Moussieu l'Editeu,
Hier au sé, la Merrienne se mint à pâslé de chein qu'oulle app'lait les drôles de jugéments dérnièthement du Juge Vouaisin à la P'tite Cour.
"Nou n'dév'thait pas crititchi d'vant savé tout," ou qu'menchi, "et j'adméts tout-d'suite que Moussieu Vouaisin est dans une bein miyeu position qu'mé pour jugi les faits, mais, avec chonna, y m'semble que, dans l'cas du garçon tch'avait volé pûs d'séptante louis, et tch'avait muchi les sous, la punition tch'il attrapit n'tait pas hardi raisonnablye. Y n'eut ni amende, ni prîson, mais tout simplyement une promêsse de l'atchûsé de s'comporté pour deux ans. Ayant r'chu la promêsse, le Juge le mint en libérté. Tchèsque tu crais d'chonna, man Ph'lip?"
"Chein qu'j'en crais," j'l'y dit, "ch'est que si ch'avait tait le Juge Syvret la cause éthait tait enviée d'vant la Grande Cour, ou bein le jeune homme en éthait yeu pour une bouonne pôse en bouaite. A ma veue, y peut s'conté hardi chanceux."
"Pûs chanceux," j'continuit, "que l'homme tch'avait friponné un autre de dgais ch'lins. La cage pour l'y, et étout pour le pouôre imbécile tch'avait tait trouvé dans la Colomb'thie par un policeman, tch'y l'print à la station souos suspicion d'avé voulu fichi san camp dans un môteur tchi tait le long d'la route. Y dit au Juge tch'y tait tant souos l'influence de la boisson dans l'temps tch'y n'savait pas tchès qu'y faisait, et qu'pûs qu'chonna, tch'y n'avait pas jamais cachi un môteur, mais Moussieu Vouaisin n'voulit pas l'êcouté et y'en fichit pliein ses brais, et même pûs. Y'a une chose, Merrienne, et ch'est que j'espèthe que je n'me trouv'thais jamais d'vant l'Juge Vouaisin, car je doute l'Juge Vouaisin, car je doute hardi tch'il éthait grand réspect pour un Principa d'Pâraisse tch'avait une fais tait prèsque êlus Seurveillant."
"Bein seux, y faudra qu'tu t'mêfie," ou dit, "et pour le temps au mains tu f'thas mûs d'n'allé pas en ville, car tu pouôrrais avé du brit avec yun d'chais policemans que tu n'aime pas pûs qu'mé. Mais ach'teu, Ph'lip, peux-tu m'dithe pourtchi qu'tu n'fut pas chouaisi comme Voyeu à la Vîsite Royale? Tu'en n'tais yun y'a siez ans, et ch'n'est pas un biau compliement tch'y t'ont pyéyi chutte fais."
"Nan, Merrienne," j'l'y dit, "et j'voudrais en savé pûs long. Ch'n'est pas l'âge, car y'en avait là de pûs viers que mé. Bein seux, ch'tait des gens d'importance. Même notre Député fut invité, et pourtant ch'n'est pas un Saint-Ouennais comme é, tch'a vêtchu dans la pâraisse toute sa vie, et élevé une famille au Portinfé. Ch's'y bein à-même d'envié une Remontance au Jim Le Bro. J'ai tréjous voté pour un Bro, mais la préchaine fais je chang'geait ma câsaque. Malheutheusement, y n'y'a pas grand prospect d'une êlection, quand l'térme d'une êlection, quand l'érme au Jim finitha, mais nous a veu d'bein drôles de chose à Saint-Ou d'vant agniet, et nou pouôrrait ocquo en vais yunne l'année tchi veint."
"Ne t'y fie pas, man Ph'lip," ou dit, "car de nos jours personne ne veur la djobbe. Ach'teu j'veins d'lièthe tchèsque le Cyril Le Mérquand et l'Sieur Krichefski ont dit au sujet d'la prospéthité d'l'Ile. Si ch'est vrai, et nou n'peut pas bein en douté, l's'Etats éthont tant d'sous à la fin d'l'année tch'y n'séthont pas tchi en faithe."
"Tandis qu'j'éthons là des membres comme les John Le Mérquand, le Sénateur Krichefski, et l'Député Farley, ma vieille," j'l'y dit, "y n'y'étha jamais trop d'monnaie dans l'côffre-fort, mais chein que j'peux dithe ch'est que l'pouôre Ph'lip du Portinfé n'est pas parmi les férmiers tch'ont yeu une si belle saison. Va d'mandé au gérant d'ma banque, à man marchand et à plusieurs autres si ma position financière est d'natuthe pour rêjoui le coeur de l'homme,"
"J'n'ai pas besoin de d'mandé à pèrsonne," ou dit: "Tu m'avais promint une neuve robe, et tu t'en allais accaté un neu' toppeur; tu'avais même suggéthé que j'pouôrrions allé en Djérnezi pour une semaine ou deux, mais j'n'ai ocquo veu rain d'chonna."
"Ch'tait d'vant les courses," j'l'y dit. "J'éthais fait mûs de prendre t'n'avis et d'resté siez-mé. Pas yunne des quédolles tch'y portaient mes sous gâgnit, et je r'vint pas avec ma pouchétte pliene mais sans un sou. Sais-tu bein, bouonnefemme, j's'y v'nu à craithe que l'homme tch'y s'fie sûs les bidéts dév'thait avé un tchuthateu."
"Ch'est chein qu'j'ai tréjous creu," ou dit, "mais quand veindra l'année tchi veint tu voudras ocquo t'en allé ès Tchenvais. Mais, dis-mé, Ph'lip, ouèsqu'tu t'en fut hier matin après dêjeuné. Tu fut hors une bouonne pose."
"Vèthe," j'l'y dit. "J'm'en fut pour vais les tomates au Vaux-d'la-Mathe, et j'trouvit le Jack A'Court, tch'y m'print à vais les boeux tch'il a pour le show d'l'Ile."
"Et vis-tu tchiquechose de bé?"
"Damme oui," j'l'y dit, "épis hardi bé. Tu vêrras l'jour du show."
Ph'lip
Les Chroniques de Jersey 8/8/1959
Viyiz étout: