Fort Lauderdale, Florida,
U.S.A.
Lé 15 dé févri, 1975.
Moussieu l'Rédacteu,
Ouaithe tch'i' prend acouo chinq ou siex s'maines pour les gâzettes à v'nîn d'Jèrri ichîn, i' c'menchent à v'nîn rédguliéthement s'main auprès l'autre. La cheinne du 27 dézembre, 1974, tch'est v'nue chutte sémaine, a plusieurs articl'yes au sujet d'la résîngnâtion comme Bailli d'Messire Robert Le Masuthi, et l's êloges des mêssieux d'la Cour Rouoyale et d's Êtats et d'aut' înstitutions, et les présents tchi l's accompangnent, sont preuve dé l'estînme et du respé qu'tout l'monde a pour li et sa charmante danme.
J'n'ôse pon m'mett' du rang des mêssieux et orateurs dé la Cour, sachant qué jé n'sis qu'un pouorre paysan né ès Landes dé St. Ou, mais j'ôse quand-mème ajouôter mes souhaits d'heutheux jours et d'bein d's années dé r'traite à Moussieu L'Masuthi et à sa danme. J'espéthe tch'i' m'pardonnna d'l'appeler "Moussieu" à la pliaiche dé Messire pour chutte fais, car pour un Jèrriais lé titre d'Moussieu est aussi grand comme Messire - et bein pus familyi.
P't-êt' bein qué Moussieu l'Bailli L'Masuthi n'tait pon aimé par tout l'monde. Il éthait 'té tout seu d'sa sorte s'i' y'avait 'té! Mais eune chose est bein cèrtaine: Il 'tait (et est acouo, sans doute) aimé et respecté par tout l'monde tch'ont ieu l'honneu et l'privilège dé l'connaître. et pèrsonne né eut lî r'prochi dé puer d'ordgi, car i' pâle à tout l'monde et i' n'oublie pon ses anmîns. J'n'ai pon oublié qué ouaithe tch'i' n'y avait presque pon d'run pour sé t'nîn d'but dans la Cour Rouoyale quand i' fut assermenté Bailli y'a douze ans, et qu'bein des gens d'bein et d'êducâtion éthaient quâsi donné lus bras drouaite pour êt' învités à la cérémonie, i' m'fit l'honneu d'êt' iun d'ses învités.
Et combein d'fais qu'j'ai ieu d'dit en ville par des travailleurs dans La Rue des Trais Pigeons: "Moussieu l'Bailli n'a pon d'ordgi comme un tas d'aut' grosses têtes qué nou vait par les c'mîns: i' nouos dit tréjous 'Bonjour' en pâssant". Né v'là un têmoignage tchi vaut la peine! Et Madanme Le Masuthi est ieune des pus charmantes danmes qué nou piêsse rencontrer. Piêsses-t-i' joui d'eune longue et heutheuse èrtraite touos les deux, plieine dé bouanne santé et d'pliaîsi d'vivre. Et mes miyeurs souhaits et honmage respectueux à Moussieu l'nouvieau Bailli et ès nouvieaux Mêssieux d'la Couronne.
Ch'est dév'nu întérêssant dé r'garder es portrais des membres d's Êtats dans la gâzette, tchi dait en aver plusieurs dessinnés souos difféthentes circonstances, car ou pathaî pouver en produithe un spécial pour châque occâsion. Lé chein du sénateu Cyril Le Merquand dans la gâzette du 27 dézembre, à côté d'l'articl'ye où'est tch'i' dit tch'il a r'gret qu'Dgèrnésy a décidé dé n'pon augmenter la taxe d'enregistrément des compangnies commèrciales, est iun des bieaux. V'là tchi m'annonce qué la gâzette approuve dé li chutte fais. Quand i' n'voulit pon pâler d's affaithes officielles ès r'présentant ("reporters" en Angliais) l'êté pâssé, i' n'éthait janmais gangni un prix d'bieauté auve lé portrait d'li tchi pathut dans la gâzette!
Et ch'est la mème boutique dans l'cas du Député Ph'lipe de Veulle. Dans des temps san portrait li fait honneu, mais un jour qué sa rêponse au "reporter" d'la gâzette 'tait "No comment!" san portrait éthait fait honneu parmi les cheins du "Rogues' Gallery" qué nou vait dans les stâtions d'police en Améthique!
La mention d'la Milice Rouoyale dans l'temps d'la Dgèrre des Boèrs y'a septante-chînq ans, dans la colonne "Looking Back", donne lé grade dé Sèrgent d'Troupe au Sieur T. Louis de Faye qu'j'ai connu tout à fait bein - et l'Sèrgent R. B. Colley étout. Quand j'tais dans la Milice mé-mème, dé 1908 à 1915, lé Sieur T. Louis de Faye 'tait Cap'taine et Quartchi-Maître du Bataillon du Ouest. Il avait un unniforme dé parade èrmèrquabl'ye. Touos l's aut' officièrs et les soudards avaient des bliues braies et rouoges câsaques comme unniforme dé parade, mais l'chein 'tait un mêlange d'unnoforme dé housard et d'dragon. Jé n'sis pon trop seux d's couleu, mais ché n'tait ni bliu ni rouoge, auve un chapé pûtôt housard. L'habit d'exèrcice pour tout l'monde 'tait l'kâki, sans doute. Eune aut' chose qué j'mé r'souveins du Sieur de Faye, tchétait un homme charmant et affabl'ye, est qu'san corps 'tait couvèrt dé tatouage. San dos, sé estonma, san ventre et ses bras 'taient tatoués d'înmages dé toutes les sortes, des tchilieuvres, des dragons et bêtes féroces et Bouan Dgieu sait tchi. Et i' prannait un întéthêt dans l's affaithes officielles dé l'Île, et j'ai ouï dans man janne temps tch'il éthait bein aimé êt' Juge mais tch'i' savait bein tch'i' n'éthait ieu autcheune chance d'êt' assèrmenté viyant tch'il 'tait bouochi.
Lé Sèrgent R. B. Colley 'tait l'couôtuthyi par excellence dé l'Île et avait sa couôtuth'thie dans La Rue d'Driéthe (King Street) à bein près où'est tch'est la Maison Gaudin à ch't heu. La rue avait l'charme du vièr monde dans chu temps-là.
George d'La Forge
Jersey Evening Post 6/3/1975
Viyiz étout: