Moussieu l'Editeu,
Hier matin, après dêjeuné, la Merrienne m'enviyit souos la tchérquethie à scié du bouais pour des choutchets.
"Y'a d'la né tchi veint," ou s'fit, "et d'la g'lée, et y faut s'prépathé en temps. Dans p'tit d'temps tout s'sa bianc, et nous étha une djobbe à s'gardé caud. Demain tu pourras t'méttre dans l'solyi avec des ballots d'êtrain pour protégi tes patates."
"Bon," j'l'y dit, "épis après?"
"Je n'sais pas pour le moment," ou dit, "mais tu'en as assez pour te gardé otchupé pour au mains un couplye d'jours, et j'te trouv'thai tchique chose d'autre à faithe pûs tard."
"Je n'en doute pas," j'l'y dit, "mais à qu'menchi tchèsqu'y t'a dit que l'temps s'en va changi?"
"Pèrsonne," ou raiponnit, "mais je l'sens dans m's'os, épis les p'tits ouaisiaux veinnent de pûs en pûs touos les matins pour les miéttes que j'lûs donne par la f'nêtre. A sept heuthes à-matin y'avait une p'tite rouogegorge dans la tchuîsine même. Je n'sais pas par iou qu'oulle avait entré mais ou tait affamée. Ach'teu va-t'en qu'menchi t'en travas, et scie-m'en une bouonne pile devant dîné.
Et don, Moussieu, j'm'y mint, mais après dîné y fallait r'quémenchi, et j'vos asseuthe que quand, après l'tais j'me mint dans ma grand'tchaise, ma pipe allumée et mes slippers ès pids, j'tais un homme tch'avait grand besoin de r'pos, et j'éspethais qu'la Merrienne me laiss'sait trantchille.
Mais nouffé, car à peine avais-je hallé une demié-doûzaine de fais sûs ma pipe qu'ou qu'menche à m'tchéstchonné.
"Dis-mé, Ph'lip," ou d'mandit, "tu'as tait membre du jury ès Assise Criminelles pûs d'une fais; te r'souveins-tu d'la bordée que pour trais séthées d'siéte tu ne r'vint pas couochi?"
"Damme, oui," j'l'y dit, "y'a bein d's'années d'chonna, mais j'n'ai pas ocquo oublié chein qu'tu m'dis quand à la fin je r'vint, comme si ch'avait tait ma faute. Ma dans chu temps-là Merrienne, y'avait un mio d'pliaisi à être membre du jury."
"J'm'en doutais dans l'temps," ou s'fit, "car par ta mine nou pouvait vais qu'tu n'avais pas souffert."
"Pour dithe la véthité, nan," j'l'y dit. "J'admets que ch'tait péniblye asséz d'être assis pour des heuthes de temps sûs chais bancs sans couossins, mais quand v'nait une heuthe ou d'même nou s'n'allait à un hôtel avec le Vicomte pour un raide bouon dîné; dans les quatre heuthes et d'mie, nous avait un bouon tais, épis à la fin du jour, ocquo à l'hôtel, pour un excéllent dîné. Après chonna nou pouvait avé une gamme de nap, ou de don, avec tchiques raffraichissements, et quand v'nait l'heuthe nou ramontait à s'couochi. L'préchain mâtin, après un raide dêjeuné, nou r'prenait l'qu'min pour la Cour."
"Et tchèsqu'y péyait pour tout chonna?"
"Ch'tait la Couronne, sans doute, ou du mains ch'est tréjous chein qu'j'ai comprint, mais bein seux que ch'n'tait pas nous."
La Merrienne dit qu'ou n'avait pas d'peine à craithe chonna, mais ou d'mandit comment qu'un homme se trouvait sûs l'jury, et j'y'éxplitchit que touos l's'ans chaque Connêtablye d'vait envié au Gréffe une liste des hommes dans sa pâraisse capablyes d'sérvi. "Il est vrai," j'ajouotit, " qué dans ches listes y s'trouve tchiquefais les noms d'hommes qu'ont tait souos les mérgots pour des années, mais autchune pérsonne peut s'trompé."
"Mais, d'nos jours," Merrienne," j'ajouotit, "tout est changi, car au sé les membres du jury peuvent allé siez-yeux à condition tch'y n'disent pas un mot de chein tchi s'est pâssé, même à lûs femmes."
La Merrienne bouffit d'rithe. "Et," ou d'mandit, "y'a-t'y des gens bêtes assez pour craithe que les femmes ne séthont pas tout d'vant allé lûs couochi?"
Et vraiement, Moussieu, je n'savais pas tchi l'y raipondre."
Ph'lip
Viyiz étout: