Lé Ménage ès Feuvres,
St. Ouën.
Lé 14 d'octobre, 1967.
Moussieu l'Rédacteu,
Quand j'tais en Nouormandie la dreine sémaine dé septembre, j'fus fait à connaître à un moussieu comme étant un vraie Nouormand d'un mio d'La Nouormandie tchi n'a janmais “subi le joug de l'occupant Français!” - voulant dithe Jèrri, sans doute! V'la tch'i' montre qué y'a acouo des Nouormands en Nouormandie tchi n'lus craient pon Français!
Man p'tit séjour-là fut passé dans L'Abbaye de la Lucerne, à l'invitation de l'Abbé Lelégard, Consèrvateur dé L'Abbaye et Professeur dé l'Univèrsité dé Paris. J'pense bein tch'i' y'en a en Jèrri tchi sé d'mandent comment qu'un Jèrriais peut s'rêjoui dans eune Abbaye tch'est eune înstitution réligieuse où'est qu'La Sainte Cène est célébrée dans l'rite Romain. Eh bein, i' faut admettre qué v'la tchi n'pliaîthait probabliément pon à tout l'monde. Mais l'chein tchi veurt du r'pos et d'la trantchilité peut en trouver là. Oulle est située dans eune belle vallée en plieine campangne pas bein liain d'Granville. Des bieaux cyngnes nagent trantchilement dans l'êtang en d'vant d'la Maison Abbatiale. Y'a des vaques à paître paisibliément dans les prés l'tou d'L'Abbaye, et deux ou trais j'vaux lus y promènent à banon.
Oulle est vielle, L'Abbaye, et en train d'êt' restaurée. Fondée en 1143 par un p'tit-fis du n'veu à Dgilliaume lé Contchérant, ou fut supprînmée - comme bein d'aut' institutions réligieuses dans l'temps d'La Révolution Française - et oulle 'tait presqu'en ruinnes quand L'Abbé Lelégard sé décidit d'la restaurer y'a tchiques années. L'églyise est à bein pres deux tchiers début, et eune pétite chapelle a 'té amênagie d'un but pour les sèrvices en attendant qu'ou s'sait restaurée assez pour la r'faithe sèrvi touos les jours. Sav'ous, bouannes gens, tch'i' y'a tchiquechose tchi rassâsyie l'esprit dé c'menchi la journée par entrer dans la chapelle et prandre part dans l'sèrvice solonnel de l'Eucharistie, tchi rappraiche l'être humain si près d'san Sauveur et d'ses pathents et anmîns au r'pos êtèrnel dans l'Sanctus tch'est chanté “Auve les Anges et Archanges et toutes les armées des Cieux”, comme i' nouos l'est dit à la page 154 dé nouot' Litourgie!
Ieune des choses întéressantes dans eune Abbaye est qu'ch'est eune pliaiche où-est qu'des gens d'toutes les vocâtions vont lus r'pôser. Quand j'tais-là y'avait trais artistes-peintres, et eune démouaiselle tch'est restauratrice de portraits à l'huile. Quand i' v'naient à la maîntchi êffachis ou tch'i' pèrdaient lus couleu par lé passage du temps, ou' r'nouvelle les couleurs êt i' pathaîssent comme s'i' v'naient d'êt' peints! Deux des artistes-peintres 'taient Suèdouais et l'autre Allemande. Des gens charmants et tchi pâlent plusieurs langues. I' sembliéthait tch'il' ont eune mannièthe dé francmachon'nie entre ieux, les peintres. Et pis, étout, i' veint du monde dé partout visiter L'Abbaye.
Comme l'annivérsaithe dé sa naissance est l'jour dé La Saint Miché, l'Abbé Lelégard m'învitit à aller auve lî prandre part dans la célébration d'la fête dans l'Abbaye du Mont St. Miché.
Ouaithe tch'i' tchiyait d'la plyie, l'Abbaye 'tait dêjà plieine dé monde quand j'arrivînmes-là et i' n'y avait pon d'pliaiches à s'assiéthe, mais j'eus la chance dé trouver eune bouanne pliaiche à mé t'nîn d'but à côté d'l'Autel où'est qué j'pouvais vaie les cérémonies. Ch'tait eune “concélébration” d'La Sainte Cène. V'la tchi veurt dithe qu'oulle 'tait célébrée par plusieurs célébrants à l'Autel en même temps et tch'y pranaient tous part. Lé chef célébrant 'tait l'Êvêque dé Coutances, et ses assistants 'taient l's Êvêques dé Bayeux et de Séez, lé Douoyen du Chapitre dé Coutances et l'Archiprêtre d'Avranches. Lé trône êpiscopal 'tait otchupé par le Cardinal-Archêvêque dé Rouën, capitale dé La Nouormandie. Comme il en est la couôteunme à ch't heu, lé sèrvice 'tait en Français et la foule dans l'Abbaye chantait rêponses et cantiques dé bouan tchoeu. V'la tchi valait la peine dé ouï les louanges du Bouan Dgieu chantées d'mème par tant d'monde!
Iun des prêtres qué j'rencontris quand l'sèrvice fut finni 'tait un moussieu tch'a nom Montgomery et tch'est l'curé d'eune pâraisse dans l'départément d'l'Orne. I' m'dît tch'il 'tait Êcossais d'naissance, et j'pâlînmes en Angliais. À ma grand' surprînse j'trouvis tch'il avait connu l'respecté défunt Canon Matthew l'Mathinné tout-à-fait bein, et il 'tait bein întérêssi d'ouï qu'ses chendres èrpôsent dans l'eglyise dé St. Hélyi. L'Réverend Montgomery avait 'té minnistre à Londres quand il 'tait janne et il avait connu Moussieu Athelstan Riley, Seigneu d'La Trinneté, étout, et fut întérêssi d'ouï qu' j'avais assisté à la consécration d'la chapelle du Mangni par l'êvêque dé Winchester quand ou' fut restaurée. Ch'tait en 1914 ou 1915.
Eune aut' pliaîsante rencontre qué j'eus en sortant d'l'Abbaye du Mont St. Miché 'tait d'vaie l'janne Moussieu Léonce Edwards, iun des fis à man vièr anmîn l'défunt Juge Hedley Le Riche Edwards, dé mémouaithe respectée. Auve sa danme, lé Sieur Edwards 'tait v'nu visiter l'Mont pour y passer l'drein jour de lus vacanches en France, et v'la tch'i' m'fit grand pliaîsi d'les vaie, et sustout d'ouï l'Sieur Edwards m'faithe à connaitre à sa danme souos l'nom dé
George d'La Forge.
Viyiz étout: