V'là don acouothe eune occâsion toute spéciale et bein rêussie dans la vie d'L'Assembliée et pouor sa vîngt-chîntchième année!
L'Abbé Marcel Lelégard, dé L'Abbaye de la Lucerne, iun des grands savants d'La Nouormandie, ayant eune raide connaîssance entouor un tas d'tchi - la théologie, l'architectuthe, l'archéologie, les langues, et toutes choses historiques, ayant êcrit un tas d'tchi dans bein des publyicâtions avaû l's années, et ayant viagi un tas en Ûrope - était v'nu tout à l'esprès à l'învitâtion d'L'Assembliée pouor donner une causerie, Le multilinguisme - la place du Jèrriais et du Contentinais, avec quelques poésies et chansons. I' restit à La Brétchette, à L'Êta, St. Ou, et, auve li 'tait s'n assistant, lé Sieur Alain Le Coutour, tchi restit au Ménage ès Feuvres, ès Landes, à St. Ou.
Souos la présidence dé Moussieu J. Nicolle Richard, i' s'trouvit appraichant dé deux chents pèrsonnes au Collège dé Haut Lieu lé sé de 8 d'octobre - lé Bailli, Messire Frank Éreaut, les membres du Don Balleine et lus danmes, dé La Société Jersiaise, des Amitiés Franco-Britanniques ayant 'té partitchuliéthement învités par L'Assembliée, et l'publyi en général étout. Lé Consul de France, Moussieu Michel Moreux, fit ses grand's estchûthes à la onzième heuthe d'aver 'té empêchi d'êt' là.
Auprès aver fait un fanmeux discours en Français, l'Abbé rigalit toute la compangnie en r'citant des poésies et donnant des chansons dé cèrtains des difféthents dialectes dé la langue Nouormande du Contentin - du Hadgais, du Bauptais, du Coutanchais, d'l'Avranchîn, et cétéra. I' fit étout bein des réféthences entouor chein tch'a 'té êcrit par les difféthents auteurs en langue Jèrriaise et au sujet d'sa prêsèrvâtion par L'Assembliée et L'Don Balleine, payant un tribute à part à la mémouaithe dé Moussieu Arthur E. Balleine, grand beinfaiteur Jèrriais tchi mouothit lé Dînmanche dé Pâques en 1943 dans sa huiptantchième.
L'Abbé mouontrit eune parfait connaîssance du sujet tch'il avait chouaîthi pouor chutte séthée mémorabl'ye, comme étout l'ajet, lé talent estraordinnaithe tch'il a comme orateur et conférencyi. I' finnit par souhaiter dèrché tout succès et tout bonheu à L'Assembliée pouor les préchains vîngt-chînq ans dithant tch'il espéthait r'être învité à la fîn d'chu deuxième quart dé siècl'ye et d'y r'vaie toutes les bouonnes gens tch'étaient v'nues l'ouï chu sé-là!
Comme Président des Amitiés Franco-Britanniques, et membre dé L'Assembliée, sans doute, du Don Balleine et d'La Société Jersiaise, Moussieu Ph. Mauger de Veulle avait 'té învité par lé Président d'L'Assembliée à dithe deux mots pouor èrmèrcier l'Abbé, chu moussieu si hardi entendu et distîndgi, et né v'là justément chein tch'i' fit dans deux'trais mots dé p'tit discours bein chouaîthis et bein à propos, en b'sant fortément sus l'bésoin à nous d'garder en Jèrri les grands avantages du trilinguisme.
À la fin d'la séthée un bouôn souper, dé gâche dé pâte et d'café, fut sèrvi par les danmes des difféthents conmités.
L'Assembliée d'Jèrriais est don hardi fiéthe et honorée d'aver ieu un êrudit d'chu calibre, et un vièr anmîn, à v'nîn pour aîdgi à célébrer l'adgèvement d'ses vîngt-chînq ans, et s'en va r'corder ch'la pouor tréjous comme jour propice et d'bonheu.
Lé sanm'di matîn (lé lendemain) l'Abbé Lelégard fut întroduit par les Mêssieux Ph'lippe dé Veûlle et Fraînque Lé Maistre au Consul, Moussieu Michel Moreux, et il' eûdrent eune heûtheuse et agriabl'ye rencontre touos ensembl'ye.
Viyiz étout: