Mousieu, - J'n'avais pas pus idée d'allé à Cherbourg qué d'allé siez l'Pape, quand, Samedi passé, coumme j'crouèsais l'Vier Marchi, l'Protchulleux d'la Reine mé dit: "Vos n'allous vais lé Tzar, Chantgnyi?" Ma fingre, je n'y'ai pon pensé, qué j'fis; "j'contais allé Lundi au vrai-venu." "Djantre s'sé du vrai-venu," qui dit, "v'nez-y, j'éthons du fonne." Et, ma fé, quand j'en pâsli à Nancy ou m'encuothagi a y'allé, et ches-tan-tchi, Lundi matin, j'arrive sus la cauchie. Y faisait un temps péthissable, coumme ou savais, et ben des pièches n'voulites pon s'embertchi.
Pour dé mé, quan j'vi le Recteu de St.-Sauveux et un autre ministre embertchi j'savais bin qui n'nos arrivthait pon d'mèschet.
J'taimes pas mal dé gens d'importance à bor. Y'avé mé, Moussieu l'Counnèstable d'la ville, Moussieu Vaudin d'la p'tite Cour, et sa dame, Moussieu l'Recteu d'St.-Sauveux, l'Député d'St.-Cliément et madame, etc.
J'nos entr'counnaissaimes quasi tous. Pour passé l'temps nous s'proumnait sus l'pont en feumant, d'autres d'visaient ente yieux; tchiqu'uns jouaient à tchès'qu'empliethai un basin le preumi. Entre quatre dé nous jé jouîmes eunne gamme d'all-four. J'gagni trente-deux sous dans mains d'eune dé-y-heuthe, et, pour né pon les r'perdre, j'dis qué jé'n voulais pon continué à joué si gros jeu et j'm'en fut payi eunne fais d'ginger cordial à Moussieu Durell, tch'avait la mine un mio èsbliavée; y m'promint d'pâslé pour mé si y'avé, pus tar, eune chance pour la pièche de greffi d'la Cour, inspecteur des marchiers, ou prummi aide sécrétaithe de l'Azil.
J'n'ai pon l'temps, et n'y'éthait pon assez d'run sus vot' gazette pour mertchi tout ch'qué j'vîmes. Y faisait un temps pitchablye. Un passagi avé oublié d'apporté un passe-partout ou passe port et éthait yeu a resté à bor tout l'temps sans mé. J'montri ma carte:
Viyiz étout: