Chein qu' nou-s-appelle eune Pilotinne est des pannais, des patates et du beurre - tout mêlé ensembl'ye. Ayant tchuit patates et pânnais nou les puthe, et pîs nous-ajouôte lé beurre. Nou peut faithe eune pilotinne étout auve des pannais et des cârottes, et du beurre. Mais l'tout temps pâssé eune pilotinne 'tait faite atout des pânnais et du beurre seulement. Dans ches temps-là nouos vièrs craîssaient des belles cliôsées d'pannais pouor gens et bêtes. Disons en pâssant qué, en s'mant les pânnais, nouos vielles gens chantaient souvent ches deux'trais lîngnes-chîn: -

"Grôsses et longues, et grôsses et longues,
Grôsses et longues et pas fourtchies:
Belles et bouonnes, et belles et bouonnes,
Belles et bouonnes et sans filots"

Véthe, nous-avait souvent eune pilotinne pouor lé dîner - et ch'est acouo sans doute dé tchi bouon aujourd'aniet!