Nos v'la don à Dinard. La preumié chose a faithe, que j'dit a Sam, ch'est d'prendre du lest d'vant que d'gabathé pus lien; désjeunons.J'entrimes don dans un hotel, et coumme il 'tait oquo trop bouonne heuthe pour le r'pas ordinaithe, je c'mandi a mangi pour deux; eunne omlette au lard, eunne steak ov des pommes de terre, des ledjeummes, du fromage, tchiq mio d'fruit, deux boutelles de vin, et du café, pousse café, et eunne finne litcheu pour rainchi. Tandi qu'ils 'taient a prépathé cheunna, j'nos assiévimes sus un banc a r'gardé passé l'monde. Djétte me chutte belle française la, que j'dis a Sam en li poussant l'coud. Hein! I't'en faudrait eunne telle pour la sethée d'la Bataille de Flieurs. Mais Sam n'tait pon en r'gardant les filles. I' pendait oquo l'aile, ses yeux 'taient caillyis, et i' dit qu'si n'm'en 'tait d'rin, i' voudrait dormi un soumme. Ches-tan-tchi, nou l'couochi sus un sofa, et ch'fut me qui fut forchi d'mangi tout l'dèsjeunné. J'y mins l'temps, mais j'en r'pathi dans les très quart-d'heuthes! V'la tchi fit un divers creux dans yun des louis a Sam.
Quand j'eut fini l'pousse-café, j'forchi Sam a prendre eunne tassée d'tée et la maintchi d'un p'tit four et pis nos v'la d'hort. J'tais pour crouési a St. Malo, mais Sam en avait yeu assez pour eunne matinée, ch'est pourtchi j'prinmes un tramouais jusqu'a Saint Lunaire ou-ès qu'nou d'cendi. J'm'abusi a mangi un houmard et des beurrées tandi qu'Sam s'esprouvi sus du m'lon. Tu t'en r'pentithas, que j'lis dit. Et d'fait, i' fut forchi d's'en r'penti au mains chinq fais dans la journée.
Nos v'la à St. Briac; n'y'a pon grand chose a vaie a Saint Briac; eunne forge, et des femmes a lavé du linge sale dans eunne sale mathe. Ch'est-tan-tchi, après avé mins Sam dans eunne chambre d'auberge pour dormi et pensé au m'lon, j'lus dis de m'servi tchiq' petite chose a mangi pour tué l'temps. J'tais oquo a tâche sus un gobîn d'fromage quand Sam r'dévali tout blianc, et coumme l'tram suffliait, j'rentrimes du coup à Dinard: il 'tait d'viers très heuthes très heuthes et d'mie. Nou buzardi bin douoch'ment (raport au m'lon) par la ville a r'gardé les boutiques; Sam avait d'la peine a s'trainé en me t'nant l'bras. Tu pensais sans doute acaté un p'tit souv'nir pour ma Lonore? que j'dit a Sam, en le r'gardant. Nouffet dja, qui dit, j'n'y pensais pon eunne mie. Ch'est eunne chose qui s'fait trejous, Sam, que j'lis dis: nos gens s'aient d's'apointés si nou n'pensait lus apporté un p'tit souv'nir. Hé bin, si vos pliaisait lus acaté tchiq' chose a mes frais, dit Sam, car de me – j'voudrais être couochi. La d'sus, j'le condisi sus un banc auprès d'eunne pompe endrét l'Marchi a paison, et j'm'en fut chouési tchiq' chose pour nos gens. J'acati eunne grosse gache pour Lonore (j'en aithai ma bouonne part), eunne crabe-a-co pour Laizé (l'docteu y'a d'fendu d'en mangi) et eunne pathe de bottes pour me même. J'acati etout eunne pathe de leunettes pour Sam, mais coumme i' n'se sert pon d'leunettes, che s'a me qu'en profit'ai – j'les ai chouési a ma veue.
N'y'avait persounne auprès d'la pompe quand j'r'appréchi du marchi a paison, mais j'avisi Sam qui r'sourdait de driethe eunne pile de bathis – chu fichu m'lon! – et nos v'la bétot ensembye sus la cauchie. Autant diné eunne dernié fais en attendant la vedette, Sam: tchès qu'tu'en cré? J'eumes du paison fracachi pour deux que j'mangi tout seu, tandi qu'Sam chuchait eunne preunne en me r'gardant faithe.
J'eumes bieau temps a r'vené. Quand Sam fut comfortabyement pliéchi dans eunne douole de filain sus l'avant, ov un boutchet pas bin lien, j'm'en fut faithe les chent pas sus l'pont, feummé l'restant de cigares a Sam, d'visé ès matlots; et pis tchiq' temps d'vant que d'dèsbèrtchi mangi tchiques beurrées et bethe du tée dans la chambre.
Nos gens nos rencontrites sus la cauchie. Laizé avait prépathé eunne bouonne pliatlée d'pais-d'mai et d'lard pour not' soupé – Sam ne prînt qu'eunne tassée d'oxo. Et pis j'set'limes nos comptes. I' m'restait très sh'lings et chinq sous en pouchette. J'en dounni la maîntchi a Sam – l'pouore médjan n'est pas riche; je n'voudrais pas hallé sus li pour rin au monde – et l'restant a ma femme. La! que j'lis dis.J'espèthe que tu n'te plieindras pon qu'j'ai gazouolyé tes sous? Tu m'avais dounné un éstchu: j'te rapporte quarante sous, eunne crabe-a-co, eunne gâche (dounne nous un morcé a gouoté) et j'avions partagi touos les frais entre me et Sam!
PITEUR PAIN
Sam n'est pas si r'counaîssant coumme i' dév'thait, d'avé té piloté par me. Ch'est un ingrat!
Viyiz étout: