Les Pages Jèrriaises

Actualités

Le Ménage ès Feuvres,
St. Ouën.
Lé 15 dé juîn, 1974.

Moussieu l'Rédacteu,

J'n'ai pon 'té surprîns d'vaie qué l'Sénateu Cyril Le Mèrquand a avèrti L's Êtats tch'i' n'y avait pon assez d'sou dans l'côffre-fort pour payi touos l's apèrchus des Conmités. Quand j'lié les rapports des dêbats dans la Chambre et qué j'vai ches apèrchus-là, j'mé d'mande s'i' craient que l'Sénateu a dêcouvèrt eune minne d'or dé tchique bord. P't-êt' tch'i' pensent, étout, qué l'Baron dé Rullecourt muchit un trésor dé tchique sorte dans les maîsons d'la ville dévant rêvilyi l'Gouvèrneux Corbet l'matîn d'la Batâle dé Jèrri, et qu'ch'est pour ch'là tch'i' sont à pèrmett' ès grand' compangnies d'conmèrce dé l's acater et l's abattre en espéthance dé l'trouver et dé l'présenter à la Trésôr'rie!

Dans touos les cas, l'estatue du Rouai George dans l'Vièr Marchi a ieu la chance qué l's autorités li'ont acaté eune belle neuve câsaque dorée dévant qu' l'avèrti du Sénateu Cyril aie 'té publiyé dans la gâzette. I' la méthitait bein, lé Rouai, chutte belle câsaque-là, ayant arrêté tchînze ans pour. Nou ouait tréjous qu'tout 'tait mus fait l'temps pâssé qu'à ch't heu. Ch'est p't-êt' vrai, dépis qu'sa vielle câsaque a duthé tout chu temps-là. Mais i' méthitait la neuve d'autant pus tch'il a consèrvé la vielle si longtemps maûgré l'înjuthe du temps et l'manque dé respé des pigeons pour la rouoyauté.

J'tais bein întéréssi d'liéthe qué ch'tait l'neuf dé juilet mil sept chent chînquant'tch-ieune tch'i' fut officeillement înstallé dans l'Vièr Marchi. Il avait don 'té là quâsi trente ans d'vant la Batâle dé Jèrri. Comme il avait 'té à la tête dé s'n armée à la Batâle dé Dettingen, en Allemagne, en 1743, l'drein des rouais d'Angliétèrre à être à la tête dé ses armées sus l'camp d'batâle, i' faut penser qu'la Batâle dé Jèrri l'6 d'janvyi, 1781, né lî fît pon grand peux. Enfîn, sa neuve câsaque est si r'lîsante qu'ou pouorrait p't-êt' êblioui l's ièrs ès pigeons et les faithe s'en aller d'tchiquebord d'aut'. Dans chu cas-là i' né s'sait pon nécessaithe dé les tenvri.

J'vai qu'ma vielle école à St. Ouën, l'Êcole Wesleyenne, ouvèrte en 1861, a 'té abattue d'pis qué j'tchittis Jèrri l'mais d'novembre pâssé. J'en ai grand r'gret. À part du fait qué ch'tait un bieau bâtisse comme êcole, oulle avait 'té d'grand benefice ès vièrs St. Ouënais vivants et à un coupl'ye d'généthâtions tchi n'sont pus, dépis qu'oulle avait dêjà trente ans quand j'fus né. Toutes les fais qué j'pâssais par là j'm'arrâtais à la r'garder, et j'pensais ès bieaux jours dé ma jannèche quand j'grîmpais amont la muthâle pour aller dans l'bel à la pliaiche d'entrer par lé héchot. J'pensais ès mangnifiques gammes dé marbres et ès jeux des barres et d'saute mouton qu'nou-s-avait tant joué dans l'grand bel.

Ch'tait dans ses clâsses qué l'ABC et les trais R avaient 'té capuchis dans nouos têtes duthes. Et j'pensais à la disciplinne, apprînse en clâsse étout, p't-êt' un mio pénibliément mais sans rantcheune, tch'a 'té d'grand valeu dans la vie touos les jours dépis, viyant qu'ou nouos avait engendré l'prîncipe dé bouan travas et d'bouanne condite. L'êcole 'tait étout un dîngne monument à la mémouaithe des vièrs Wesleyens d'St. Ouën tch avaient mênagi, cèrtainement en faîsant d's êconomies extraordinnaithes, à bâti, pas seulement l'êcole, mais deux grand chapelles! Quand j'pâsse par là à ch't heu ch'est auve un air triste qué j'èrgarde sén empliaichement, dév'nu milieu d'conmèrce. Eune triste fîn pour lé sanctuaithe d'êcollage tch'était la dîngne Êcole Wesleyenne, Hommage à sa mémouaithe.

I' s'pâsse des drôles dé choses dans L's Êtats. Il' ont décidé d'subventionner les cheins tchi font valer des sèrres. Pourtchi pon les fermièrs? Sans doute, les cheins tch'ont des sèrres sont des growers. Lé fèrmyi n'conte pon. Ch'est vrai tch'i' faut d'l'hielle pour caûffer les sèrres et qu'l'hielle a renchiéthi, ch'est en tchi i' faut les subventionner. Mais l'fèrmyi, tch'a bein pus d'mînséthes à combattre dépis qu'tout san travas et toutes ses récoltes sont sujets à l'înjuthe du temps, n'est pon du rang des growers. Pourtant, tout lî couôte pus chi étout. I' faut d'l'hielle pour produithe d'la pétrole, et i' lî faut d'la pétrole pour faithe marchi toute sa machinn'nie d'fèrme. Comme lé grower i' paye la renchiéthe sus tout. I' n'a pon l'abri d'eune sèrre à faithe san travas dans l'hivé. I' faut tch'i' travâle au vent, à la fraid et la plyie. Tchi dû mêtchi, et tchi duthe vie ! Ches jours, la s'crèche est responsabl'ye pour des faillies récoltes d'patates, et j'ai ouï dithe tch'i' y'a des fèrmiers tch'en ont eune si faillie tch'i' né f'thont pon assez d'ssus pour payi l'couôtage dé la dêfouithie.

A m'n idée, les fermièrs ont tout autant bésoin d'subvention comme les growers, et j'ai 'té êtonné d'vaie qu'les membres d's Êtats, tchi sont campangnards et dans bein des cas fèrmièrs ieux-mèmes et tch'ont connaissance dé cause, n'en ont dit rein en séance dans la Chambre. Y'a-t-i' tchique membre tchi s'en va prendre la peine dé s'en d'menter?

GEORGE D'LA FORGE
 

Viyiz étout:

 

Les Pages Jèrriaises