Eune aut' fais l'êté est hors, l'hivé n'est pon liain,
Lé s'tembre est finni et nou s'apèrchait d'la fraid,
Mais pouor vouos garder cauds pouor, au mains, un p'tit brîn,
Sans complyîments, mett'-ous à tabl'ye et faites comme mé.
J'vouos învite tous, p'tits et grands, mînces, maigres, gros et gras,
À eune bollée d'soupe faite à la mode des Jèrriais:
Ch'n'est pas d'la soupe dé pouothé, ni même dé caboche,
Ch'est acouo bein miyeu, car ch'est d'la soupe dé pais.
Dépis mes touos p'tits jours, et man péthe dévant mé,
Man grand-péthe, man grand-grand-péthe et lé chein d'vant li -
Quand nou-s-a voulu s'rêcaûffer en autchun temps,
Soupe dé pais a tréjous 'té lé pliat favori.
Dans man gardîn touos l's ans jé pliante des bouons pais d'mai,
Assez pouor les Vaûtchièrs, les Vibèrts, les Cornus:
Tchi fait qué s'i' vouos en pliaît un coupl'ye d'balots
Vén'-ouos-en tout d'siette siez nous, ou s'sez les beinv'nus.
l' n'y'a quâsi qu'ichîn qu'chu fanmeux fricot s'mange:
Les Aur'gnais n'y tcheinnent pon, quarante-chînq milles au liain,
Les Dgèrnésiais n'y sont pon fort à l'habitude,
Mais ch'n'est pas d'même en Sèr - i' sont sortis d'St. Ouain.
Siez nous j'en mangeons tréjous, dé chutte fanmeûthe soupe,
Pas pus d'eune fais par jour, mais à tare-larigot,
Quand ous éthez patchi vos tailes, et mé étout -
Pon d'aut' bouonne soupe pouor nous! - i' s'y'en trouv'tha acouo.
Et vous l's Angliais, en av'ous don janmais gouôté
Mangeurs dé gâches et d'chucrinn'nies d'siez l'pâtichi?
Tout ch'la n'vouos vaut rein, et les docteurs vouos l'dithont:
D'la soupe dé pais, mes vièrs, et san goût d'èrva-s-y!
Nouot' soupe est un r'miède contre ahans et rhonmatisses,
Et quand nou-s-a l'corps dû ou qu' nou n'sé trouve pas bein,
Ofûche êtchoeuthé, ma la tête ou par ailleurs,
Véthe, ma fé, pouor tout chenn'na ch'est raide souvérain.
Mais prannez garde dé n'aver pon d'îndigestion,
Car comme pouor bein d'aut's choses y'a un cèrtain dangi:
D'la soupe dé pais sé mange toute caude, comme dé raison,
Et j'pense qué ch'est man d'ver au mains, d'vouos en dgèrni.
Tch'est qu' ch'est tchi donne des forches, et tout plein d'ênèrgie,
Tchi nos a r'lévé l'tchoeu des chents et chents fais?
J'l'avons dit, ma bouonnefemme et mé, et jé l'dithons -
Bollée d'soupe - fanmeux fricot: Bailliz-nous d'la soupe dé pais!
Ph'lippe dé Portînfer
|
