Lé Caouain va au lanchon
Touos l's ans dans l'meis d'Octobre, i m'veint un envie d'avé un p'tit fricot d'lanchon, mais ch'est bein drôle que parmi touos mes anmins qu'y vont presque toutes les mathées, i' n'y en a pas iun qu'aithait la compliaisance d'en apporté un quart de chent à ma niche dans l'Vier Marchi.
Je sait bein que ch'n'est pas par avarice que je sis négligi comme chenna, ch'est seulement car ou mantchiz d'y pensé.
Eh bein, l'aoutre jour, je dis à mé-même: Caouain, puisque l'lanchon ne veint pas à té, ch'est à té d'allé au lanchon; alors l'aoute Lundi me v'là parti pour la Rocque, avec un p'tit pannyi que Marie Hibou avait dêcrocheté de dans la boutique à George Louothains, pensu attouo du co.
J'arrivi siez Mary Jane longtemps d'vant qu'i fusse temps de d'valé sus les sablions, et en r'gardant du bord de la mé, je m'aperchu qui y-avait une couleur qui fliottait du haout du mât à la tou de l'Avathîson. Je d'mandi tch'est que ch'la voulait dithe, et nou m'dit: Ch'est qu'y a des mêssieux qui sont à resté là pour deustrais jours.
Des mêssieux! j'dis; tchi sorte de mêssieux?
Nou n'voulait pas me les nommé, mais j'dêcouvri tout d'même. Ch'tait d's ouaisiaux que j'counais tout à fait bein, mé, mais je n'ose pas quâsi vos les noummé dans chès colonnes ichin, i' suffitha de dithe qu'y en avait quatre: Henri, Jack, Douard et l'bouanhomme John, de manièthes de viers matelots qu'ont abandonné la mé oprès y-avé ramassé unne fortunne, et pis y-avait ettou un craîsseux d'toumates, et un aoutre individu qui n'est ni une chose ni l'aoutre.
Quand je réalisit tchi sorte d'crew qu'était à se r'nardé là, je m'mins à faithe des réflexions, et j'dis à mé-même: Caouain, si tu veurs te distindji, l'évchin unne chance pour té, tu peux gâgni unne jolie rêcompense si tu veurs, et té faithe unne belle ernommée pour avé servi tan pays. Va-t-en averti le Directeur des Impôts et erveint ichin chute nièt. Ch'est saeux qu'i s'en va y-avé des p'tits bathis d'amenés à terre à saissé.
Je r'vithi d'bord, avec ch't'intention là, et pis je pensi à mé-même: Oquo au but d'tout, pourtchi que tu te f'thais de maouvais anmins? Tou chenna ne te r'garde pas, tu n'paie pas d'impôt, té, ch'est pourtchi tait ta bec et va-t-en lanchonné. Y-a des officièrs de péyis pour souogni de tout chenna, ch'est pourtchi laisse-les faithe lus travaux ieux-mêmes.
* * * *
Le lanchon! Bah! ch'n'est rain du tout. J'en ai ieu man tchoeu content chute feis. Nou z-a biau gratté et gratté, tout ch'que nou vais, ch'est des êcailles de bêni et des cruques de chuchettes, mais quant à du lanchon, ch'est rare qu'il en sorte iun, et pis si nou n'est pas assez prompt pour le gaffé, i' se r'pique dans gravi comme un êpar de feu. L'aoute jour, je sis saeux que j'en grifouillyi pus d'vingt perques pour en avé unne douzainne. A qu'menchi je m'servais d'mes griffes mais quand vint un temps je fus obligi d'abandonné, car ils 'taient usées jusqu'au vif et je souffrais des tortuthes.
Oprès chenna, j'êprouvi avec un p'tit crotchèt que j'avais faithe faithe à l'exprès, mais v'là qui n'duthi pas longtemps, i' me l'vi unne poulette dans la patte qu'était grosse comme iun d's oeux à Marie Hibou, alors je fut forchi de tchitté dans par où.
Je m'jutchi sus un rotchi à r'gardé l's aoutres travaillyi et je m'aperchu que ch'tait les
maouves qu'en gliunnaient l'pus et ch'tait amusant de les ouï rithe châque feis qu'il en avalaient iun.
Je dis à mé-même: Caouain, la maouve est pus habile que té à happé du lanchon, tu-as la bec trop ronde té. Châtchun à san mêtchi, man garçon, ch'est pourtchi erva-t-en dans les terres tu s'sas pus à t'n aise à dêchiqueté un mulot!
* * *
J'ai ouï que iun des garçons qu'étaient à la pêque chu jour-là voulait s'en r'allé siez li bein vite pour pâtchi des
toumates, et i' laissi san pannyi à la cherge de iun d'ses vaîsins. l'y-avait dans l'pannyi daeux pots d'lanchon, unne bouanne pathe de bottes et unne pathe de caouches. Le vaîsin laissi l'pannyi sus la mîelle tandi qu'il entri siez Mary Jane pour vaie si ch'est qu'ou vendait d'la ginger-beer et quand i' r'sorti, i' n'pensait pas pus au pannyi que l'homme de d'dans la lunne et i' montit dans sa vainne et s'en fut siez-li.
Dans l'entretemps, le maufait pannyi se trouvi parmi les ballots à unne aoutre djaingue de dans iune des pâraisses du Ouest et fut chergi dans lus vainne par m'êprinse. Quand l'propriétaithe de la vainne vint siez-li, i' s'aperchut que chute pêque-là ne li appartenait pas, mais i' n'savait pas tch'est que ch'tait.
I' print d's informations et à la fin, i' trouvit un homme qui r'connaissait la merque sus l'crotchèt.
I' n'y-avait pas moyien de renvié l'pannyi à
Grouville chu jour-là et pis quand même, le lanchon éthait tai gâté, ch'est pourtchi les
St. Pierrais décidirent qu'i valait mus le saouvé tandi qu'il 'tait frais et si-en cas renvié l'pannyi, les bottes et les caouches, et l'crotchèt.
Comme chenna, le craisseux d'toumates n'y s'sa que pour la perte de san lanchon, mais che s'sa p't-être unne leçon pour li, car je garantis que la préchainne feis i' n'lais'sai pas sa pêque à la garde de gens aussi insouciants comme san vaîsin.
* * * *
Av'ous entendu pâslé du carnaval à la
Trintèt. I' pathaît que Jack veur bein y-allé y joué d'la fliûte, mais i' veur que les gamins aillent y-aîdji à màté ses pommes de terre tchiques séthées pour qui pièsse allé joué dans la
band. Ch'n'est pas mal pensé.
Quant à Eugène, nou dit qui s'en va avé d's habits de vièr pirate du temps passèt, mais est-che vrai?
Bein saeux, l'Caouain est tréjous ès êcoutes à St. Ou, iou qu'il est 'at home' dans sa niche du Mont d'la
Grève de Lecq toutes les arlevées.
L'aoutre sé i' rencontri Jack sus san
moto-bike, mais Jack allait si vite - quâsiment soixante milles à l'heuthe - que l'pouore Caouain mantchi d'être aveuglyi par le ponsi. Tch'est que l'bouanhomme pense de tout chenna, Jack, et la missis? T'en vas tu avé John de la Fontaine à gardé les sous et t'en vas-tu l'î dithe comme un grand l'î fit y-a siez ans: John, v'là titheux iou que j'garde mes sous; prend chein qui t'en faout.
D'pis qu'nou n'avait alloué que l's'êlecteurs à la députation l'aoutre séthée, p't-être qu'ou s'sez bein aise d'entendre tchiques petites scènes qui s'y passit.
Laièsse, le tcherpentchi des Mathettes était bein content que moussieu voulait bein être candidat. Et comme i' s'faisait en t'nant moussieu par le co: Ah! moussieu, moussieu, j'm'en vais vos y mettre.
I' m'semble que la s'maine de d'vant, Laièsse 'tait iun des siens qui s'rendit dans la verte rue. et si y-avait ieu députation siex Jack, iou qu'Laièsse éthait passé la séthée?
Dans l'haout du Mathais. d'viers deux heuthes du matin, j'rencontri Willie, le postman du Dimanche, qui, li ettou, avait tèt à la députation. Willie 'tait bein embarrassé, car comme i' s'faisait: J'ai promins à moussieu de l'y-aidji autant que j'pouorrais, mais je n'pensais qui s'n'allé y-avé opposition. Si j'avais seu!
Flip des Landes et Clary de Trodez sont bein otchupés à cherchi des vouaix.
Nou z-est à compté un tas d'sornettes à la pouore Laizé et ou crai que moussieu n'en appréch'ra pas de 30 vouaix. Moussieu sait mus, li, et bain saeux les p'tits jaunets s'en vont lus dèshallé chute feis.
* * * *
Dans la pâraisse au prince tcha! tcha! nou fut bein surprîns d'être invités à une réunion de police pour Vendredi au sé, car dépis d's'années jamais nou n'avait patheil meeting.
Vèthe, nou savait bein que la gestion des Chentnyiers est bétôt fini, mais pourtchi avé un meeting?
Le sien d'Fauvic fut malin assez pour d'mandé à réfléchi et j'pense, mé, que nou criyait qui s'n'allé donné sa rêponse au meeting, et v'là qu'éthait permins à l'aoutre de donné la sienne.
Chute bête de Caouain est d'avis qui s'en va y-avé du changement, ou bein nou z-entendra d'drôles d'histouaithes comme mé, Caouain, j'en ouï du bord de Gouôret et sus tchi j'aimé mus taithe ma bec pour achteu.
* * * *
L'aoutre sé je m'trouvais jutchi dans un bouais d'la pâraisse au bouan bergé, quand j'vit daeux qui s'en allaient bouan train. J'pensi en mê-même: p't-être que chès mêssieux s'en vont à tchique députation et d'pis qui s'arrêtent siez les principaux d'pâraisse, v'là qui pathaît un mio drôle.
Mé qui sis tréjous tchuthieux, j'vouli en savé un p'tit pus long, et sav'ous chein qu'iun ieux dit à un grand d'la pâraisse: Pépée s'en va pas erprendre, et mé j'm'en vais être candidat. Mé fth'ous l'pliaisi de voté pour mé à l'assembliaie?
Quand un vier serviteur de la pâraisse entendit qu'nou z-était à canvassé, li qu'a la Fantaisie d'avé chute job, mais qui n'en voulait rain devant que la pliaiche ne fusse libre, chu grand pensi: D'pis que ch'est d'même, il est temps que j'en pâsle à m's anmins. Le mênage du chu vier serviteur est situé quasiment au mitan d'la pâraisse, v'là qui vos don'na le nom du sien que j'veur dithe.
D'pis, m'n anmin qu'êprouvi pour la job y-a vingt-chinq ans, mais pouortèt d'affaithes ne fit pas l'affaithe de l'assembliai, li ettou est à canvassé.
Et diantre sé, Winteur, li ettou, est candidat pour la job, et bein saeux que san moto-bike ne s'en va pas roui, d'pis qui s'en va ettou canvassé parmi les grands d'la pâraisse.
Caouain
1913
Viyiz étout: