Pourtchi qu'j'avons l's Êtats d'Jèrri? Tchil Êtats? Eh bein, not' pétite assembliée fut fondée auve les r'présentants des trais êtats: la Couronne (lé Bailli et les Juges), l'Églyise (les Recteurs) et l'Peupl'ye (les Connêtabl'yes). Not' système a changi, mais sans aver eune révolution. Mais tout a 'té bein difféthent siez nos vaîsîns en France.
Lé quatorze dé Juilet, 1789, fut la date quand les gens du Tchièrs Êtat attatchîtent La Bastille, lé symbole du pouver du Rouai Louis XVI à Paris. Tout d'même, la Révolution c'menchit au mais d'Mai quand Louis app'lit les êlections ès Êtats-Généraux où'est qu' les deux Êtats d'l'Églyise et d'la Noblièche dêniaient les propositions du Tchièrs Êtat (lé Peupl'ye). Enfîn, i' révoltîtent et êtablyîtent un nouvieau gouvèrnément, l'Assembliée National.
Maugré tout chenna, i' y'avait d's ardguments continnuels entre lé Rouai, les Radicaux et les Libéthaux. Eune nouvelle Constitution fut fondée sus La Déclarâtion des Drouaits d'l'Homme pouor donner Libèrté, Êgalité et Fratèrnité, la justice et lé vote à tout l'monde.
Duthant la dgèrre contre l'Autriche et la Grande Brétangne les Parisiens n'avaient pon assez d'pain; et Mathie Antoinette 'tait s'posée d'aver dit “qu'i' mangent d'la brioche” - eune aut' sorte d'pain – pas “qu'i' mangent d'la gâche” !
Mais l'Rouai et la Reine fûtent dgilliotinnés, et duthant l'Règne dé Terreur dgiex-sept mille pèrsonnes fûtent tuées.
Assa, tout est paisibl'ye ach'teu, et i' n'y'a pus d'dgilliotinne et j'pouvons touos affaûrder du pain, d'la brioche, ou même d'la gâche ou des mèrvelles. J'souhaitons eune bouonne fête à nos anmîns Français – et ès membres d's Êtats!
Ralph Nichols
Viyiz étout: