San Antonio, Texas,
U.S.A.
Lé 18 dé févri, 1967.
Moussieu l'Rédacteu,
Les gâzettes dé Jèrri arrivent ichîn pus vite tch'i' n'avaient fait pour eune volée. J'en ai r'chu deux chutte sémaine, les cheinnes dé janvyi 19 et d'janvyi 12. Véthe, dans ch't ordre-là - ch'est souvent d'mème! Enfîn, pour bein tch'il' arrivent toutes en fîn d'compte ch'est tout ch'tch'i' faut, car nou peut au mains liéthe les nouvelles sans en mantchi la siète, et ch'la est d'împortance pour lé Jèrriais à l'êtrangi!
Accouothe un meurtre dans nouot' vielle pétite Île, si paîsibl'ye et trantchile aut' fais! J'mé r'souveins qué quand i' y'en eut iun dans man janne temps et qué l'coupabl'ye fut pendu - ch'tait-i' pon en 1908? - nou frémissait quand nou v'nait à penser qu'pathelle chose pouvait s'faithe en Jèrri, et n'en v'la combein - trais ou quatre, i' m'sembl'ye - dans l'couothant du mème nombre d'années ou mains! Ch'est tèrribl'ye! I' faut espéther qué l'coupabl'ye s'en va êt' dêcouvèrt. À m'n idée, ch'est eune bêtise qué l's Angliais ont fait quand il' ont aboli la peine dé mort, car les meurtriyèrs la méthitent bein!
Eune chose tch'i' m'pathaît drôle est la nouvelle dans la gâzette du 19 dé janvyi qué l'gérant d'la compangnie dé p'tun est d'avis d'arrêter la vente en gros dé cigarettes ès boutiques tchi voudraient les vendre au d'bit à miyeu marchi. Pour bein qué l'prix en gros n'est pon en jeu, tch'est qu'ch'la peut li faithe, si l'boutitchi est satisfait d'réduithe san profit pour lé bénéfice dé ses pratiques? Ichîn, en Améthique, ch'est un fait bein èrconnu qué la competition est l'âme du commèrce, et j'avons mème eune louai - lé Sherman Anti-Trust Act - tchi d'fend ès commèrçants, en gros ou au d'bit, dé s'associer pour êtablyi un prix commun d'vente d'autcheune marchandise. Ch'est don eune affaithe dé vendre au miyeu marchi pour attither des pratiques, et v'la tch'a eune tendance dé garder les prix bas. Ou-s avez grand bésoin d'tchiquechose dé mème en Jèrri.
J'vai tch'i' s'en vont faithe les gens payi pour stationner lus motos à l'aérodrome à St. Pièrre. J'pense bein qu'ch'est viyant tch'i' y'en a tch'en font un abus, mais à m'n idée ch'est c'mode dé pouver stationner pour un p'tit quart d'heuthe, sans aver à payi pour, quand nou va d'mander à tch'il' heuthe qué l'avion sort pour Dgèrnésy, ou quand nou va à la rencontre dé la bouannefemme tch'a 'té à Dinard acater un fricot d'colînmachons pour Dâlpheusse d'Aubert. I' dév'thait au mains y'aver un p'tit coin libre pour ches'-là! Autrément, i' faut admèttre qué les cheins tchi laîssent lus motos là pour un jour ou deux quandy tch'i' vont en Angliétèrre ou ailleurs pour affaithes dév'thaient payi pour lé stationnement. I' faut craithe tch'il est possibl'ye pour lé conmité des Êtats enchèrgi d'chu contrôlage-là d'arrangi tchiquechose dé mème.
J'vai qu'tchitch'un a c'menchi un commèrce dé d'bitage dé vièrs motos dans la Vallée d'Bellozanne, et la gâzette montre deux portraits des motos. Ch'est damage qué l's autorités responsabl'yes ont pèrmîns d'ité, viyant qué ch'la s'en va agrandi tant qu'v'la tchi finnitha par couvri eune grande êtendue du vaîsinné. Ch'est un commèrce tchi fait bein dans cèrtaines contrées ichîn en Améthique. Tchique îndividu acate les vièrs motos pour deux ou trais louis et c'menche à les dêlabrer pour sauver les parties du moto tchi sont acouothe en êtat d'sèrvi, et pis i' les vend à bein près à maîntchi prix des neuves. En fîn d'compte, les chassis et ch'tchi reste dé la vouaituthe sont vendus ès marchands d'vièr fé. Malheutheusement, les carcasses des motos sont gardées aussi longtemps comme i' y'a d'chance d'en vendre eune partie, et l'chînm'tchièthe dé vielles vouaituthes à maîntchi rouies et dêlabrées agrandit tréjous. À ches drein, l'Président Johnson a dêcliathé s'n întention d'aver eune louai passée pour aboli chu commèrce-là, viyant qué v'la d'sahonte les campangnes. Né laîssiz pon d'ité prandre pid en Jèrri! Y'a mouoyen d'env'yer les vièrs motos dans la carrièthe du Mont Mado et s'en dêbarrasser d'mème, et en mème temps consèrver la bieauté naturelle dé la Vallée d'Bellozanne!
J'ai r'mèrtchi, étout, qué l'nombre d'motos enregistrés dans l'Île augmente tréjous. Y'en a dêjà bein d'trop, sustout des cheins à louer, et l's Êtats dév'thaient y porter r'miède. Né v'la tchiquechose pour les nouvieaux membres à entanmer!
La veue du portrait d'la belle andgulle dé pus d'chînquante livres, prînse par lé Sieur Clarke à la vaûle, mé fait envie d'en mangi un bouan fricot, d'andgulle! Et v'la tchi m'ramémouaithe qué - grâce à La Tante Vîne et Madanme Kathleen Le Maistre - j'en eus deux-s'trais bouans fricots l'êté passé en Jèrri. Comme j'l'ai souvent mentionné ès Améthitchains, i' n'y a pon d'femmes au monde tchi peuvent faithe d'la soupe et rôti d'l'andgulle et d'la mouothue comme la femme dé fèrme en Jèrri! Lé long viage d'ichîn-là vaut la peine quand ch'né s'sait qu'pour en mangi!
George d'La Forge
Viyiz étout: