Le Ménage ès Feuvres,
St Ouën,

Lé 8 d'octobre, 1983.

Moussieu l'Rédacteu,

Eh bein, bouannes gens, mé v'là, grâce au Bouan Dgieu, dans ma nénante-traîsième année. Si nou m'avait dit, quand j'tais mousse, qué j'allais vivre à ch't' âge-là, j'éthais ieu d'la peine à l'craithe.

Man nénante-deuxième annivèrsaithe dé naîssance veint dé s'passer à L' Abbaye d'La Lucèrne en Nouormandie, où'est qu' eune Mêsse solonnelle fut célébrée par mén anmîn l' Abbé Marcel Lelégard en m'n honneu. Étant Anglyican, né v'là un honneu qué j'apprécyie hardi. Man jour de naîssance (j'fus né lé 29 septembre, 1891) est la fête réligieuse dé St. Miché et touos l's Anges. L'Êpître du jour, prînse dé l' Apocalypse de St. Jean, nouos raconte l'histouaithe dé la batâle dans l'Ciel entre St Miché et ses Anges et l'Dragon et les cheins, chu Dragon que nou-s-appelle tchiquefais lé Démon, l'Satan, l'Malîn Esprit et l'Dgiâbl'ye. L' Abbé Lelégard mé d'mandit d'traduithe l'Êpître en Jèrriais et m'fît l'honneu d'la liéthe en Jèrriais mé-même.

Heutheusement qué ch'tait St. Miché et ses Anges tch'en gangnîdrent et qué l'Satan et sa mauvaise compangnie d' Anges fûdrent fliantchis à tèrre. J'ai tchiquefais pensé tch'il y sont acouo d'nouos jours, et qué ch'est lus activité, dé tchi qu' nou s'en appèrche pon car lé Dgiâbl'ye est vraiment un malîn esprit, tch'est la cause d'un tas d'la mauvaîtchi tch'est par les c'mîns.

J'eus la chance qué Moussieu l'Juge Max Lucas et sa danme lus en allaient en Nouormandie en même temps qu' mé et qué j'pus m'en aller à quanté ieux jusqu'à l'abbaye, tchi n'est pon bein liain d'Granville. I' m'fîdrent l'honneu et l'pliaîsi d'êt' présents à la Messe le 29 septembre, et j'pus m'en r'vénîn en Jèrri à quanté ieux. J'm'en r'vais en Améthique lé 19 dé chu mais.

Av'-ous janmais gouôté la trantchilité d'un séjour dans eune abbaye où'est que l'son des clioches de l' Angélus vouos rêvil'ye lé matîn et tchi sonnent trais fais par jour, matîn, méjeu et sé, pour vouos appeler à la priéthe? Comme j'l'ai mentionné d'vant, j'aimethais que l'habitude de la sonner es'sait r'nouvelé dans toutes nouos églyises en Jèrri. Ché s'sait eune supèrbe habitude dé s'arrêter pour dgiex minnutes trais fais par jour pour èrciter la priéthe de l' Angélus, ou aut' priéthe. Y'a un bieau portrait, appelé "L'Angélus", par Jean-François Millet, né à Gruchy, pas bein liain d'Chèrbourg, tchi montre deux pèrsonnes, l'homme atout sa castchette à la main, à l'êcouter. J'm'èrsouveins d'aver veu dans l' "Pilot", y'a tchiques années à ch't heu, eune note par lé Révérend Evelyn Chavasse, Recteu d'St. Pièrre dans l'temps, tch'i' fallait dithe au Bouanhomme George tch'i' n'la sonnait pon à l'Églyise dé St Pièrre, mais tch'i' r'citait les mots touos les jours.

Les bieaux jours d'êté qu' j'avons ieu à ches drein me suivîdrent à l'abbaye dans san bieau p'tit et trantchile vallon. Lé chant des ouaîsieaux dans les bouais, et d'temps en temps lé bavardage des ouaies dans l'êtang abbatial, et tchiquefais l'beûlement d'eune vaque dans la distance, sont la musique dé la campangne à l'entou, Et quand veint l'sé lé chant grégorien des Vêpres (nouot' "Evensong") dans l'églyise de l'abbaye sembl'ye béni l' jour tchi s'pâsse et sanctifier la niet tchi veint.

Lé supèrbe temps et man p'tit séjour en Nouormandie mé ramémouaithent la preunmié fais qué j'y'allis. Ch'tait en 1906 ou 1907. J'tais dans l'office à Moussieu Charles Ouiyamme Binet dans 'chu temps-là et l'Avocat Edmund Toulmin Nicolle 'tait iun d'ses grands anmîns. I' m'învitit d'aller en Nouormandie auve li atout nouos bicyclettes.

J'allînmes à Carteret par baté et nouos v'là en c'mîn sus nouos "vélos", comme disent les Français. J'mé sis tréjous souv'nu qué nouot' preunmié arrêt, tard l'arlévée, fut ès Pieux (dé iou qu' nou-s-a eune belle veue d's Îles). Ch'tait un p'tit village dans chu temps-là, et i' n'y'avait pon d'hôtels. Il 'tait temps d'arrêter et d'trouver d'l'abri pour la niet. J'entrînmes dans un café et la p'tite bouannefemme dé propriêtaithe nouos louit eune chambre pour la niet et nouos fît eune omelette. Né v'là la preunmié fais qu' j'en mangis ieune, et oulle 'tait délicieuse. J'm'en lique acouo les babinnes quand j'y pense.

J'feûnmes eune dgiêxaine dé jours en c'mîn, et ch'fut pour mé eune mangnifique visite dans la belle Nouormandie qué j'n'ai janmais oublié. L'Avocat Nicolle 'tait un fanmeux archéologue et ch'tait eune vraie êducâtion dé l'ouï distchuter l'architectuthe des églyises (j'les visitions toutes) auve les curés.

J'allînmes jusqu'au Cap d'La Hague dévant r'brousser c'mîn pour Carteret. Arrivés là, j'rencontrînmes lé Juge Alfred Messervy et j'dînîmes auve li dans s'n hotel dévant aller aborder l'baté pour Gouôrray.