La s'maine passé je vos pâli des dêfouisseurs qu'étaient à lus r'poser dans la Faithe-à-Bêtes à attendre pour être embauchés par les fermiers.
Eh bain i' pathaît qu'i' y en a qu'ont trouvé de l'empliai car chute semaine i' y en avait iun à dêfoui des patates heûthives du côté du Vau-d'la-Mathe siez Herbert.
J'étais à voltigi parmi l'geon dans l'haut d'un côté à cherchi des mulots, quand j'avisi un fliotchet d'monde dans un clios. Je vis bain qu'i' s'agissait de tchiquechose interêssant alors je m'appréchi un mio pus près pour vaie tch'est qu'i' pouvait y aver en allant.
Ch'tait Gordie et san pépée qu'étaient à êprouver lus tchéthue à Dêfoui dans les patates à Herbert, et naturellement i' y avait une "crowd" de fermiers à vaie comment qu'chenna s'travaillait. A qu'menchi ch'tait Gordie qui cachait et tout l'monde voulait vaie de tout près pour li-même comment que l'affaithe fonctionnait alors ou pouvez bain penser que y en eut d'la pilvâquethie partout sus les patates.
La machine n'était pas du tout ênervée de vaie tant d'monde à crititchi san travas mais ou suivait son qu'min le long d'la raie et vos êloquetait les vignes d'patates comme nou dit "Numétho iun."
Quand vint un temps, Gordie qui n'a jamais 'tai un grand ramasseux de ch'vaux, ne cachait pas au goût de san pepée, alors le bouonhomme se mint à condithe la jument mais je n'pus pas appréchi assez près pour m'asseûther si ch'est qu'i' s'y griyait mus que l'garçon.
Quant à l'efficacité de ces machines-là, je n'prétends pas être ingénieur mé, mais pour en dithe la véthité, i' m'pathaissent faithe lus travas comme i'-faut.
Sans doute ch'est comme d'habitude châque tête châque opinion, et i' y a des fermiers qui trouvent qu'i' n'voudraient pas les mettre dans lus patates, tandis que bain d'autres sont d'opinion qu'une bouanne machine vaut mus qu'un mauvais Breton.
Enfin, garçons, allez les vaie travaillyi pour vous-mêmes. Les agents ieux, ne d'mandent pas mus que d'boutchi vos ordres, et dans un jour ou deux ou z-avez une dêfouisseuse entre les mains.
Un grand nombre de mes lecteurs voudraient saver, comme i' y a des machines de plusieurs faichons sus l'marchi, latchelle qu'est la miyeuthe.
Pour le moment je n'sis pas dans une position de les renseigni. Ch'est une chose qu'aithait peu s'arrangi pourtant. Si les agents avaient 'tai un p'tit pus "wide-awake," i' s'saient v'nus m'trouver et m'aithaient dit, "Caouain, combain qu'tu veurs pour nos "boomer" nos dêfouaisseuses dans ta gâzette"?
"Ecoute ichin! Si ch'est qu'tu veurs nouos donner un bouan "notice" dans tes colonnes, et démontrer, comme tu sais l'faithe, ès fermiers de Jêrri, les grands avantages qu'ils aithaient en accatant châtchun iune de nos "Snatcher and Peelem's Potato Eradicator," je pouorrethions arrangi avec la 'Firm' de t'payi une "lump sum" quand l'article pathaîtrait et une jolie commission sus chaque tchéthue vendue dans l'île."
V'là don garçons chein qu'nou z-aithait creu qu'éthait 'tait fait par des agents qui lus comptent "up-to-date," mais nennin, jusqu'acheteu, au moment que j'êcris ches lignes ichin, pas iun d'entre ieux n'a ieu l'heutheuse inspithation d'arrange un "interview" avec mé à chu sujet-là.
Ch'est pourtchi qu'i' lus pôquent!
Viyiz étout: