...Ch'tait acouo des p'tites rues d'campangne jusqu'à Carrouges et un hôrribl'ye rond carrefour pouor y'av'nîn. Lé ciel 'tait couèrt et gris et ôrageux. J'partchis la bike à l'églyise et d'valit à pid au châté. ch'tait un long c'mîn et l'ciel 'tait couèrt et j'criyais qué v'là tchi m'nichait d'la plyie. Tout coumme jé n'voulais pon ramonter pouor mes huilets. Driéthe la tou d'porta, y'a un châté entouothé d'un canné et, driéthe lé châté, un gardîn entouothé d'prés.
La vîsite au châté 'tait întérêssante. Bouais stchulpté, trais bâtithies d'siette pouor en graie l'châté. Y'a un gardîn d'poummièrs auve un tas d'difféthentes vâriêtés.
J'ramontis à la bike (tchi mont! - j'eus l'explyicâtion d'la dgide pouortchi qu'lé châté fut bâti au pid du mont: ch'est en tchi les mathais tout l'tou 'tait la pus grande protection du châté) Vraînment Carrouges 'tait freunmé pouor l'mais d'Août. L'hôtel 'tait freunmée et n'y'avait rein. Ch'tait eune bouonne chose qué j'avais changi d'avis et qu'jé n'r'îthai pon par ichîn - et chenna sustout auve les monts.
Geraint Jennings
Viyiz étout: