Ch'èrest mé, Fraînque Lé Maistre, gris ventre dé St Ou... Jé n'peux dgéthe m'opposer dé vouos env'yer acouo tchiques patholes comme siette à ma lettre qu'ous eûdrent la bouonté dé r'produithe dans vouot' gâthette du sept dé chu mais. Chutte fais, dgia, j'mé d'mente dé vouler haler sus la gambe au Président d'La Sociêté Jèrriaise.
Un anmîn à mé veint dé m'ramémouaither à ches drein dé tchiques brîns d'sagesse prononcés, auve bein d'aut's întérêssantes choses, par chu moussieu dans les 1959 à l'occâsion d'un discours (The Norman Heritage in Jersey Today) tchi donnit à La Sociêté Jèrriaise à Londres, eune copie dé tchi j'ai mé-même siez mé étout:- "Jersey's peculiar and advantageous situation today owes much. in many different ways, to our Norman heritage. Let us all be fully aware that this heritage will not be preserved if apathy or indifference prevail".
Là, Moussieu l'Rédacteu - j'ai pensé qué v'là tchi n'pouôrrait sinon amûther gentiment d'vouos lecteurs. Car et mais nou sé d'mande, n'est-che pon, si ch'est don qu' Moussieu Crill éthait changi d'idée dé d'pis chutte vingtaine d'années-lo? Eh bein ma fé, tant qu'à, jé sommes ofûche tous înclyîns à êt' vithouards, viy'-ous bein. Mais don, j'ai tréjous ouï dithe ès vièrs tch'i' n'y'a rein d'seux dans chutte vie!
Dr Frank Le Maistre,
La Brecquette,
L'Etacq,
St Ouen.
Avri 1982
Viyiz étout: