San Antonio,
Lé 17 dé févri, 1979.
Texas, USA
J'ai ieu la chance chutte sémaine. Deux gâzettes èrchues d'Jèrri, les cheinnes du 14 et 21 dé dézembre. Ou pouvez vouos înmaginner ma surprînse en liêsant, en grandes lettres majuscules sus la preunmié page dé la cheinne du 14, tch'i' y'avait ieu un aut' meurtre en Jèrri, et pis l'choc d'en r'vaie un deuxième en ouvrant la gâzette.
Des meurtres en Jèrri! Ch'est quâsi încriyabl'ye. Quand j'tais mousse j'ouiyais pâler du meurtre d'eune femme nommée Le Brun meurtriyie dans eune maison à La Frontchiéthe (jé n'sai pon si La Frontchiéthe est sus St. Brélade ou St. Pièrre). Ch'tait eune histouaithe du temps pâssé tch'intérêssait les jannes viyant qué l'crînme dé meurtre 'tait si rare. Et pis dans man janne temps i' y'en eut iun en 1907. Un Bréton nomme Connan tch'était v'nu pour la dêfouithie d'patates eut la mal chance d'assauter l'homme d'eune femme (des Brétons étout) auve tchi tch'il 'tait dév'nu fanmilyi. En disputant, Connan tapit l'aut' pouorre dgiâtre sus la tête atout eune pièrre tchi li vînt souos la main en s'app'yant l'long du fossé. La pièrre crévit la cranne dé l'autre et il en mouothit.
Connan fut condamné à mort par la Cour Rouoyale et fut pendu dans la prison trais s'maines auprès. J'm'èrsouveins du moment solonnel dé la condamnâtion à mort dans la Cour Rouoyale. Ch'tait Messire William Henry Venables Vernon, un moussieu d'belle et dîngne présence, tch'était Bailli. Il avait eune supèrbe vouaix et i' mînt eune manniéthe dé nièr bonnet ou mouoché sus sa tête dévant la prononcer.
Connan 'n'tait pon mathié. Il avait l'air pûtôt sîmpliot et innoffensif. L's autorités fidrent v'nîn, sa pouôrre bouannefemme dé méthe dé Brétangne pour lé vaie d'vant sa pendaison. J'n'oubliethai janmais l'matin tch'i' fut pendu. Ch'tait à huit heuthes et j'tais en train d'prendre lé train à La Mouaie pour m'en aller en ville à l'office dé Moussieu Charles Ouoyamme Binet, et j'm'èrsouveins qué tout l'monde dêhalait sa montre pour vaie l'coup d'huit heuthes, car nou savait qué ch'tait l'heuthe du trépas pour li. La pendaison avait un air dé tragédie pour les Jèrriais. Ch'tait si rare dans chu temps-là qu' un crinme si séthieux se passîsse dans l'Ile.
I' n'y'en eut pon un aut' pour chînquante-trais ans, lé préchain ayant lieu en 1960. Mais i'y'a ieu gentiment d'meurtres dépis tch'éthaient gardé l'pendard otchupé si la peine dé prison à vie n'avait pon rempliaichi la peine dé mort en Angliétèrre. Né v'la chein que l'progrès et la cartchaison d'êtrangièrs nouos ont apporté en Jèrri auve lé pàssage du temps dépis qué j'tais mousse.
Quâsi tout l'restant d'la gàzette du 14 dé dézembre est dévoué a l'apèrchu d's Etats pour 1979. Un apèrchu formidabl'ye! I' faut féliciter l'Sénateu Cyril Le Mèrquand acouo eune fais et i' faut féliciter l's électeurs dé l'Ile étout pour aver ieu l'avis dé l'rê-êlithe poue un aut' terme à la dreine êlection.
Quant à mé, j'n'ai pon assez d'expéthience dans la comptabilité pour prétendre pouver analiser un apèrchu d'même. Il est si fôrmidabl'ye qué j'mé d'mande comment qu' les membres d's Etats peuvent l'êtudier assez dans trais s'maines pour pouver accepter et autoriser toutes ches dêpenses sans les tchestchionner et distchuter, ieune à la fais, d'vant voter pour ou contre. La seule chose qué j'y vai cliai est qu'la "Sécurité Sociale", la Santé Publyique et l'Educâtion sont à couôter des forteunes au publyi d'l'Ile, et j'sis du même avis d'Messire Robert Mathet et du Sieur Stanley La Ruez qué tchiquechose dév'thait êt' fait pour arrêter l'agrandissernent d'la populâtion d'l'Ile dépis qué l'înmigrâtion continnuelle veurt dithe qué touos les départéments d'gouvèrnément augmentent pour y suffithe, et tch'i' faut tréjous trouver ou bâti des maîsons pour louogi les nouvieaux v'nus. Ch'n'est-i'-pon assez d'aver quâsi siex mille empliyés d's Etats sus l'co, et tch'i' faut vînt-sept millions d'louis pour les payi - j'allais dithe touos l's ans - mais l'affaithe augmente d'année en année, et j'vai qu' les "techniciens" d's Etats èrfusent 11.6 pour chent dé hauchissement d'lus gages. Ch'est honteux, et nou créthait qué l'Sieur René Liron, un homme dé s'n intelligence, éthait pus d'avis qué d'les souot'nîn dans lus gourmandise!
Et j'vai tch'i' y'a tchestchion d'bâti acouo deux grands garages à êtages pour stâtionner les motos en ville. Ch'est seux qué v'la tchi couôt'tait acouo un aut' million d'louis ou pus. Est-ch' qué ch'né s'sait pon pus aîsi et mains couôteux d'lînmiter l'nombre d'motos dans l'Ile au taux du nombre d'à ch't heu? Ou est-ch' p't-êt' eune solution tch'est trop sîmpl'ye pour l'adopter?
Viyiz étout: