Trenton, Michigan,
U.S.A.
Lé 27 d'avri, 1968
Moussieu l'Rédacteu,
Nou-s-est supposés d'mangi bein mus ichîn en Améthique qué dans d'aut' pays - à l'exception p't êt' du Cannada, tch'est à côté d'nous et partie d'l'Améthique du Nord. J'ai quand-mème eune idée qu'ch'est comme dans bein d'aut' pays: Les riches mangent à gogo et les pauvres enhannent! I' n'dév'thait pon y'en aver dans un pays comme ch'tî'chîn, des pauvres, mais i' s'y'en trouve tout d'mème un tas. Et si j'mangeons si bein ch'est assez drôle qu'un tas d'nouos jannes hommes né peuvent pon passer l'docteu quand i' sont conscriptés pour êt' soudards!
Quant à mé, jé n'peux pon oublier les bouannes choses qué nou mangeait quand j'tais mousse siez papa et manman à La Forge, à St. Ouën. À c'menchi, j'n'ai janmais mangi d'si bouanne soupe ichîn, ou dans autchun aut' pays, comme en Jèrri! I' n'y a pon eune femme souos l'touannement du solé tchi peut battre eune Jèrriaise à faithe eune raide bouanne bollée d'soupe dé caboche. Comme j'lé dîsais y'a tchiques années dans eune articl'ye tchi fut publyiyée dans iun des bulletîns d'L'Assembliée d'Jèrriais, l's êtrangièrs ont bieau êprouver, et mett' les mèmes choses dans lus soupe, mais i' n'peuvent pon arriver à la faithe si bouanne. Ch'est p't êt' viyant qu'les lédgeunmes d'aut' pays n'valent pon les cheinnes dé Jèrri, ou bein est-ch' la manniéthe qué la Jèrriaise lave chaque mio d'caboche et d'lédgeunme et mêlange tout ch'la ensembl'ye auve lé soin fidèle qu'oulle a héthité d'ses anchètres? Tch'est tchi sait, ou' dit p't êt' eune priéthe en mème temps, ou p't êt' qu'ou dêcompte tchiquechose pour êffrité les mauvais esprits tchi gâtent les bouans goûts, ou p't êt' qu'oulle ajouôte eune carpéleuse quartélée pour délicatesse dé goût? Et pourtchi pon? Quand nou-s-y pense, la carpéleuse mange d'la caboche et en a probabliément l'goût! Mais, badinnage à part, bailliz un os d'viande ou un gobîn d'lard, et du pèrsi et du thŷmbre, du pouothé, d'la caboche et d'aut' lédgeunmes à eune femme êl'vée sus eune ferme en Jèrri et ou' s'en va vouos faithe eune soupe tch'est suprème dans l'monde entchi comme goût et, tchi f'thait l'rêve des gourmets d'l'univèrs s'i' avaient la chance d'en gouôter!
Mais ch'n'est pon seulement d'la soupe dé caboche. Manman faîsait d'la soupe dé pais étout, et d'pânnais et d'cârottes et d'patates. Et pis, i' n'faut pon oublier la soupe d'andgulle! L'ieau m'veint dans la bouche quand j'pense à toutes ches bouannes soupes-là!
Comme j'vouos l'ai probabliément dit d'vant, papa allait à La Faithe en ville acater un p'tit couochon touos l's ans, et il 'tait êl'vé siez nous à La Forge et finissait dans l'saleux. Lé lard salé 'tait sus la tabl'ye toutes l'année sénon pour tchique spéciale occâsion qu'manman éthait 'té en ville acater un mio d'viande. Les lédgeunmes 'taient fraîches. I' v'naient du clios en driéthe dé La Forge. Et nou-s-allait à L'Êta qu'si d'la pèrche-pièrre pour mettre au picl'ye, et y'en avait tréjous sus la tabl'ye.
J'm'èrsouveins qué quand p'pèe et m'mèe lus en fûdrent à La Côte en 1901 i' nouos env'yîdrent un bathi d'mouothue salée, et du capelain. Manman rôtissait la mouothue sus un grêle quand l'feu dans l'grais 'tait rouoge, et nou viyait l'sé bouoillonner en d'ssus d'la mouothue à m'suthe qu'ou cauffait. Et pis nou mangeait ch'la auve du pain et du beurre. Ch'tait d'tchi bouan, man bouanhomme! Et l'capelain rôti étout! Lé lanchon, stchi et rôti, avait à bein près l'mème goût, et nou-s-en avait des fricots étout.
Nou faîsait sèrvi l'grêle souvent dans chu temps-là. Un aut' fricot qu'nou mangeait 'tait d'l'andgulle séque. Manman en copait des bédaches qu'ou' salait et m'ttait à stchi. Grêlée sus un bouan rouoge feu, oulle 'tait délicieuse à mangi auve eune beurrée. Et nou grêlait des châtaines et des fèves. Et pis i' n'faut pon oublier les baînis et les vlicots. Nou-s-en avait d'bouans fricots, et ch'tait tréjous eune fête pour nous, mousses, d'aller ès baînis à L'Êta auve Papa ou iun d'nouos oncl'yes. M'n oncl'ye Adolphus l's aimait crus, et ch'tait tchiquechose dé l'vaie l's êcovi au rotchi et les grugi d'mème!
I' faut avouer, étout, tch'i' n'y a pon un aut' pays au monde où'est qu'les patates sont aussi bouannes comme en Jèrri. Si l's Améthitchains allaient-là pour gouôter les nouvelles patates, il' êprouvethaient à acater l'Île!
Un aut' fricot qu'manman nouos faîsait 'tait des pais embeurrés. I' n'y a pon miyeu! Et ou' nouos faîsait eune pilotinne dé temps en temps - des pânnais, des patates et du beurre tout mêlé ensembl'ye. Ch'est vrai que j'n'étions pon riches, mais l'mangi n'mantchait pon sus la tabl'ye!
Quant à mé, i' m'sembl'ye qué j'n'ai janmais mangi d'si bouans fricots, en Améthique ou ailleurs, comme quand j'tais mousse en Jèrri, et j'sis r'connaîssant d'aver ieu l'privilège et la chance dé les r'trouver souvent sus la tabl'ye à La Brétchette dans mes vièrs jours, grâce à Madanme Kathleen Le Maistre, tchi s'èrconnaît à graie les r'pas du bouan vièr temps!
George d'La Forge
Viyiz étout: