Un transport dé Justice
L'Sieur Caouain a pus d'imagination que d'p'tits boudins dans sa caboche car touot chein qui vos a raconté à l'entouor de mé et d'une tâche de soigni des tonmates est autant de menteries, touot couomme ses d'vis dans l'temps iou qui m'faisait la carre car d'belles proumesses y n'mantchi pon d'faithe et mé j'm'laissi happer à ses dithes pouor l'grand malheur d'ma vie.
***
Mé, chein que j'ai à vos raconter est la pure, pleine et entièthe vérithèt.
Lundi, j'tais à voltigi dans la paraisse au Captain qui n'a jamais été en mer car j'sais bein qui s'en va y aver une forte élection pouor chantgniers dans chutte paraisse et d'pis tchique temps j'sis ès écoutes de chu bord de Jerri.
Quant vint un temps, j'vit trais ou quatre taxis a monter du bord du Bel Royal. J'criyais que ch'tait des neuches mais nennin car quant les motors ieurent finit lus sabbat de teuf-teuf et que l'ponsi ieut l'temps de r'tchès dans la route j'vit une djingue de gens lus en aller à travers un clios de navets!
Couomme il avait fait hardi de bliaze dans la matinée et que la terre et les feuilles de navets d'vaient être encouore mouillis j'pensi à mé même n'v'la des gens qui s'en vont aver les pids mouillis et ch'est assez pouor lus douonner l'influenza. Tchès qu'en penserait l'médicin de l'hôpita ou l'sien du Couomitté sanitaire.
Un gars qui est un miot farceur de sa sorte et qui était à épier à travers les épines d'une haie faisait des r'merques sus touos ces gens. N'v'la Billy et Phlip. Le pouorre Tom et George James auront de tchi faithe à les suivre. Si George attrappe une suaie d'fraid tchès qu'en s'ra du at home siez lyi pouor les mousses du docteur Barnardo. L'sien qui d'vise à Sam est Herbert qui fut ieun des milleurs titheurs en Jerri.
Quant vint un temps, un homme apporti une etchèlle. Ch'n'tait pon pouor un steeple-chase car chutte etchèlle etait pouor permettre à nos gens d'escalader la banque du fossé bé seur et pas ieunne banque iou qu'nou va porter des sous ou en déshaller.
Touot chunna était si drôle qu'au risque d'être tithé j'm'approchi pouor ver chein que chunna voulait dithe et drièthe le wire-netting haut de six pids au moins j'aperchu couomme dans une cage du zoo…… touos les Messieurs de la Cour!!
Fouai de Marie Hibou, je criyais que ch'tait un coup de solé qui m'avait douonné la berlue mais nennin, ch'tait bein touos les Messieurs qu'nous vais en robe rouoge ou nièthe dans la Cohue.
D'l'autre bord du wire netting, il y avait éttout ieun autre de ces messieurs, l'sien qui habite une Chaumièthe dans l's'enivrons et qui était v'nu à pid de sièz ly.
Y fallut attendre qu'nous ait abattu le wire-netting pouor que nos gens aillent erjoindre les siens qui étaient dans l'autre clios.
Si vous n'voulez pon m'craithe, vous n'avez qu'à lièthe la gazette de Mercredi passé iou qu'il est dit que Lundi au matin il y eut transport de justice au Bel Royal et l'affaithe s'passi couomme j'vos l'dis.
J'm'd'mande pourtchi que nous fit ces Messieurs passer à travers chu champ de navets au risque d'une suée d'fraid vu la mouilliture ou d'lus douonner des frédeuses aux pids. Ch'tait assez pouor que touos les présidents de Couomittés qui dirigent les affaithes de Jerri soient au lièt en même temps et touos souos les soins des docteus.
P't'être que ch'tait par crainte de la clameur de Harro qu'nous les obligi à se mouilli les pids d'même.
En touot cas ch'n'est pon d'tchi faithe et les siens condamnés aux frais d'vraient payi èttout les frais de docteu, si frais d'médecine y eut opprès aver été exposé d'même à une suaie de fraid et a aver les pids mouillis!
***
J'sais bein que les siens d'man biau cliochi s'attendent à ce que j'lus raconte chein que j'sais sus l'élection mantchie pouor chantgniers dans chutte paraisse mais faute d'run n'v'la qui sera pouor une autre fais. Samedi tchi vint j'espèthe si j'sis encourore de chu monde de misèthe.
Caouain
21/7/1923
Viyiz étout: