Les Pages Jèrriaises

En France

Le Ménage ès Feuvres,
St. Ouën.
Lé 16 d'octobre, 1971.

Moussieu l'Rédacteu,

M'èrvélà en Jèrri auprès aver passé l'mais d'septembre en France - la Belle France! Ch'est vrai qu'oulle est belle - à des bords. Ch'est comme dans touos les pays. Bein souvent nou m'dit: "Vous tch'avez viagi partout l'monde; tch'est tch'est l'pus bieau pays?" Eh bein, ch'est eune tchestchion tchi n'est pon aîsie à rêpondre, chette-là. Châque pays a san charme. Affaithe dé bieauté naturelle, iou qu' y'a pus bé qu'nouot pétit Jèrri? Et comme spectacl'ye d'la natuthe tch'est qu'nou pouorrait vaie d'pus împôsant qué l'Grand Canyon en Améthique et les Montangnes Rotcheuses du Cannada? Et comme architectuthe orientale les templ'yes Îndous dans l's Îndes et les templ'yes Boudhistes au Siam, et dans l'ouest les cathédrales dé l'Europe?

Mais pour èrvénîn à la France. En c'mîn pour l'Espangne, m's anmîns Edgar Rive et sa danme mé donnîdrent eune pliaiche dans lus moto jusqu'à Aigre, en Charente. Ch'est pliaîsant d'viagi auve ieux car il' arrêtent en c'mîn, matîn et arlévée, à faithe eune tâssée d'thée et mangi un mio d'gâche, et nouot' quémîn par Rennes et Angers nouos condîsit l'long d'la rivièthe Loire atout ses bieaux châtchieaux. J'nouos arrêtînmes à Poitiers, ville bein connue ès Angliais dans l'temps du Nièr Prînce. Ch'tait à Maupertuis, à côté, tch'i' fit Jean Le Bon prisonnyi en 1356.

À Aigre, mén anmîn l'docteu Juge est embarrassé quâsi niet et jour à souangni d'ses malades dans la campangne où'est tch'i' va les vaie deux fais par jour, et i' n'est janmais seux d'pouver passer la niet au liet. Comme en est l'cas dans les campangnes ches jours, les jannes dé là-bas n'restent pon sus les fèrmes. I' veulent lus mathier et acater moto et télévision et aut' affaithes tout en même temps, et i' n'peuvent pon gangni assez d'sou auve lus gens sus la fèrme pour faithe d'ité et i' s'en vont dans les villes, et ch'est l's anciens tchi continuent la vie d'lus anchêtres à labouother la tèrre et êl'ver des bestchieaux. Les clios là l'tou sont plieins du grain d'Espangne. I' pathaît qu'la grand' partie d'chutte récolte-là est env'yée en Allemangne pour faithe des matchièthes en plastique.

Les Français n'changent pon fort. I' trempent acouo lus pain dans lus café au matîn, et i' craient acouo tch'i' faut baithe du blianc vîn pour "mieux goûter" cèrtaines choses à mangi et du rouoge pour d'aut' choses. I' trouvent tréjous qu'ch'est drôle qué j'peux mangi sans baithe en mème temps, et qué j'peux apprécier l'fronmage sans baithe un cèrtain vîn pour li donner du goût. Et i' pâssent des heuthes assis dans un café à baithe eune fais et r'garder l'monde pâsser dans la rue - la mème rue tch'il' ont veu pour des années. Et quand i' lus entre-pâlent ch'est à tue-tête, comme s'il' 'taient mârris!

Un tas d's ornéments d's églyises ont dispathu - dans l'Midi sustout, et nou vait dans les gâzettes qu'un tas dé statues ont 'té volées par des malfaiteurs et vendues ès marchands d'vieillâqu'sies. Les prêtres dîsent la Mêsse en Français à ch't heu, et v'là tchi m'fait penser au temps qu'Moussieu Pépîn et Moussieu Barascud célébraient la Sainte Cène en Français à St. George quand j'tais mousse. Les patholes sont à bein près les mèmes dans l'Églyise Romaine comme dans la nouôtre.

I' n'sont pon contents au Président Nixon, les Français. I' l'bliaûment pour aver mîns un împot d'dgix pour chent sus les motos et marchandises tchi sont exportés en Améthique. J'tais oblyigi d'lus dithe qué comme lé Général de Gaulle sé faîsait un d'vé de vilyi au bein-être dé la France, lé Président Nixon fait la mème chose pour l'Améthique. Eune chose qué j'ai tréjous trouvé bein drôle est qué l'homme ordinaithe en France crait qu'sa dette dé dgèrre dé 1914 a 'té remboursée à l'Améthique y'a longtemps. Si seulement lé montant d'l'întéthêt sus chutte dette-là, et sus les dettes deues à l'Améthique par d'aut' pays dépis bein d's années à ch't heu, 'tait payi, v'la tchi la mett'tait en condition d'aboli touos l's împôts!

L'avèrti d'tchitter l'pays qu'l'Angliétèrre a donné ès espions Soviétiques a châtchi les consèrvateurs Français. I' pathaît qué l'Parti Communiste en France est l'pus grand en Europe à ch't heu, ayant mème dêpassé l'chein d'Italie. Ch'là, et l'fait tch'il est ben connu qué l's ambassades et consulats Russes dans touos les pays du monde sont plieins d'espions travaillant souos les titres dé ségrétaithes et r'présentants d'conmèrce, etc., c'menchent à gèner les gens tch'aiment la libèrté, et i' sé d'mandent si l's autorités sont à prendre les précaûtions nécessaithes pour protégi l'pays contre l'espionage.

Enfîn, j'ai ieu à dithe "à la préchaine" à mes bouans anmîns en France, et ès bouans fricots d'hîtres et d'colînmachons pour m'en r'vénîn passer tchiques sémaines en Jèrri dévant m'en r'aller en Améthique pour êcaûffer ma poutchie d'vièrs os au solé du Texas et d'la Floride ch't hiver.

George d'La Forge

 

Viyiz étout:

 

Les Pages Jèrriaises