J'avais tréjous voulu vaie la Cathédrale de Coutances, viyant qu' not' p'tit Jèrri 'tait dans l'Diocese de Coutances le temps passé. Ch'est eune grande églyise gothique tch'est r'merquablye pour sa bieauté.
Comme un tas d'aut' villes tchi n'sont pas liain des Côtes d'la Normandie et d'la Bretagne, Coutances a souffert par la dgèrre, et toutes les maisons l'tou d'la Cathédrale ont 'té abattues par les bombardéments, - mais la Cathédrale n'a pas 'té endommagie pour dithe, bieau qu'y'a hardi d'ses vèrrines dêfoncées, - nou vait ch'là dans toutes les églyises. Comme St. Paul à Londres, la Cathédrale de Coutances est d'but toute seule, parmi un tas de ruines.
Quand j'tais d'dans l'aut' jour, j'pensais au temps jadis, et ès milles personnes tch'ont vêtchu l'tou d'ses muthâlles pour des siéclyes et tch'y sont entrés en êfance pour êt' baptisis, et pus tard dans la vie pour êt' mathiés, et en fin d'compte pour la dreine fais d'vant d'êt' mins en tèrre, généthation sus généthation. Et pis, j'pensais, étou, ès vièrs Evêques tchi soulaient donner d's ordres ès Douoyens d'Jèrri dans l'temps d' not' vièr Duc Dguilleaume Lé Conquérant.
Ch'est seux qu' les Normands n'taient pas les seuls tch'avaient chanté les louanges dans chute belle Cathédrale-là, car la ville de Coutances avait 'té otchupée par les Angliais de quatorze chent dgiex-sept à quatorze chent quarante-neuf. Dans chu temps-là, i' faut penser que l's'Angliais pâlaient la langue Normande étou, comme j'faisons acouo en Jèrri. Et dreinement ch'tait l's'Allemands tchi 'taient là, – ch'est seux qu'y'en avait parmi ieux tch'allaient à la Cathédrale, - la maison du Bouan Dgieu est ouverte à tout l'monde.
En Normandie (comme par ailleurs en France) nou vait un tas d'églyises tchi sont si endommagies qu'les services ont lieu dans ieune des p'tites chapelles amènagies dans eune carre pour continuer les services en attendant qu' l'églyise es'sait r'graie. A Caen, parmi des ruines tèrriblyes j'allimes (le Juge Le Feuvre et mé) au service dans ieune dé meme. I' faithait fraid chu Dinmanche-là, et nou n'tait pas bein confortablye assis là d'dans. Nou viyait l'ciel à travèrs du life et à travèrs des vérrines tchi 'taient sans vérre, mais nous tait si êmerveillis de vaie tant d'monde tch'avaient l'couothage d'aller à l'églyise parmi toutes ches ruines-là et après aver passé l'travèrs de tant d'minséthes de dgèrre, qu' nou n'pensait pon à la fraid. V'là tchi m'faithait penser, étou, ès Chrêtiens des preunmièrs temps tchi 'taient oblyigis d'aver lus services dans les souos-tèrrains d'Rome. En Jèrri, j'n'apprécions pas assez nos belles églyises, si confortablyes hiver comme êté, et j'avons ieu la chance tch'i' n'ont pas 'té saccagies duthant la dgèrre.
Dans toutes les villes ichin nou vait les monuments ès Morts de la dgèrre de mil neu' chent quatorze, et parmi les noms sus les monuments en Normandie nou vait des noms d'vielles familles de Jèrri. L'y'a tout pliain d'Lefèvres et d'Lefebvres, - n'y'a pas d'doute que ch'est la meme famille, mais chute famille-là pathait aver 'té parfenée un mio partout. Sus l'monument ès morts d'Amiens l'y'à eune vingtaine de Lefèvre et eune douzaine de Lefebvres. L'y'à des La Bruns, étou, et des Le Clerq, des Le Gallais, des De La Mare, des Dutots, des Duval, des Le Lièvre et des Renoufs et des Briard. J'ai r'gardé partout pour des Giffards, mais j'n'en ai pas veu. Pourtant ch'est seux qu' ch'est un vièr nom Normand, car l'y'en avait iun à la Batâlle de Hastings, mais i' taient probablyiément parfénés un mio partout comme i' 'taient en Jèrri. Nou-s en trouve tchiqu's'uns dans les R'gistres dé toutes les églyises de Jèrri, mais i' n'y'a qu'à St. Pierre et la Trin'té qu'nou trouve un tas.
Enfin, quand nou vait la Normandie, auve ses belles cathedrales et ses villes et belle campagne, si bein tchultivé, nou-s a l'drouet d'êt' ordgilleurs d'êt' d'scendus des vielles familles Normandes.
George d'la Forge
24/4/1948
Viyiz étout: