La Reine, not' Duc, à èrchéver l'honmage des Seigneurs dans l'Par Howard Davis, lé 13 dé Juilet 2001.
Londres, en Angliétèrre
Lé 31 juilet, 1971
Moussieu l'Rédacteu,
En r'liêsant les bulletîns d'L'Assembliée d'Jèrriais, chein qué j'fais souvent quand j'sis en Améthique, j'viyais un accompte dé la vîsite en Jèrri du Rouai George V lé 11 juilet, 1921, êcrit par Philip Ahyi, Êtchuyer, M. ès A., B. ès Sc., etc., et mé-même. "Conjointement par ensembl'ye", comme disent l's hommes d'affaithes. Est-che pôssibl'ye qué y'a chînquante ans dépis chu temps-là? V'la tchi veurt dithe tch'i' n'y' a qu'les Jèrriais âgis d'pus d'chînquante ans tchi s'en r'souveinnent! Y'a pourtant tant des vielles couôteunmes dé l'Île mentionnées dans l'accompte dé chutte vîsite-là qu'ou vaut la peine d'èrcorder ichîn.
Quand lé Rouai, nouot' Duc, est en Jèrri, il est l'suprême Seigneu dans l'Île et n'y'a qu'à li qu' honmage est deu, mais, suivant iun des privilèges accordés à l'Île, l'honneu n'est deu qué quand il est actuellement en Jèrri. La seule exception est qué s'i' n'peut pon êt' présent en pèrsonne et tch'il autorise eune Commission Spéciale d'agi pour li, l'honmage est donné à la Commission comme èrprésentante dé la pèrsonne dé Sa Majesté - mais ch't' occâsion est rare. L'honmage deu à la pèrsonne dé Sa Majesté exige qué l'Seigneu sé prononce comme étant san "liège", et i' faut qué ch'la s'faiche en pèrsonne. Lé Seigneu met ses mains entre les mains du Rouai, lî disant en mème temps : "J'sis vouotre homme à vouos porter fouai contre tous!"
Honmage est deu au Rouai par les chînq franc ténants d' Sa Majesté, St. Ouën, Rôzé, La Trinneté, Samathès et Mélêches, et par les aut's Seigneurs. Dé toute chutte noblièche dé l'Île, y'en a deux tchi daivent des sèrvices spéciaux tchi sont mentionnés dans l's Extentes dé 1331 et 1607. Les Seigneurs dé Rôzé et d's Augrès daivent aller à j'va dans la mé à la rencontre du Rouai quand il arrive en Jèrri, jusqu'à qu'la mé touche la souos-ventriéthe du j'va. I' dait l'même sèrvice pour l'èrcondithe quand i' tchitte l'Île. Lé Seigneu d'Rôzé est l'Bouteilli ("Butler") du Rouai quand il est en Jèrri. Lé Seigneu d'La Trinneté dait lî bailli un coupl'ye d'maillards.
Quand lé Rouai George V arrivit en Jèrri, Reginald Raöul Lempriéthe, Êtchuyer, Seigneu d'Rôzé et san bouteilli héréditaithe, et l'Mâjeur John Francis Giffard, Seigneu d's Augrès, allîdrent à sa rencontre sus la caûchie Albert. I' pathaît qu'lé Rouai savait tch'il' 'taient supposés l'rencontrer dans la mé, et tch'i' l'mentionnit en riant!
Mais, v'nons à la Cour d'Héritage: Quand Sa Majesté entrit dans la Cour, lé Bailli, Messire William Henry Venables Vernon, Chevalier, lî dit :- "Sire, né v'chîn La Cour d'Héritage dé Vouot' Majesté, la pus vielle cour dans l'ouêst dé l'Europe. Pliaît-i' à Vouot' Majesté qu' nouos Seigneurs vouos faichent honmage?" Lé rouai ayant grâcieusement donné san consentement, san Protchuleux-Général, Henry Édouard Le Vavasseur dit Durell, Êtchuyer, fit l'appel en disant: "Il a plieu à Sa Majesté lé Rouai, nouot' Duc, dé faithe compathaître dévant li ses francs ténants et accepter lus fouai et honmage!"
Les Seigneurs fûdrent appelés dans l'ordre suivant :- St, Ouën, Reginald Malet de Carteret, Rôzé :- Reginald Raöul Lemprière, St, Gèrmain :- Charles Édouard Malet de Carteret, St, Jean la Hougue Boëte :- Alexander S, Raworth, Les Augrès :- John Francis Giffard, La Hague :- Charles Lambert Helleur Le Cornu, Le Franc Fief en St, Brélade :- Robert Ranulph Marett, Le Fief ès Poingdestres :- Robert Clément Le Quesne, Le Fief Lemprière en St. Hélier :- Ernest Percy Marquand Le Sauvage. À m'suthe qué lus noms 'taient appelés, châque Seigneu sé l'vait et, joignant ses mains en "s'inclinant vers Sa Majesté", fit hommage en disant :- "Jé sis vouotre homme liège à vouos porter fouai et honmage contre tous! "
Lé Rouai George prînt les mains du Seigneu d'St. Ouën entre les siennes et, s'baîssant li-mème, èrconnut l'honmage dé Moussieu d'St. Ouën et de touos l's aut's Seigneurs en mème temps. La raîson qué l'Seigneu d'St, Ouën fut chouaîsi comme lé r'présentant dé touos l's aut's Seigneurs est qué l'Fieu Haûbèrt et Seigneûthie d'St. Ouën est lé chef fieu d'l'Île.
Quand la cérémonie fut finnie, lé Protchuleux d'mandit au Rouai s'il 'tait prêt à r'chéver les deux maillards dé la part dé Moussieu d'La Trinneté. Lé Seigneu avait les deux ouaîsieaux sus un bieau grand pliat en argent. Lé Rouai acceptit pliat et maillards et les donnit à san R'chéveux-Général.
Lé Rouai n'lé savait probabliément pon, mais lé pouôrre Moussieu d'La Trinneté eut d'la peine à r'prendre possession d'san pliat en argent. Jé n'pouôrrais pon vouos dithe si lé Rouai mangit les maillards, ou si ch'tait lé R'chéveux-Général tchi s'en rigalit. I' pathaît qu' pèrsonne né savaient pour seux si Moussieu d'La Trinneté d'vait l'pliat aussi bein qué l's ouaîsieaux!
I' pathaît, étout, qu' la raîson qu'touos les Seigneurs présents à la Cour d'Héritage né fûdrent pon appelés à faithe honmage, 'tait tch'i' fallait racourchi la cérémonie viyant qu'lé Rouai avait un fort jour dévant li.
Viyiz étout: