Les Pages Jèrriaises

How Piteur and Sam Go to Dinard



Quand nou pense que chu pouore médjan d'Samuel – l'sien d'la Chronique, et qui d'meuthe avec nous – n'avait oquo jommais sorti d'l'Ile! Ch'es li même qui m'le dit en plieuthant, l'aut' sé. Ch'n'est pon l'envie qui m'manque, Moussieu Pain, qui m'disait, ni l'manque de sous; ch'est mes ners. "Quand j'sis a man fin-seu parmi des femmes, j'sis prins du trembliot, la patholle me manque, j'vins tout nerveux, et comme y'a trejous des femmes plien les "steam" et que j'n'ai oquo pon trouvé persounne ov tchi viagi – j'n'ai oquo jommais 'té pus lien que l'viers Châté!

Chu pouore médjan! Hé bin, pis qu'ch'est d'même, man garçon, que j'lis dit, ch'est me qui s'rait tan pilote la prechenne fais, dit que ch'te l'dit.

Ch'est-tan-tchi, quand j'vit sus la gazette qu'y'avait un trip a Dinard Mardi passé, je n'fit ni yeunne ni deux, j'dit a Samuel: set prêt d'main matin a siex heuthes et d'mie, tu t'en vains ov me en France! L'pouore èsfant n'eut que d's'èsvonni d'jouée et n'eut de r'pos qui n'eusse embrachi tchiq'un d'la famille: y s'adounnit qu'Laizé entri justemant, et ch'fut l'yi qu'eut l'kiss. Oul eut l'air bin èstounné, et dit a Sam qu'patheil chance n'y'arrivait qu'trop rar'ment a ch't'heu que s'n'houmme prennait d'l'âge.

J'arrivimes sus la cauchi en bouan temps: et coumme Samuel n'savait compté en Francs, i' m'dounnit les très louis qu'il avait apporté et que j'mint dans ma pouchette ov la pieche d'èstchu qu'Laizé m'avait alloué pour despensé a terre. J'vos d'mande! Eunne pieche d'èstchu pour un jour à Dinard, et oquo ch'fut en grounnant hardi que j'l'eut, et n proumettant de n'pon fliantchi mes sous d'un bord et d'l'autre. "N'te gène de rin que j'dis a Sam en serrant ses très louis; j'paiethai partout, et j'comptons a la r'venue."

Y'avait un peupye! Tchiq' chose près d'chinq chents, et nou s'assiévit coumme nou pu un mio partout – sus des bancs, sus du filain, sus l'écoutilles, l's'uns sus l's'autre, si s'adounnait.

Bétot ne v'la Sam qui c'menche a blianchi, et pis a jauni, et pis a touoné l'siers, et pis...... et n'y'avait pas d'baissinne nulle part! J'fit sinne a un mat'lot qui m'aidji a l'emné l'avant du navithe, j'l'accotimes contre eune ancre, la téte bin en d'hort du navithe, j'lamathimes solide ov un but d'filain, et, pour qu'ou n'fusse pon perdue, j'mint sa castchette sans sa pouchette – et pis j'm'en fut dèsjeunné ov le Cap'taine dans la chambre.

N'y'a rin itet coumme un bouan dèsjeuné d'viande et d'jambon et d'piclyes pour vos dounné du tcheu; ch'est tan tchi j'tais tout a fait numétho yun quand nou c'menchi a vaie la cote de France.

J'm'en fut l'avant vaie Samuel que j'trouvi l'co souos l'aile et mo coumme un torchon, J'lis fis apporté eunne tasse de tée; v'la tchi l'rèsmotchi un mio et s'en vint avec mé r'gardé les p'tites batieaux sus la rade.

Et pis nos v'la arrivés! Et ne v'la touos les p'tites vedettes a s'moustré a l'entou d'nous pour nos porté a terre. Y'eut hardi d'pous'ie et d'hallie pour embertchi la d'dans; tout l'monde voulait être des preumiers a dèsbertchi, et Sam ne laissait pas couore ma main tout l'temps. A forche de poussé, et en lus disant "Quar'ous que j'passe, j'sis sus eunne gazette!" nos v'la dans la deuxième vedette et dans djix minutes sus la cauchie.

"Avez vous quelque chose a déclaré?" s'fit un douanier en s'matant endret Samuel. "Nennin, Moussieu, s'fait Sam, sinon qu'j'ai 'té bin malade a bord et qu'ch'est Moussieu Pain qu'a touos nos sous viyant que j'n'comprends pas bin les francs."

L'douanier cru qu'Sam se motchait d'li, et pâsli de l'emné au violon. Mais quand j'y'eut pâslé bas a l'ouothelle en clyintant un yi du bord de Samuel..... ou comprenez ch'que j'dit.... un mio nieaumin. L'douanier clyînti étout, s'mint a rithe – et nos v'la a bannon.

PITEUR PAIN

J'vos dithai ch'qu'en fut du reste la s'maine tchi vint.

8 d'Août 1913
 

Viyiz étout:

 

Les Pages Jèrriaises