Lé Pâler nouormand dé not' Jèrri
A combein d'charme et d'bieauté pour mé.
Jé sis bein fyi d'ma pétite patrie:
Jé sis Jèrriais!

Lé miyeu dans l'monde du pôle à l' Afrique
Est l'Ile êrachie par nos anchêtres:
Chutte pèrte èrgrettait longtemps l'Amorique,
Mais à ch't'heu les Nouormands 'taient les maîtres,

Et vaîntchu par lé sort dé la dgèrre
Lé rouai Franc à Rollon s'est rendu,
Et Dgillaume a contchéthi l'Angliétèrre,
Et lus langue j'éthions èrconnu!

Lé Pâler nouormand dé not' Jèrri
A combein d'charme et d'bieauté pour mé.
Jé sis bein fyi d'ma pétite patrie:
Jé sis Jèrriais!

Not' Jèrri est nouormand et fidèle
A ses Ducs qu'i' fit rouais souveraîns.
Dé victouaithe en victouaithe vers les êtailes:
Ch'est la glouaithe qu'a montré lé destîn.

Mais pus chiethe qué nos Ducs dans nos prièthes
Est not' Ile dans la dgèrre incontchéthie,
Nos couôteunmes, nos louais et not' langue chièthe:
Le pâler national du pays!

Lé Pâler nouormand dé not' Jèrri
A combein d'charme et d'bieauté pour mé.
Jé sis bein fyi d'ma pétite patrie:
Jé sis Jèrriais!

Lé pâler jé saithons lé dêfendre
Comme j'avons dêfendu not' Jèrri,
Et nul rouai n'os'sait don' nous lé prendre
Car nos Ducs y sont trop attatchis.

Not' pâler vivra tréjous dans la glouaithe
Et enrich'cha la vie à nos êfants.
Tan pâler, Nouormandie însulaithe,
Ch'est la langue ès accents triomphants!

Lé Pâler nouormand dé not' Jèrri
A combein d'charme et d'bieauté pour mé.
Jé sis bein fyi d'ma pétite patrie:
Jé sis Jèrriais!