Les Pages Jèrriaises

Au Voleux!


Où'est don' qu'tu t'tcheins, fichu voleux,
Qu'persounne n'né vait rein d'té?
Es-tu muchi dans un gros creux
Ou driéthe tchic pathé?

Dêhalle-té don', boustré-d'voleux.
Es-tu laid? Es-tu bé?
Laisses nous vaie la couleu d'tes gh'veux,
Lé p'tit but d'tan musé!

Dé-d'pis longtemps, malin voleux,
Tu nos tcheins en suspens!
Et pus l'temps va, pus - j'en sis seux -
Je nos touannons les sens!

Nos femmes ach'teuthe - ah vièr voleux! -
N'veulent pus sortir au ser
Et par-dedans, i' trembl'yent d'peux
Reinqu'dé t'appréhender!

Et toutes les n'yits, crais-mé, voleux,
L'tchan est si ênervé,
Qui bracte et heurle et ouasse pour deux
Jusqu'à ce que l'jour s'sait fait!

Touos nos Chantgnièrs, vilain voleux,
N'savent pus coumment t'cherchi;
Et les policemen, pour dé yeux,
Ont honte dé lus mêtchi!

La pouorre police, affreux voleux,
En est toute sus ses ner's,
Y'a jusqu'à même le Protchuleux
Qui r'veint, tout couothant d'Sercq!

Ah! laisse-té pinchi; dis, voleux,
Va t'rendre à la Station.
S'tu continues, tchic nièt, bein seux,
Tu'attrap'thas un trait d'pliomb!

N'ya qu'es gazettes, failli voleux!
Qu'tu sèrs occouoth' un mio.
I' rempl'yisse' une colonne ou deux
Dès qu'tu fais l'moindre dro!

Elie
 
Nouvelle Chronique de Jersey 29/10/1910

 

 

Viyiz étout:

 

Les Pages Jèrriaises