Les danseurs dé chu fanmeux groupe folkorique dé Chèrbourg vîndrent en Jèrri les trais preunmiers jours du mais d'mai. La suggestion originnelle ayant 'té acceptée par lé Conmité Dramatique dé L'Assembliée d'Jèrriais, lé Rédacteu du Bulletîn fut enchèrgi d'êcrithe, au c'menchement du mais d'avri, à ches bouonnes gens entouor la pôssibilité dé v'nîn en Jèrri. À la siette dé la rêponse favorabl'ye dé Moussieu Jean Napoléon, lé Président d'La Société Alfred Rossel, tchi fut tout à fait êprîns d'l'idée, nou-s-appraichit les gens d'la direction du “Tourisme d'Jèrri” pouor du support finnancyi. Lé Rédacteu fit les preunmié dêmarches nécessaithes, et pis pus tard Moussieu R. Helleur Lé Cornu, Jure-Justicier, et Mde. M. dé la Haye, du Conmité Dramatique, et li mênagîdrent dé pèrsuader lé “Tourisme” dé s'atchiêsci à l'idée. Et don, sans pus ni mains ches couôthîns d'Nouormandie fûdrent învités à v'nîn pouor trais jous, entchiéthement ès frais du Conmité du Tourisme d'Jèrri. Ch'la s'adonnait hardi bein, car i' pûdrent prendre part dans la “Fête du R'nouvé” (ou “Spring Festival”). Il' arrivîdrent lé sanm'di matîn par baté dé Port à Gouôrray, trante-trais d'ieux, par un temps supèrbe et, des l'arlévée d'chu jour-là, i' dinnîdrent mangnifiquement en grande tenue - en hardes et supèrbes coêffes - dans l'Par de Pliaîsance (ou “Howard Davis Park”), touos les membres d'L'Assembliée ayant 'té spécialement învités. Lé sé fut la mème chose, mais auve eune quarantaine dé membres d'L'Assembliée à prendre part, tous en mangnifiques hardes du temps pâssé étout, en chantant des vielles chansons Jèrriais entre les danses. Tout ch'la 'tait hardi bein apprêcyi. Et pouor finni la séthée, un souper traditionnel Jèrriais fut sèrvi ès anmîns les danseurs et les membres des difféthents conmités d'L'Assembliée et tchiques autres tch'avaient aîdgi, par lé pèrsonnel à l'Hôtel des Arches, L'Archithondé - un vrai festîn dé tchi s'rigaler, comme lé dîdrent iun et châtchun - des pais au fou atout du lard, des mèrvelles, d'la gâche dé pâté, du pâté d'pommes et du pâté d'rhubarbe, "en as-tu en veurs-tu?" et, comme bouaisson du cidre et du café. Tout ch'la avait 'té prépathé les jours dé d'vant par cèrtaines danmes dé L'Assembliée tch'avaient travailli beine dû et tchi fûsrent bein èrmèrciées par lé Président. Auprès la santé d'la Reine, nouot' Duc, des discours fûdrent donnés par lé Président d'L'assembliée et faîthant la beinv'nue à ches anmîns et par lé Président d'La Société Alfred Rossel en r'mèrciéments. Moussieu Jean Napoléon, sustout, pâlit divèrsément bein, un mio en Français et tout l'restant en fanmeux Nouormand, pour èrmèrcier pouor tout chein tch'avait 'té fait à lus êgard, la bouonne compangnie et l'raide bouôn répas. Des chansons, comme rêvillon, par les gens d'La Grand' Tèrre finnîdrent eune mangnifique séthée - bein tard! En êffet, ch'fut l'jour d'L'Assembliée!
Lé dînmanche l'arlévée les danseurs rêjouîdrent acouthe un grand rassemblément, sus La Boull'lie ("Castle Green") à Gouôrray, et les Jèrriais chantîdrent lus vielles chansons étout, eune vîngtaine étant en hardes du temps pâssé. Lé sé lé programme fut répété au Par dé Pliaisance, et pis lé lendemain au matîn, lé lundi, dans la Ville dé St. Hélyi - mais les danseurs seulement. L'arlévee sept ou huit membres fûdrent auve “nouos gens” faithe eune bouonne touônnée dans l'île en char-à-bancs, et nou mangit tous ensembl'ye, un bein bouôn repas, à l'Hôtel Trafalgar au bord dé La C'meune à Grouville. Les grands adgieux d'amiêtchi s'fîdrent sus la Caûchie, dévant l'départ par lé baté à huit heuthes.
Ah ça, né v'là eune occâsion tout partitchuliéthe et spéciale dans la vie d' L'Assembliée d'Jèrriais! Nou-s-a don veu ches danseurs mérveilleux du groupe folklorique costumé Alfred Rossel, tch'est r'nommé en Ûrope comme en Nouormandie, étant “Lauréat des Fêtes des Provinces Françaises et Festivals Internationaux”. Ches gens-là ont 'té à Alger, et à Paris, Nice, Narbonne et bein ailleurs dans la France, comme étout en Allemangne, en Belgique, et cétéra. En donnant lus bein vielles danses et chansons, ches belles jannes fil'yes et ches solides garçons auve l'âme bein Nouormande portent les hardes d'aut'fais tchi sont d'eune grand' valeu, cèrtaines dé ieux ayant pus d'chent chînquante ans. Tout ch'la fait r'vivre lé vièr temps pâssé, atout ses traditions, sa langue, ses chants et des danses - tout d'tchi sauvé comme précieux héthitage du pays.
Eh bein, véthe, nou-s-en fut vraiement émêrvilyis, d' la bieaute dé chutte bouonne compangne tchi vînt dé Nouormandie ches deux ou trais jour-là - ches gens si grâcieurs et avenants, tchi fîdrent tellement pliaîthi, atout lus mangnifiques danses et chansons et lus supèrbes hardes et coêffes du vièr temps. Ch' fut eune grand' jouaie pouor L'Assembliée a les r'chéver, et nou-s-a bouonne raiethon à craithe qué ch' fut étout pouor ieux eune occâsion toute enjouée et spéciale d'être parmi lus couôthîns ichîn en Jèrri.
L'Assembliée d'Jèrriais èrmèrcyie à tout janmais les gens du “Tourisme” d'Jèrri pouor aver aîdgi tant à faithe chutte visite pôssibl'ye, en dêboursant les hèrpîns pouor les frais d'viage et lé louogement dans d'bouonnes hotels. Nou-s-en est hardi r'connaîssant, car sans ieux et lus aigue i' n'y'éthait dgéthe ieu mouoyen d'en joui. Jé gardéthons tous les miyeu souv'nîns d'ches bouonnes gens dé Nouormandie, et jé sommes hardi seux tch'il' en f'thont autant pouor nous!
1976
Viyiz étout: