Les Pages Jèrriaises

Lé régiment appelé 'Les Russes'!

San Antonio,
Texas, USA.

Lé 11 dé juin, 1983.

Moussieu l'Rédacteu,

Dans les "Occasional Publications" dé "The Jersey Society in London", publiyées y'a 50 ans, Moussieu George Quesnel Larbalestier (1851-1933) nouos dit tch'i' n'y avait pon fort dé cârrosses en Jèrri en 1870. Les docteurs faisaient lus visites ès malades à j'va. Et quand l's hommes d'affaithes avaient à aller consulter lus clients dans la campangne i' y'allaient à j'va étout.

Eune êtabl'ye en Ville fournissait cârrosses, j'vaux et selles à louage, et lé louage, sans doute, 'tait chèrgi au compte du client. Eune fais, Moussieu Larbalêtchi avait un contrat à pâsser pour un client dans la campangne tch'était malade. Eune cârrosse à deux j'vaux fut louée pour lé porter, et Moussieu l'Bailli, les deux Jurés-Justiciers et l'huissier, au domicile du client. Auprès la pâssâtion du contrat et tch'il 'tait temps dé r'monter en cârrosse pour lé r'tou à St. Hélyi, lé cocher avait dispathu dans l'aubèrge à côté. Lé Bailli (Messire George Bertram) d'mandit au huissier s'i' pouvait cachi. "J'n'ai janmais cachi eune cârrosse à deux j'vaux," lé huissier li dit, "mais j'veurs bein y'êprouver!"

Moussieu Larbalêtchi nouos raconte tch'il avait d'l'expéthience pèrsonnelle entouor des j'vaux et tch'i' s'assiévit à côté du huissier pour en cas d'aîgue à cachi, mais qué ch'tî-là cachi fanmeusement et tch'il' arrivîdrent en Ville sans autchun embarras. I' n'y'a qu' à d'mander tch'est qué l'cocher pensit quand i' sortit d'l'aubèrge et trouvit j'vaux et cârrosse dispathus, et nou peut s'înmaginner la reception tchi l'attendait en rentrant à l'êtabl'ye!

Moussieu Larbalêtchi nouos dit, étout, qu' à ch't' êpoque-là i' n'y'avait pon d'hèrses, et que les procêssions d'entèrrement avaient à porter l'côffre à bras et à pid du domicile au chînm'tchiéthe. S'lon la distance, sans doute, i' fallait un r'lais d'porteurs pour porter l'côffre. V'là tchi m'ramémouaithe qué quand man Papa L'Feuvre mouothit en 1903, ayant exprînmé un d'si d'êt' porté à bras au chînmtchiéthe, tant en fut. Il avait probabliément 'tait înmpréssionné par chutte vielle couôteunme. l' y'avait sans doute des hèrses en 1903.

La Milice Rouoyale 'tait bein active en 1870 quand Moussieu Larbalêtchi 'tait iun d's officièrs dans l'Régiment du Nord, appelé "Les Russes" dans chu temps-là! I' n'nouos dit pon pourtchi, mais i' m'sembl'ye aver liu d'tchiquebord qué ch'tait viyant qu' lus unniformes èrsembliaient à la cheinne des Russes casèrnés en Jèrri pour eune volée en 1799 et 1800.

Lé Régiment du Nord 'tait d'La Trinneté et St Martîn et l'Coronel James Godfray, pus tard "Chévalier" et Aide dé Camp à la Reine Victoria, c'mandait l'régiment. Châque fais tch'i' y'avait un exèrcice ou eune parade i' fallait qu' châque offici payîsse, châtchun à san tou, pour un dîner à l'Arsénal dé St Martîn. Quand v'nait la Grand' R'veue (j'sommes acouo en 1870), officièrs et soudards dé chu régiment avaient à s'assemblier dans Wellington Road, St Saûveux, et marchi, mûsique en tête, l'travèrs dé la Ville jusqué sus l'sablion dans La Baie d'St. Aubîn. Moussieu Larbalêtchi nouos dit qué l's unniformes 'taient données ès miliciens sans égard à la hauteu ou à la corpothence, et qué lus appathence dans cèrtains cas 'tait pûtôt rîsibl'ye et qué touos les villais lus mâtaient sus les trottouaithes des rues pour les vaie pâsser.

Quand j'tais dans l'Régiment du Ouest à La Grand' R'veue en 1908, j'tions habilyis comme i' faut en t'nue d'parade auve rouoge câsaques et "casque" auve un pitchet sus l'haut, et j'tions d'avis qué j'pouvions pâsser pour des rédgulièrs. Mais j'mé sis souvent d'mandé tch'est qué l'Gouvèrneux voulait dithe quand i' nouos annoncit qué ouaithe tch'il avait pâssé les miyeurs régiments d'Sa Majesté en r'veue, i' n'en avait janmais veu comme nous! Natuthellement, j'pensions tch'il entendait tch'i' n'en avait veu d'si au-faits à l'exèrcice et appathence! En autchun cas, j'sis ordgilleux d'aver 'té soudard dans la Milice Rouoyale dé Jèrri, et j'sis iun d'ches'-là tchi crai qu' ou dév'thait r'êt' mînse en activité.

En 1885, Moussieu George Quesnel Larbalêtchi fut êlu Connêtabl'ye dé La Trinneté sans opposition à rempliaichi Moussieu Alfred Messervy (un moussieu qu' j'ai bein connu étout), êlu Juge. Dans s'n accompte dé l'élection, j'ai 'té surprîns d'vaie tch'i' y'avait des Louothièrs et des Rosièrs à La Trinneté comme à St. Ouën, et qué Moussieu Larbalêtchi 'tait iun des grands du parti Louothi. Et i' nouos raconte comment qu' les deux partis lus entré-jouaient des farces pour empêchi cèrtains d'voter, prîncipalement les vieaux tch'avaient accepté des sou des deux partis et qu' nou n'pouvait pon s'fier d'ssus. Ch'est seux qu' les Louothièrs avaient prîns patron sus lus sembliabl'yes à St. Ouën!

George d'La Forge

 

 

Viyiz étout:

 

Les Pages Jèrriaises