A M. l'Éditeu d'La Chronique
Man chier Couosin,
J'voudrais bein savé qu'est que ch'est qu'tout chu tinné et d'vis,
Et tout chu galimatias de Cour et de plaidedie
Au sujet d'ches Messieux et de lus belle chassesie?
I paraît qui veulent ôté les droits seigneuriaoux ès Seigneurs et à la Raine;
Ah! man doux, ch'est bein du brit!
Mais veurs-tu m'faire le plaisi de m'dire si ch'est vrai ch'qui nou dit
Que l'fils du Président de l'assemblaie du D'vin s'en va Samedi qui veint faire un spiche à la Cour?
Ah! si ch'est vrai, je n'y manquerai pas chu jour,
Car che s'ra d'qui véritablement curieux
De oui chu be'd'la goule ove Moussieu l'Procureux.
Mais j'plains bein l'pouore vi, jamais i n'éra ieu une bataille pareille,
Je li consillelais de s'mettre du coton dans les ouoreilles.
La Cour devrait, en humanitai, s'en mêlé, je cré,
Car le pouore vi, che s'ra assaiz pour li touoné les sens et vous l'tué.
I parait qu l'avocat des chasseurs dé dire des choses extrêmement curieuses; il a fait san spiche déjà diex fais d'vant san mireux et a tout mins sur papi;
Ah! j'irai, si j'n'ai pas l'oppression ou les rhoumatis, bein certainement j'irai l'ouï,
Car che s'ra d'qui bé que del vais se donné les teurs
De chu grand orateur
Que ses gens disent qu'il imite si bein; commesche déjà qu'il avait nom?
Ah! m'y v'la; i d'vise,
Ainchin qui disent,
Comme chu grand avocat d'aoutrefais, Moussieu Ciceron.
Ch'est-en-qui, tu prendras soin de mes patins et de man parapluie,
Et tu éras, man chier, les remercîmens de
Ta vieille couosine
Jeanne Marie
Chronique de Jersey 27/11/1861
Viyiz étout: