Les Pages Jèrriaises

Lé Châté d'Sassy (Orne)

Jeudi l'seize d'Août 2012

...Tchi faithe l'arlévée? Lé Châté d'Sassy 'tait à 10 km et j'pouôrrais bein vither d'bord si ch'tait trop liain. en sortant d'la ville, y'a des c'mîns à bike des bords d'la grande route. Épis la grande route est assez pliate et aîsie (sénon pouor un coupl'ye dé ronds carrefours pouor s'cârrer d'la motoroute). Solé (j'éthais deu aver mîns du lait d'bronzage), clios en avoût, épis l'dêtou pouor Sassy. L'entrée au châté 'tait raide - v'là tchi n'tait pon ravissant viyant qu'nou vait les tèrrasses du gardîn d'la grande route.

J'arrivis à 3h30 et l'affiche à la porte dîthait qu'la préchaine vîsite s'sait à 4h30. J'allis m'pronm'ner dans les gardîn pouoe eune d'mié heuthe. tchi belle cop'thie d'if et d'bouisque! Et acouo eune fais né v'là un gardîn formel entouothé d'prés.

La vîsite dgidée 'tait întérêssante. Eune partie du châté est acouo otchupée par la fanmil'ye - ch'est un châté privé, ch'n'est pon un musée. La fanmil'ye fait sèrvi les appartènements historiques quand y'a d'la vîsite.

Y'a eune chambre d'la Reine. La Reine, not' Duc, y pâssit la niet (auve 200 d'sa siette) en 1967 pouor acater un j'va. Lé Duc d'Êdîmbourg y vînt étout pour des courses à vainnes. Y'avait eune lettre dé àa Majesté au duc du châté. Mais l'cliou d'l'arlévée 'tait la bibliothèque! Lé Duc, tchi 'tait Chancélyi d'Louis-Ph'lippe (si j'n'ai pon confus tout) avait bâti sa bibliothèque - cheunm'née en bouais, portrait par Vernet, livres, et livres, et livres. L'appartènement est un monument historique.

Épis y'a la chapelle tch'a eune pièche d'auté Fliamande du Mouoyen Âge - acouo un monument historique.

Geraint Jennings

 

Viyiz étout:

 

Les Pages Jèrriaises