Moussieu, - Je n'sais pas tchesqu'est chu individu là qu'a signi son nom à une lettre comme “St. Ouënais”, mais ch'n'est bein seux pas un vrai Gris Ventre. I' m'pathaitrait pustôt aver l'air d'eune objet qu'a une grise ligne avau l'mitan du dos. I' pretend que l' “J.J.” a print hardi d'embarras pour s'asseuther que touos les craisseurs d'patates qu'ont pus d'eune vrégie éthont l'drouait de voter dans l'scrutin sus le “Potato Marketing Board”, et j'vos demande, pourtchi pas? Est-che que ch'n'est pas qu'juste qu'les siens qu'ont des patates en terre pouor la premiée fais n'aient pas l'drouait d'voter?
Dans autchun cas, i' n'éthait pas deu y'avait besoin de “J.J.” a forchi l'Comité d'Agritchultuthe à l'faithe, car s'ils avaient fait lus travas comme i' faut, i' l'éthaient fait de yeax-même; en effet, il éthaient deu saver mus.
Heutheusement que j'avons un homme comme “J.J.” parmi nous pouor nos aidgi à combattre contre les siens tchi sont à éprouver à nos contrôler sus touos les sens, et y'a pas d'doute que ches gens là sont bein marris à “J.J.” et font rein que d'li envier des insultes, mais, heutheusement, “J.J.” n'est pas fait d'papyi-machi, et en effet nou se d'mande, dans des temps, s'i' fut né du tout ou s'i' n'fut pas coper hort du granit du Vièr Châté d'Grosnez.
Lé “J.J.” s'est battu pour éprouver à défendre touos nous Jèrriais, et ch'est bein facile d'vaie, principalement à ch'teu' qu'i' n'est pas dans l'a Etats, où'est qu'j'allons.
Nos n'peut pas batti un failli “shed”, ni louer un betchet d'terre, sans permission. Tant pus que l'temps va tant pièthe que ch'est tant pus d'dépense et tant pus d'contrôle, mais j'crais que chutte fais les fermiers de Jèrri ont réaliser qu'i' n'veulent pas être m'nés par le nez et qu'i' votront solidement contre le “Board”, et peut-être que la qu'apprendra une leçon ès siens tchi sont si en faveur du contrôle.
Au sujet du p'tit djialogue à Jack et Frank, je n'crais pas que la qu'étha grande influence sus les fermiers. En effet, j'tais à écouter à deux jeunes cotchets à la ferme d'volaille la préchaine porte de siez nous à chinq heuthes à matin et j'crais qu'i' faisait mus qu'chonna.
Mes complyiments, Moussieu,
A. Mallet
La Davisonn'nie,
St. Sauveur
le 26 d'Mars, 1963
Evening Post 27/3/1963
Viyiz étout: