" Eh bein! V'la tchi'i' l'sèrt bein! I' n'avait pon qu'faithe dé s'motchi d'la Police!" Missis Larbalestchi nouos disait l'aut' sé.
"Tchêqu'i' s'est motchi d'la Police?" j'li d'mandis :
"Bon! ou' n'avez pon ouî les nouvelles?" ou' nouos dit : "Ch'est l'janne Aaron B'lin! I' pathait qu'eune bande dé gâs 'taient à baithe dans l'aubèrge et qu'iun d'ieux dit à un autre que sa hardelle l'avait tchitté viyant tch'il avait les gambes vèrques et l'nez crotchi! I' n'taient pas pliens, mais i' pathait tch'il' en avaient assez à bord pour s'entr'chicangni, et qué l'gâs tchi 'tait supposé aver l'nez crotchi dit à l'autre qué s'i' n'taisait pas sa bec i' s'en allait li crotchi l'sien et lî êcauffer l's ouothelles en mème temps étou! Ou' savez bein qu'i' n'l'y'a pon pus bête qué d's hommes en bouaisson, et l'affaithe touannit saloppe. Dans un clyîn d'yi les deux bachoirds 'taient à lus entr'capuchi!"
"Mais, l'janne B'lîn, 'tait-i' à s'quétilli étou?" j'lî d'mandis. :
"Nannîn!" ou' m'rêponnit : "Si tu'as la pâcienche d'ècouter, j'm'en vais t'conter l'histouaithe. Quand l'aubèrgiste vit l'sang voler, il env'yit san mousse qu'si l'Offici du Connêtablye Amice Le Chèr. Mess Le Chèr a veu hardi d'béthe viyant tch'i' d'meuthe quâsi à côté d'l'aubèrge, et il a assez d'avis d'saver qu'un homme tch'a bu n'est pas dans ses bouans sens. I' sait bein, étou, qué s'i' fait un ivrouangne aller en prison, ch'est sa pouorre femme et ses mousses qu'en subithent la conséquence, - ch'est en- tchi, quand il est app'lé, a mains qu'i' n'l'y' ait tchitchuns d'assomés, i' lus dit d'sen aller siez ieux trantchill'ment, et ch'est tout finne. Il a mème 'té connu d'aver lié san j'va et d'aver r'porté un homme siez li dans san quèrre quand il 'tait trop êbédé pour marchi tout seu! Mais, pour ervénin à not' histouaithe : I' ramâssit san Bâton d'Justice dé d'dans l'titheux du drécheux, ioù qu'sa femme lé garde dans eune bouaite erdoubliée de v'lours, et i' l'mins dans sa pouchette dé grand'câsaque et s'en allit à l'aubèrge en disant à sa femme qu'i' s'sait ervenu dans dgiex munutes. "
"Aaron B'lîn, tch'est la bête au dgiablye, 'tait assis sus eune scabelle tout prés d'la porte quand l'Offici entrit dans l'aubèrge. Aaron n'bait rein pus fort que d'la limonade, mais i' s'pliait à passer ses séthées à bailli d'sa bec parmi l's'autres. En entrant, l'Offici l'Chèr sé mâtit d'but à côté d'la scabelle à Aaron, ses mains dans ses pouchettes de braies. Aaron vit sa pouchette de grand' câsaque grande ouverte à côté d'san nez. En passant par la boutique, il avait acaté eune livre de sausiches pour sa m'mée, et i' mîns ieune des sausiches dans chutte pouchette-là et dêhallit l'Bâton d'Justice et l'mins tout d'suite dans sa pouchette!"
"Mess Le Chèr né pouvait pon s'faithe ouî, et i' mins sa main dans sa pouchette de grand' câsaque pour dêhaller san bâton d'justice et lus montrer tch'il 'tait d'la Police. Quand i' l'vit la main, ch'tait eune sausiche qu'i' l'vit en l'air! Les garçons s'êgouffîtent à rithe, et la bass'taure arrêtit! Mess Le Chèr 'tait mârri pour la preunmyié fais dans sa vie. I' vit l'patchet d'sausiches dans la main à Aaron B'lîn et s'appèrchut tout d'suite tchêqu'i' lî'avait joué eune farce. I' lî d'mandit d'lî r'donner san Bâton d'Justice et né v'là qu'Aaron fit sa mèprinse. Il êprouvit à empêchi Mess Le Chèr de fouilli dans ses pouchettes en faisant la minne qué ch'tait pas li qu'avait l'Bâton, et i' s'en va ét' présenté d'vant l'Juge Dorey pour aver rêsisté à l'autorité d'la Police!"
Viyiz étout: