Pour rempliaichi la rêunion d'Eté en pliein air, les membres dé l'Assembliée d'Jèrriais, au nombre dé 60, sé trouvîtent sus la cauchie, Jeudi, lé 23 d'Juin, pour s'embèrtchi sus l'baté (lé Brittany) s'n allant à Granville à 7 heures du matin.
Lé temps nos fut en aide et n'ou n'érait pon peut chouaisi eune millieurs journée. La mé 'tait calme comme un lac et touos les pâssagièrs en profitîtent en s'prom'nant à bord, touos d'bouanne humeur - et d'bouanne couleur étout!
En arrivant à Granville, i'y avait des manifestations pour mèrtchi lé c'mmenchement dé ches excursions ichin - dé Jèrri à Granville et vice versa. Ch'tait vraiment eune journée d'Amitié Franco-Jersiaise. Au Casino d'Granville i'y eut un vin d'honneur offert par lé Syndicat d'Initiative, et ensuite, n'ou montit dans les autobus pour aller à Villedieu les Poëles, bein nommée "Cité du Cuivre".
Ch'est eune vielle ville, hardi intérêssante, et partout n'ou trouve des boutiques remplyies d'articl'yes magnifiquement faits en tchuivre. Presqué touos les membres acatîtent, comme souvenirs, des p'tites clioches en tchuivre, vendues par des fillettes qui s'prom'naient dans les rues, en l's offrant à touos les visiteurs. Après une visite à la fonderie dé clioches, n'ou r'print les autobus pour St. Lô.
Partout dans l's alentours n'ou vait les mèrques dé la dguèrre, et combein qué la ville a souffert par des bombardements, tant qué n'ou l'appelle ach'teu "La Capitale des Ruines". Quand vint eune heure, tout l'monde avait faim et l'dêjeuner fut servi à l'Hôtel des Gourmets. L'affaire traînit un mio et i' n'y eut pas hardi d'temps à visiter la ville, car i' fallait r'parti à 4 heures.
En arrivant à Coutances n'ou s'prom'nit dans l'magnifique Jardin Public, qui vos offre des panoramas splendides. Pus tard, n'ou fit la visite dé la Cathédrale - ieune des pus belle dé France. Lé temps, sinon l'couorage, nos mantchit dé monter jusqu'au haut d'la tour, et d'vant longtemps i' fallut r'prendre ses pliaiches dans les vouaitures pour lé dèrnyi trajet jusqu'à Granville. À 6.30 heures, n'ou s'rêunit occouo eune fais pour dîner à l'Hôtel du Nord. Un bouan r'pas nos avait 'té préparé, et les pliats fûtent hardi à not' goût.
À 8 heures i' fallait s'ertrouver à la cauchie, et sus l'baté. En r'gardant la mé, avec son calme supèrbe, n'ou 'tait asseûré d'aver eune bouanne travèrsée et, dé touos les bords, ch'tait des expressions heûreuses et satisfaites qué n'ou viyait.
En appréchant d'Jèrri, auve lé cliai d'lune sus la mé, la haute marée et les p'tites lumières sus la côte à nos faire la beinv'nue, ch'tait un portrait dé paix et d'bouanheur tchi restéra dans not' mémouaire pour longtemps.
Evening Post 5/7/1955
(auve un mio d'rédaction)
Viyiz étout: