' n'veur pas, dé yun d'nos Chent'nyis. Quand tu vêrras l'Mâjeur, tu dév'thais l'mettre sûs ses gardes.'
'Et' j'li dis ' quand tu vêrras la Liza, tu dév'thais li dithe dé taithe sa becque. Tu m'dithas p't-êt'e que ch'est la djobbe à s'n homme, mais lé pouôre Bram pouôrrait aussi bein tâchi d'empéchi la mé d'monter. J'i'sais bein mé, car j'avais êprouvé pour un temps, mais j'fus forchi d'abandonner l'affaithe.'
La Merrienne n'aimait pas chenna, Moussieu, et ou m'donnit un sale r'gard et p't-êt'e qué j'l'méthitais car, après tout , si la Providence n'avait pas donné d'langue ès femmes, i'n'pouôrraient pas s'en faithe servi, et i'faut admettre qu'une vie avec une femme tchi n'pouvait pas dithe un mot ne s'sait pas bein agréablye. La seule chose est que la langue n'éthait pas deu êt'e fabritchie si longue!
PH'LIP
11/6/1960
Viyiz étout: